വെല്ലിങ്ടണ്‍: പ്രധാനമന്ത്രി നരേന്ദ്ര മോദിയുടെ ന്യൂസിലന്‍ഡ് സന്ദര്‍ശനത്തിന് മുന്നോടിയായി ഇന്ത്യന്യൂസിലന്‍ഡ് വ്യാപാരബന്ധം കൂടുതല്‍ ശക്തമാക്കുന്ന നിര്‍ണായക നീക്കങ്ങള്‍ക്ക് തുടക്കമായി. ഇരു രാജ്യങ്ങളും തമ്മില്‍ നിര്‍ദിഷ്ട സ്വതന്ത്ര വ്യാപാര കരാര്‍ യാഥാര്‍ഥ്യമാകുന്നതിനെ ന്യൂസിലന്‍ഡ് പ്രധാനമന്ത്രി ക്രിസ്റ്റഫര്‍ ലക്സണ്‍ സ്വാഗതം ചെയ്തു. കരാര്‍ നിലവില്‍ വന്നാല്‍ ന്യൂസിലന്‍ഡ് കമ്പനികള്‍ക്ക് ഇന്ത്യന്‍ വിപണിയിലേക്കുള്ള പ്രവേശനം കൂടുതല്‍ എളുപ്പമാകുമെന്നും രാജ്യത്തിന്റെ കയറ്റുമതിക്ക് വലിയ ഉണര്‍വ് ലഭിക്കുമെന്നും അദ്ദേഹം പറഞ്ഞു.
കരാര്‍ പ്രാബല്യത്തില്‍ വന്നാല്‍ ഇന്ത്യയിലേക്കുള്ള ന്യൂസിലന്‍ഡിന്റെ കയറ്റുമതിയുടെ 57 ശതമാനത്തിനും ആദ്യ ദിവസം മുതല്‍ തന്നെ ഇറക്കുമതി തീരുവ ഒഴിവാക്കുമെന്ന് ലക്സണ്‍ എക്സില്‍ കുറിച്ചു. ഇത് ഇരുരാജ്യങ്ങളുടെയും വ്യാപാരബന്ധത്തില്‍ ചരിത്രപരമായ മുന്നേറ്റമാകുമെന്നാണ് വിലയിരുത്തല്‍.
പ്രധാനമന്ത്രി ലക്സന്റെ ക്ഷണപ്രകാരം ജൂലൈ 10, 11 തീയതികളിലാണ് നരേന്ദ്ര മോദി ന്യൂസിലന്‍ഡ് സന്ദര്‍ശിക്കുന്നത്. കഴിഞ്ഞ നാല് പതിറ്റാണ്ടിനിടെ ഒരു ഇന്ത്യന്‍ പ്രധാനമന്ത്രി നടത്തുന്ന ആദ്യ ഔദ്യോഗിക ന്യൂസിലന്‍ഡ് സന്ദര്‍ശനമെന്ന പ്രത്യേകതയും ഇതിന് ഉണ്ട്. ഓക്ലന്‍ഡില്‍ നടക്കുന്ന ഉഭയകക്ഷി ചര്‍ച്ചകളില്‍ വ്യാപാരം, വാണിജ്യം, പ്രതിരോധം, നിക്ഷേപം, സാങ്കേതികവിദ്യ എന്നിവ ഉള്‍പ്പെടെയുള്ള വിവിധ മേഖലകളിലെ സഹകരണം ഇരുനേതാക്കളും അവലോകനം ചെയ്യും.
ഇന്തോനേഷ്യയിലും ഓസ്‌ട്രേലിയയിലും സന്ദര്‍ശനം പൂര്‍ത്തിയാക്കിയ ശേഷമാണ് പ്രധാനമന്ത്രി മോദി ത്രിരാഷ്‌ട്ര പര്യടനത്തിന്റെ അവസാന ഘട്ടമായി ന്യൂസിലന്‍ഡിലെത്തുന്നത്. ഇന്തോ-പസഫിക് മേഖലയിലെ പ്രധാന പങ്കാളികളുമായുള്ള ബന്ധം കൂടുതല്‍ ദൃഢമാക്കുക, വ്യാപാരം, നിക്ഷേപം, സാങ്കേതികവിദ്യ, നിര്‍ണായക ധാതുക്കള്‍ എന്നിവയില്‍ സഹകരണം വിപുലീകരിക്കുക എന്നിവയാണ് പര്യടനത്തിന്റെ പ്രധാന ലക്ഷ്യങ്ങള്‍. സന്ദര്‍ശനത്തിനിടെ പ്രമുഖ വ്യവസായികളുമായും കായികരംഗത്തെ പ്രമുഖരുമായും ഇന്ത്യന്‍ പ്രവാസികളുമായും പ്രധാനമന്ത്രി കൂടിക്കാഴ്ച നടത്തും.
ഇന്ത്യയുടെ ‘ആക്റ്റ് ഈസ്റ്റ്’ നയത്തിന് കൂടുതല്‍ കരുത്ത് പകരുന്നതിലും സ്വതന്ത്രവും തുറന്നതും എല്ലാവരെയും ഉള്‍ക്കൊള്ളുന്നതുമായ ഇന്തോ-പസഫിക് മേഖല രൂപപ്പെടുത്തുന്നതിലും ഈ സന്ദര്‍ശനം നിര്‍ണായകമാകുമെന്നാണ് വിലയിരുത്തല്‍. മേഖലയില്‍ ചൈനയുടെ വര്‍ധിച്ചുവരുന്ന സ്വാധീനവും സുരക്ഷിതമായ വിതരണ ശൃംഖലകള്‍ രൂപപ്പെടുത്തേണ്ടതിന്റെ ആവശ്യകതയും ചര്‍ച്ചകളില്‍ പ്രധാന വിഷയങ്ങളാകുമെന്നാണ് സൂചന.
സമീപ വര്‍ഷങ്ങളിലായി ഇന്ത്യയും ന്യൂസിലന്‍ഡും തമ്മിലുള്ള ബന്ധം പ്രതിരോധം, വ്യാപാരം, നിക്ഷേപം തുടങ്ങിയ മേഖലകളില്‍ ശക്തിപ്പെട്ടിട്ടുണ്ട്. നിര്‍ദിഷ്ട വ്യാപാര കരാര്‍ യാഥാര്‍ഥ്യമായാല്‍ ഇരുരാജ്യങ്ങളുടെയും സാമ്പത്തിക സഹകരണത്തിന് പുതിയ അധ്യായം തുറക്കുമെന്ന പ്രതീക്ഷയിലാണ് ഇരു സര്‍ക്കാരുകളും.
