ബ്യൂണസ് ഐറിസ്: അര്‍ജന്റീന ഫുട്‌ബോള്‍ അസോസിയേഷനെ ലക്ഷ്യമിട്ട് ഫ്രഞ്ച് അന്വേഷണാത്മക മാധ്യമപ്രവര്‍ത്തകന്‍ റൊമെയ്ന്‍ മൊളിന പുറത്തുവിട്ട റിപ്പോര്‍ട്ട് അന്താരാഷ്‌ട്ര ഫുട്‌ബോള്‍ ലോകത്ത് വലിയ ചര്‍ച്ചയ്‌ക്ക് വഴിവെച്ചു. പ്രായപൂര്‍ത്തിയാകാത്തവര്‍ക്കെതിരായ ലൈംഗികാതിക്രമ കേസുകള്‍ മറച്ചുവെച്ചത്, കോടിക്കണക്കിന് ഡോളറിന്റെ കള്ളപ്പണം വെളുപ്പിക്കല്‍, സാമ്പത്തിക തട്ടിപ്പ്, വ്യാജരേഖ നിര്‍മാണം തുടങ്ങി ഗുരുതരമായ ആരോപണങ്ങളാണ് റിപ്പോര്‍ട്ടിലുള്ളത്. വര്‍ഷങ്ങളായി ഫിഫ എഎഫ്എ നേതൃത്വത്തെ സംരക്ഷിച്ചുവെന്ന ഗുരുതര ആരോപണവും മൊളിന ഉന്നയിക്കുന്നു.
24 മിനിറ്റ് ദൈര്‍ഘ്യമുള്ള അന്വേഷണ വീഡിയോ പങ്കുവെച്ചുകൊണ്ടാണ് മൊളിന ആരോപണങ്ങള്‍ പുറത്തുവിട്ടത്. ‘അര്‍ജന്റീന ഫുട്‌ബോളിലെ മാഫിയ’ എന്ന തലക്കെട്ടോടെയുള്ള അന്വേഷണത്തില്‍ ലൈംഗികാതിക്രമം, കള്ളപ്പണം വെളുപ്പിക്കല്‍, സാമ്പത്തിക ക്രമക്കേട്, വ്യാജരേഖകള്‍ എന്നിവയുമായി ബന്ധപ്പെട്ട രേഖകളും ഉള്‍പ്പെടുത്തിയിട്ടുണ്ടെന്നാണ് അദ്ദേഹം അവകാശപ്പെടുന്നത്.
റിപ്പോര്‍ട്ടിലെ പ്രധാന ആരോപണം 300 മില്യണ്‍ ഡോളറിലധികം തുകയുടെ ദുരുപയോഗവും കള്ളപ്പണം വെളുപ്പിക്കലും സംബന്ധിച്ച എഫ്.ബി.ഐ അന്വേഷണമാണ്. 2026 ലോകകപ്പിന് പിന്നാലെ TrodProdEnter എന്ന കമ്പനി വഴിയാണ് വന്‍തുകകള്‍ വിവിധ ഷെല്‍ കമ്പനികളിലേക്ക് മാറ്റിയതെന്നാണ് ആരോപണം. 42 മില്യണ്‍ ഡോളറിലധികം തുക വ്യാജ കമ്പനികളിലേക്ക് മാറ്റിയെന്നും, ഈ പണം ഉപയോഗിച്ച് എഎഫ്എ പ്രസിഡന്റ് ക്ലോഡിയോ ടാപിയ, ട്രഷറര്‍ പാബ്ലോ ടോവിഗിനോ എന്നിവര്‍ സ്വകാര്യ ജെറ്റുകള്‍, ആഡംബര ബംഗ്ലാവുകള്‍, കാറുകള്‍, യാച്ചുകള്‍ എന്നിവ സ്വന്തമാക്കിയെന്നുമാണ് റിപ്പോര്‍ട്ടില്‍ പറയുന്നത്. ഇറ്റാലിയന്‍ ക്ലബ്ബായ പെറൂജിയയെ മുന്‍നിര കമ്പനികള്‍ മുഖേന സ്വന്തമാക്കിയതായും ആരോപണമുണ്ട്.
പ്രായപൂര്‍ത്തിയാകാത്തവര്‍ക്കെതിരായ ലൈംഗികാതിക്രമവും പീഡനവും ആരോപിക്കപ്പെട്ട പരിശീലകന്‍ ഡീഗോ ഗുവാച്ചിയെ എഎഫ്എയും ഫിഫയും ചേര്‍ന്ന് സംരക്ഷിച്ചുവെന്നതാണ് റിപ്പോര്‍ട്ടിലെ ഏറ്റവും ഗുരുതരമായ ആരോപണങ്ങളിലൊന്ന്. ബാധിതരെയും വിവരങ്ങള്‍ പുറത്തുകൊണ്ടുവരാന്‍ ശ്രമിച്ചവരെയും മാധ്യമങ്ങളെയും ഭീഷണിപ്പെടുത്തുകയും ബ്ലാക്ക്‌മെയില്‍ ചെയ്യുകയും ചെയ്തുവെന്നാണ് മൊളിനയുടെ ആരോപണം. ഫിഫയുടെ ചീഫ് ലീഗല്‍ ഓഫീസര്‍ എമിലിയോ ഗാര്‍സിയ അര്‍ജന്റീന ഫുട്‌ബോളിന് സ്ഥാപനപരമായ സംരക്ഷണം നല്‍കിയെന്നും, ഇതുവഴി അന്താരാഷ്‌ട്ര തലത്തില്‍ നടപടികള്‍ ഉണ്ടാകാതിരിക്കാന്‍ ഇടയായെന്നുമാണ് റിപ്പോര്‍ട്ടില്‍ പറയുന്നത്.
അര്‍ജന്റീന പ്രസിഡന്റ് ഹാവിയര്‍ മിലെയ്യും എഎഫ്എ നേതൃത്വവും തമ്മിലുള്ള ഫുട്‌ബോള്‍ ക്ലബ്ബുകളുടെ സ്വകാര്യവല്‍ക്കരണവുമായി ബന്ധപ്പെട്ട തര്‍ക്കം ശക്തമായിരിക്കുന്ന സാഹചര്യത്തിലാണ് ഈ റിപ്പോര്‍ട്ട് പുറത്തുവന്നത്. എന്നാല്‍, റിപ്പോര്‍ട്ടിലുള്ള ആരോപണങ്ങളെക്കുറിച്ച് അര്‍ജന്റീന ഫുട്‌ബോള്‍ അസോസിയേഷനോ ഫിഫയോ ഇതുവരെ ഔദ്യോഗിക പ്രതികരണം നടത്തിയിട്ടില്ല. റിപ്പോര്‍ട്ടിലെ ആരോപണങ്ങള്‍ നിലവില്‍ തെളിയിക്കപ്പെട്ടിട്ടില്ലെന്നും, അന്വേഷണ ഏജന്‍സികളുടെ നടപടികളും ഔദ്യോഗിക കണ്ടെത്തലുകളും പുറത്തുവരുന്നതുവരെ ഇവ ആരോപണങ്ങളായാണ് പരിഗണിക്കപ്പെടുന്നതെന്നും ശ്രദ്ധിക്കേണ്ടതാണ്.
