കോഴിക്കോട്: സെന്‍സസ് ഡ്യൂട്ടിയുടെ കാര്യത്തില്‍ സംസ്ഥാന സര്‍ക്കാര്‍ അദ്ധ്യാപകവിരുദ്ധ നിലപാടാണ് സ്വീകരിച്ചിരിക്കുന്നതെന്ന് ദേശീയ അദ്ധ്യാപക പരിഷത്ത് (എന്‍ടിയു) സംസ്ഥാന ജനറല്‍ സെക്രട്ടറി ടി. അനൂപ് കുമാര്‍ ആരോപിച്ചു. സെന്‍സസ് ഡ്യൂട്ടിക്ക് നിയോഗിക്കപ്പെട്ട അദ്ധ്യാപകര്‍ക്ക് ഡ്യൂട്ടി ലീവ് അനുവദിക്കുകയോ, അവര്‍ക്ക് പകരം ദിവസവേതന അദ്ധ്യാപകരെ നിയമിക്കുകയോ ചെയ്യാതെ ഒരേസമയം വിദ്യാലയ പ്രവര്‍ത്തനങ്ങളും സെന്‍സസ് ചുമതലയും നിര്‍വഹിക്കാന്‍ നിര്‍ബന്ധിക്കുന്നത് അദ്ധ്യാപകരോട് കാട്ടുന്ന അനീതിയാണെന്ന് അദ്ദേഹം പറഞ്ഞു.
നാളെ മുതല്‍ സെന്‍സസ് ഡ്യൂട്ടി ആരംഭിക്കാനിരിക്കെ ഡ്യൂട്ടിക്ക് നിയോഗിക്കപ്പെട്ട അദ്ധ്യാപകര്‍ക്ക് തിരിച്ചറിയല്‍ കാര്‍ഡുകള്‍ പോലും വിതരണം ചെയ്യാത്തത് സര്‍ക്കാരിന്റെ ഗുരുതരമായ അനാസ്ഥയുടെ തെളിവാണെന്നും അദ്ദേഹം കുറ്റപ്പെടുത്തി.
സംസ്ഥാനത്തെ പൊതുവിദ്യാഭ്യാസ മേഖല ഭരണപരമായ കടുത്ത പ്രതിസന്ധിയിലൂടെയാണ് കടന്നുപോകുന്നതെന്നും സര്‍ക്കാരിന്റെ കെടുകാര്യസ്ഥത വിദ്യാലയങ്ങളുടെ സുഗമമായ പ്രവര്‍ത്തനത്തെ ഗുരുതരമായി ബാധിക്കുന്നുണ്ട്. ഈ അദ്ധ്യയന വര്‍ഷം പൊതുവിദ്യാലയങ്ങളില്‍ ഏകദേശം ഒന്നരലക്ഷത്തോളം വിദ്യാര്‍ത്ഥികളുടെ കുറവ് രേഖപ്പെടുത്തിയിട്ടും അതിന്റെ യഥാര്‍ത്ഥ കാരണങ്ങള്‍ തിരിച്ചറിയുന്നതില്‍ വിദ്യാഭ്യാസ വകുപ്പ് പരാജയപ്പെട്ടിരിക്കുകയാണ്.
വിദ്യാലയങ്ങള്‍ തുറന്ന് ഒരു മാസം പിന്നിട്ടിട്ടും വിദ്യാഭ്യാസ വകുപ്പിലെ പ്രധാന തസ്തികകളില്‍ നിയമനങ്ങള്‍ പൂര്‍ത്തിയാക്കാന്‍ കഴിഞ്ഞിട്ടില്ല. അദ്ധ്യാപകരുടെ അര്‍ഹതപ്പെട്ട സ്ഥലംമാറ്റങ്ങള്‍, നാന്നൂറോളം പ്രധാനാദ്ധ്യാപക നിയമനങ്ങള്‍, ഹയര്‍ സെക്കന്‍ഡറി പ്രിന്‍സിപ്പല്‍ നിയമനങ്ങള്‍ എന്നിവ ഇനിയും അനിശ്ചിതത്വത്തിലാണ്. ജില്ലാതല വിദ്യാഭ്യാസ ഭരണത്തിന് നേതൃത്വം നല്‍കേണ്ട ഡിഇഒ, ഡിഡിഇ തസ്തികകളിലെ ഒഴിവുകള്‍ നികത്താത്തതും ഹയര്‍ സെക്കന്‍ഡറിയിലെ പുതിയ പാഠപുസ്തകങ്ങളുടെ വിതരണം വൈകുന്നതും വിദ്യാഭ്യാസ രംഗത്തെ പ്രതിസന്ധി കൂടുതല്‍ രൂക്ഷമാക്കുകയാണെന്നും അദ്ദേഹം പറഞ്ഞു.
എസ്‌സിഇആര്‍ടി, സീമാറ്റ്, സമഗ്ര ശിക്ഷാ കേരളം തുടങ്ങിയ സുപ്രധാന വിദ്യാഭ്യാസ സ്ഥാപനങ്ങളിലെ നിയമനങ്ങളും അദ്ധ്യാപക ക്ഷേമ ഫൗണ്ടേഷന്റെ പുനഃസംഘടനയും ഇതുവരെ പൂര്‍ത്തിയാക്കിയിട്ടില്ല. വിദ്യാഭ്യാസ വകുപ്പിലെ ഭരണപരമായ അനിശ്ചിതത്വം വ്യാപകമായ അസംതൃപ്തിക്ക് കാരണമായിരിക്കുകയാണെന്നും അദ്ദേഹം ആരോപിച്ചു.
വിദ്യാഭ്യാസ മേഖലയിലെ ഭരണപരമായ വീഴ്ചകള്‍ പരിഹരിച്ച് അടിയന്തര നടപടികള്‍ സ്വീകരിക്കാന്‍ സര്‍ക്കാര്‍ തയാറായില്ലെങ്കില്‍ സംസ്ഥാനവ്യാപകമായി ശക്തമായ സമരപരിപാടികള്‍ക്ക് എന്‍ടിയു നേതൃത്വം നല്‍കുമെന്നും അനൂപ് കുമാര്‍ കൂട്ടിച്ചേര്‍ത്തു.
