കോഴിക്കോട്: മാൻഹോൾ വൃത്തിയാക്കുന്നതിനിടെ ഉണ്ടായ അപകടത്തിൽ തൊഴിലാളി മരിച്ചു. പാലത്തിൽ സ്വദേശിയായ സിറാജ് ആണ് മരിച്ചത്. അപകടത്തിൽ ഒപ്പമുണ്ടായിരുന്ന പാലത്തിൽ സ്വദേശിയായ സുനിലിന് ശാരീരിക അസ്വസ്ഥത അനുഭവപ്പെട്ടതിനെ തുടർന്ന് സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചു.
മൂഴിക്കൽ സ്വദേശിയായ സാഹിദിന്റെ ഉടമസ്ഥതയിലുള്ള കെട്ടിടത്തിലെ മാൻഹോൾ വൃത്തിയാക്കുന്നതിനിടെയായിരുന്നു അപകടം. ജോലിക്കിടെ മാൻഹോളിനുള്ളിലേക്ക് ഇറങ്ങിയ സിറാജ് ശ്വാസതടസം അനുഭവപ്പെട്ട് കുഴഞ്ഞുവീഴുകയായിരുന്നുവെന്നാണ് പ്രാഥമിക വിവരം. ഇതുകണ്ട് രക്ഷപ്പെടുത്താൻ ഇറങ്ങിയ സുനിലിനും ദേഹാസ്വാസ്ഥ്യം അനുഭവപ്പെട്ടു.
സംഭവം ശ്രദ്ധയിൽപ്പെട്ടതോടെ നാട്ടുകാരും രക്ഷാപ്രവർത്തകരും ചേർന്ന് ഇരുവരെയും പുറത്തെടുത്ത് ആശുപത്രിയിലെത്തിച്ചു. എന്നാൽ സിറാജിന്റെ ജീവൻ രക്ഷിക്കാനായില്ല. മാൻഹോളിനുള്ളിൽ വിഷവാതകം നിറഞ്ഞിരുന്നതാകാമെന്നാണ് പ്രാഥമിക നിഗമനം.
സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. തൊഴിലാളികൾ ആവശ്യമായ സുരക്ഷാസംവിധാനങ്ങൾ ഉപയോഗിച്ചിരുന്നോയെന്നും സുരക്ഷാ മാനദണ്ഡങ്ങൾ പാലിച്ചിരുന്നോയെന്നും ഉൾപ്പെടെയുള്ള കാര്യങ്ങളും അന്വേഷണത്തിന്റെ ഭാഗമാക്കും.
