തിരുവനന്തപുരം: സംസ്ഥാനത്ത് വീണ്ടും വൈദ്യുതി നിയന്ത്രണം ഏര്‍പ്പെടുത്തേണ്ട സാഹചര്യം ഉണ്ടായതായി കെഎസ്ഇബി. ഇന്ന് രാത്രി 7 മണി മുതല്‍ ഭാഗിക വൈദ്യുതി നിയന്ത്രണം ഏര്‍പ്പെടുത്തേണ്ടി വന്നേക്കാമെന്ന് കെഎസ്ഇബി അറിയിച്ചു. എല്‍നിനോ പ്രതിഭാസത്തെ തുടര്‍ന്നുണ്ടായ മഴക്കുറവും ഉയര്‍ന്ന അന്തരീക്ഷ താപനിലയും കാരണം സംസ്ഥാനത്തെ വൈദ്യുതി ഉപഭോഗം മുന്‍വര്‍ഷങ്ങളെ അപേക്ഷിച്ച് ഗണ്യമായി വര്‍ധിച്ചിരിക്കുകയാണ്. ഇതോടൊപ്പം പവര്‍ എക്‌സ്‌ചേഞ്ച് വഴി ലഭിക്കുന്ന വൈദ്യുതിയുടെ ലഭ്യതയിലും കുറവ് അനുഭവപ്പെടുന്നതായും കെഎസ്ഇബി വ്യക്തമാക്കി.
ഇന്നത്തെ വൈദ്യുതി ഉപഭോഗം കഴിഞ്ഞ ദിവസങ്ങളെ അപേക്ഷിച്ച് 300 മുതല്‍ 400 മെഗാവാട്ട് വരെ വര്‍ധിക്കുമെന്നാണ് കെഎസ്ഇബിയുടെ വിലയിരുത്തല്‍. ഈ സാഹചര്യത്തിലാണ് വൈകുന്നേരം മുതല്‍ നിയന്ത്രണം ഏര്‍പ്പെടുത്തുന്നത് പരിഗണിക്കുന്നത്. ഈ മാസം ആദ്യം കേന്ദ്ര പൂളില്‍ നിന്ന് കൂടുതല്‍ വൈദ്യുതി ലഭിച്ചതോടെ തുടര്‍ച്ചയായ മൂന്ന് ദിവസത്തെ രാത്രികാല നിയന്ത്രണം ഒഴിവാക്കാന്‍ കെഎസ്ഇബിക്ക് കഴിഞ്ഞിരുന്നു. എന്നാല്‍ പിന്നീട് പ്രതീക്ഷിച്ച മഴ ലഭിക്കാതിരുന്നതോടെ സ്ഥിതി വീണ്ടും ഗുരുതരമായി.
നിലവില്‍ സംസ്ഥാനത്തിന്റെ പ്രതിദിന വൈദ്യുതി ആവശ്യകത 86 ദശലക്ഷം യൂണിറ്റിനടുത്തെത്തുമ്പോള്‍, ആഭ്യന്തര ഉല്‍പാദനം 10 ദശലക്ഷം യൂണിറ്റ് മാത്രമാണ്. ഡാമുകളിലെ ജലനിരപ്പ് കഴിഞ്ഞ വര്‍ഷങ്ങളെ അപേക്ഷിച്ച് ഏകദേശം മൂന്നിലൊന്നായി കുറഞ്ഞ സാഹചര്യത്തില്‍ ജലവൈദ്യുത ഉല്‍പാദനം വര്‍ധിപ്പിക്കാനുള്ള സാധ്യതയും പരിമിതമായിരിക്കുകയാണ്. ഈ സാഹചര്യത്തില്‍ ആവശ്യത്തിന് വൈദ്യുതി ലഭ്യമാക്കുക കെഎസ്ഇബിക്ക് വലിയ വെല്ലുവിളിയായിരിക്കുകയാണ്.
