ന്യൂഡല്ഹി: പാകിസ്താന് ടെസ്റ്റ് ടീമിന്റെ നായകസ്ഥാനത്തേക്ക് ബാബര് അസം തിരിച്ചെത്തി. തുടര്ച്ചയായ മോശം പ്രകടനങ്ങളുടെ പശ്ചാത്തലത്തില് ഷാന് മസൂദിനെ ക്യാപ്റ്റന് സ്ഥാനത്ത് നിന്ന് മാറ്റിയാണ് പാകിസ്താന് ക്രിക്കറ്റ് ബോര്ഡ് ഈ നിര്ണായക തീരുമാനം എടുത്തത്. ജൂലൈ 25 മുതല് വെസ്റ്റ് ഇന്ഡീസിനെതിരെ ആരംഭിക്കുന്ന രണ്ട് മത്സരങ്ങളുടെ ടെസ്റ്റ് പരമ്പരയിലൂടെയാണ് ബാബറിന്റെ രണ്ടാം ക്യാപ്റ്റന്സി ഇന്നിങ്സ് തുടങ്ങുന്നത്.
ആദ്യ ടെസ്റ്റ് ടറൂബയിലും രണ്ടാം മത്സരം ഓഗസ്റ്റ് 2 മുതല് പോര്ട്ട് ഓഫ് സ്പെയിനിലുമാണ് നടക്കുക. ഏകദേശം മൂന്ന് വര്ഷം മുമ്പാണ് ഷാന് മസൂദ് ടെസ്റ്റ് നായകനായത്. അദ്ദേഹത്തിന്റെ നേതൃത്വത്തില് പാകിസ്താന് കളിച്ച 16 ടെസ്റ്റുകളില് 12 മത്സരങ്ങളും പരാജയപ്പെട്ടു. സമീപകാലത്തെ നിരാശാജനകമായ പ്രകടനങ്ങളാണ് ക്യാപ്റ്റന്സി മാറ്റത്തിന് കാരണമായതെന്നാണ് റിപ്പോര്ട്ടുകള്. തീരുമാനത്തെ ന്യായീകരിച്ച് ഹൈ പെര്ഫോമന്സ് ഡയറക്ടര് അഖീബ് ജാവേദും രംഗത്തെത്തി.
വിജയിക്കേണ്ട മത്സരങ്ങള് പോലും അവസാന ഘട്ടത്തില് കൈവിട്ടതാണ് ടീമിനെ ബാധിച്ചതെന്ന് അദ്ദേഹം പറഞ്ഞു. ദക്ഷിണാഫ്രിക്കയ്ക്കെതിരായ സെഞ്ചുറിയന് ടെസ്റ്റിലും വെസ്റ്റ് ഇന്ഡീസിനെതിരായ മുല്ത്താന് ടെസ്റ്റിലും ക്യാപ്റ്റന്റെ തന്ത്രപരമായ തീരുമാനങ്ങളില് പിഴവുണ്ടായിരുന്നുവെന്നും അദ്ദേഹം ചൂണ്ടിക്കാട്ടി.
വെസ്റ്റ് ഇന്ഡീസ് പരമ്പരയ്ക്കുള്ള പാകിസ്താന് ടീം: ബാബര് അസം (ക്യാപ്റ്റന്), മുഹമ്മദ് റിസ്വാന്, ഷാന് മസൂദ്, സല്മാന് അലി ആഗ, ഇമാം ഉള് ഹഖ്, ആമിര് ജമാല്, മുഹമ്മദ് അബ്ബാസ്, സാജിദ് ഖാന്, ഖുറം ഷഹ്സാദ്, മുഹമ്മദ് അലി, ഉബൈദ് ഷാ
