ലണ്ടന്‍: ടെന്നീസ് കോര്‍ട്ടിലേക്ക് നാല് വര്‍ഷത്തെ ഇടവേളയ്ക്ക് ശേഷം തിരിച്ചെത്തിയ അമേരിക്കന്‍ ഇതിഹാസ താരം സെറീന വില്യംസിന് വിജയത്തുടക്കം. ക്വീന്‍സ് ക്ലബ് ചാമ്പ്യന്‍ഷിപ്പിലെ വനിതാ ഡബിള്‍സ് ആദ്യ റൗണ്ടില്‍ കാനഡയുടെ യുവതാരം വിക്ടോറിയ എംബോക്കോയ്‌ക്കൊപ്പം ഇറങ്ങിയ സെറീന നേരിട്ടുള്ള സെറ്റുകള്‍ക്ക് വിജയം സ്വന്തമാക്കി. ടൂര്‍ണമെന്റിലെ മൂന്നാം സീഡായ എറിന്‍ റൂട്ട്‌ലിഫ് (ന്യൂസിലന്‍ഡ്)-നിക്കോള്‍ മെലിചാര്‍-മാര്‍ട്ടിനെസ് (യു.എസ്.എ) സഖ്യത്തെയാണ് ഇവര്‍ അട്ടിമറിച്ചത്.
പടിഞ്ഞാറന്‍ ലണ്ടനിലെ ക്വീന്‍സ് ക്ലബിലുള്ള ആന്‍ഡി മറെ അരീനയില്‍ നടന്ന മത്സരത്തില്‍ ഒട്ടും പതറാതെയാണ് അമേരിക്കന്‍-കാനഡ സഖ്യം പോരാടിയത്. 25 വയസ്സിന്റെ പ്രായവ്യത്യാസമുണ്ടെങ്കിലും കോര്‍ട്ടില്‍ മികച്ച ഏകോപനം കാഴ്ചവെച്ച സെറീന-എംബോക്കോ സഖ്യം ഒന്നിനെതിരെ മുപ്പത് മിനിറ്റ് മാത്രം നീണ്ടുനിന്ന പോരാട്ടത്തില്‍ 7-6 (7-2), 6-2 എന്ന സ്‌കോറിനാണ് വിജയം പിടിച്ചെടുത്തത്.
ആദ്യ സെറ്റില്‍ ഇരു ജോഡികളും ഓരോ തവണ വീതം പരസ്പരം സര്‍വുകള്‍ ബ്രേക്ക് ചെയ്തതിനെ തുടര്‍ന്ന് മത്സരം ടൈബ്രേക്കറിലേക്ക് നീണ്ടു. എന്നാല്‍ ടൈബ്രേക്കറില്‍ തകര്‍പ്പന്‍ പ്രകടനം പുറത്തെടുത്ത സെറീനയും കൂട്ടാളിയും സെറ്റ് സ്വന്തമാക്കി. ഈ ആത്മവിശ്വാസത്തില്‍ രണ്ടാം സെറ്റില്‍ എതിരാളികളുടെ സര്‍വ് രണ്ട് തവണ ബ്രേക്ക് ചെയ്ത ഇവര്‍, തങ്ങളുടെ സര്‍വുകള്‍ എല്ലാം നിലനിര്‍ത്തിക്കൊണ്ട് ആധികാരികമായി മത്സരം അവസാനിപ്പിച്ചു. രണ്ടാം റൗണ്ടില്‍ ലെയ്ല ഫെര്‍ണാണ്ടസ്-അലക്‌സാണ്ട്ര പനോവ അല്ലെങ്കില്‍ ലോറ സീഗ്മുണ്ട്-ഡെമി ഷൂര്‍സ് സഖ്യത്തില്‍ ജയിക്കുന്നവരെയാണ് ഇവര്‍ നേരിടുക.
2022-ലെ യു.എസ് ഓപ്പണിന് ശേഷം ടെന്നീസില്‍ നിന്ന് താന്‍ ‘അകന്നുമാറുകയാണെന്ന്’ പ്രഖ്യാപിച്ച സെറീനയുടെ ആദ്യ ഔദ്യോഗിക മത്സരമായിരുന്നു ഇത്. 23 വനിതാ സിംഗിള്‍സും 14 വനിതാ ഡബിള്‍സും 2 മിക്സഡ് ഡബിള്‍സും ഉള്‍പ്പെടെ 39 ഗ്രാന്‍ഡ് സ്ലാം കിരീടങ്ങള്‍ നേടിയ സെറീന ലോകത്തെ എക്കാലത്തെയും മികച്ച ടെന്നീസ് താരമായാണ് കണക്കാക്കപ്പെടുന്നത്. വൈല്‍ഡ് കാര്‍ഡ് എന്‍ട്രിയിലൂടെയാണ് താരം ഈ ടൂര്‍ണമെന്റില്‍ കളിക്കാനെത്തിയത്.
തന്റെ ആരാധനാപാത്രമായ സെറീനയ്‌ക്കൊപ്പം കളിക്കാനിറങ്ങിയ 19-കാരിയായ വിക്ടോറിയ എംബോക്കോ കാനഡയില്‍ നിന്നുള്ള വളര്‍ന്നുവരുന്ന താരമാണ്. ചുരുങ്ങിയ കാലം കൊണ്ട് ടെന്നീസ് ലോകത്ത് വലിയ മുന്നേറ്റം നടത്താന്‍ എംബോക്കോയ്‌ക്ക് കഴിഞ്ഞിട്ടുണ്ട്. 2025-ലെ കനേഡിയന്‍ ഓപ്പണില്‍ വിജയിച്ച് ഒരു ഡബ്ല്യു.ടി.എ 1000 സിംഗിള്‍സ് കിരീടം താരം സ്വന്തമാക്കിയിരുന്നു. കൂടാതെ 2026-ലെ ഖത്തര്‍ ഓപ്പണ്‍ ഫൈനലിലും താരം കളിച്ചിട്ടുണ്ട്. നിലവില്‍ ഡബ്ല്യു.ടി.എ സിംഗിള്‍സ് റാങ്കിങ്ങില്‍ ഒമ്പതാം സ്ഥാനത്തുള്ള എംബോക്കോ, കരിയറില്‍ ആറ് തവണ ലോകത്തെ ആദ്യ പത്ത് റാങ്കിലുള്ള താരങ്ങളെ തോല്‍പ്പിച്ചിട്ടുണ്ട്. ഡബിള്‍സ് റാങ്കിങ്ങില്‍ താരം 133-ാം സ്ഥാനത്താണ്.
