ഡാക്കര്‍: സെനഗല്‍ ഫുട്‌ബോളിന്റെ സുവര്‍ണകാലത്തിന് നേതൃത്വം നല്‍കിയ ഇതിഹാസ താരം സാദിയോ മാനെ അന്താരാഷ്ട്ര ഫുട്‌ബോളില്‍ നിന്ന് വിരമിക്കല്‍ പ്രഖ്യാപിച്ചു. 2026 ഫിഫ ലോകകപ്പിന്റെ പ്രീക്വാര്‍ട്ടറില്‍ ബെല്‍ജിയത്തോട് 3-2ന് തോറ്റ് സെനഗല്‍ പുറത്തായതിന് പിന്നാലെയാണ് 33-കാരനായ താരം വിരമിക്കല്‍ പ്രഖ്യാപിക്കുന്നത്.
2012ല്‍ ദേശീയ ടീമില്‍ അരങ്ങേറ്റം കുറിച്ച മാനെ, 14 വര്‍ഷം നീണ്ട അന്താരാഷ്ട്ര കരിയറില്‍ 130 മത്സരങ്ങളില്‍ നിന്ന് 54 ഗോളുകളും 29 അസിസ്റ്റുകളും സ്വന്തമാക്കി. സെനഗലിന്റെ എക്കാലത്തെയും മികച്ച താരങ്ങളില്‍ ഒരാളായ അദ്ദേഹം നിരവധി ചരിത്രനേട്ടങ്ങള്‍ക്ക് രാജ്യത്തെ നയിച്ചു.
2021ലെ ആഫ്രിക്കന്‍ നേഷന്‍സ് കപ്പ് ഫൈനലില്‍ ഈജിപ്തിനെ പെനാല്‍റ്റി ഷൂട്ടൗട്ടില്‍ കീഴടക്കി സെനഗലിന് ആദ്യ കിരീടം സമ്മാനിക്കുന്നതില്‍ മാനെ നിര്‍ണായക പങ്കുവഹിച്ചു. ദേശീയ ടീമിനൊപ്പം മാത്രമല്ല, ഇംഗ്ലീഷ് ക്ലബ്ബായ ലിവര്‍പൂളിലും യൂറോപ്യന്‍ ഫുട്‌ബോളില്‍ തന്റെ മികവ് തെളിയിച്ച താരമാണ് അദ്ദേഹം.
വിരമിക്കല്‍ പ്രഖ്യാപനത്തില്‍ രാജ്യത്തിനായി തന്റെ കഴിവിന്റെ പരമാവധി നല്‍കിയെന്നും സെനഗലിന്റെ ജേഴ്‌സി അണിഞ്ഞ ഓരോ നിമിഷവും അഭിമാനത്തോടെയാണെന്നും മാനെ പറഞ്ഞു. രാജ്യത്തെ പ്രതിനിധീകരിക്കുക എന്നത് തന്റെ ജീവിതത്തിലെ ഏറ്റവും വലിയ ബഹുമതിയായിരുന്നുവെന്നും അദ്ദേഹം കൂട്ടിച്ചേര്‍ത്തു.
2026 ലോകകപ്പില്‍ ഫ്രാന്‍സ്, നോര്‍വേ, ഇറാഖ് എന്നിവരടങ്ങിയ കടുത്ത ഗ്രൂപ്പിലായിരുന്നു സെനഗല്‍. ആദ്യ രണ്ട് മത്സരങ്ങളിലും ഫ്രാന്‍സിനോടും നോര്‍വേയോടും തോറ്റെങ്കിലും, അവസാന ഗ്രൂപ്പ് മത്സരത്തില്‍ ഇറാഖിനെ കീഴടക്കി മികച്ച മൂന്നാംസ്ഥാനക്കാരായി നോക്കൗട്ട് റൗണ്ടിലെത്തി. എന്നാല്‍ ബെല്‍ജിയത്തോട് പൊരുതി വീണതോടെ സെനഗലിന്റെ ലോകകപ്പ് സ്വപ്‌നവും അവസാനിച്ചു.
സാദിയോ മാനെയുടെ വിരമിക്കലോടെ സെനഗല്‍ ഫുട്‌ബോളിലെ ഒരു സുപ്രധാന അധ്യായത്തിനാണ് തിരശ്ശീല വീഴുന്നത്. ഒരു പതിറ്റാണ്ടിലേറെയായി ദേശീയ ടീമിന്റെ മുഖമായി മാറിയ താരം വിടപറയുമ്പോള്‍, പുതിയ തലമുറയെ വാര്‍ത്തെടുക്കാനുള്ള വലിയ ഉത്തരവാദിത്തമാണ് ഇനി സെനഗല്‍ ഫുട്‌ബോളിന് മുന്നിലുള്ളത്.
