ദുബായ്: റിലീസ് ചെയ്ത് രണ്ടാഴ്ച പോലും തികയുന്നതിന് മുമ്പ് രണ്ട് കോടിയിലധികം (20 മില്യൺ+) യൂട്യൂബ് കാഴ്ചക്കാർ സ്വന്തമാക്കി മലയാളി ഗായികയും ഇരട്ട ഗിന്നസ് വേൾഡ് റെക്കോർഡ്സ് ജേതാവുമായ സുചേത സതീഷിന്റെ പുതിയ ഹിന്ദി സംഗീത ആൽബമായ ‘ഹയാതി’ ആഗോള ശ്രദ്ധ നേടുന്നു.
DOSS Music പുറത്തിറക്കിയ ഗാനത്തിൽ പ്രശസ്ത ഗായകൻ സിക്കന്ദർ മാൻ സുചേതയ്‌ക്കൊപ്പം ആലപിച്ചിരിക്കുന്നു. കെ. പി. സന്ധു സംഗീതം നൽകിയ ഗാനത്തിന്റെ ദൃശ്യാവിഷ്‌കാരത്തിൽ അഹ്വാൻ കുമാർ, സാബി സൂരി എന്നിവർ അഭിനയിച്ചിട്ടുണ്ട്. സംഗീതവും ദൃശ്യഭംഗിയും ചേർന്ന അവതരണമാണ് ഗാനത്തെ സോഷ്യൽ മീഡിയയിലും യൂട്യൂബിലും വൈറലാക്കിയത്.
മാതൃഭാഷ മലയാളമായിട്ടും ഹിന്ദി ഒരു സ്വദേശിയെപ്പോലെ അനായാസമായ ഉച്ചാരണശുദ്ധിയോടെ ആലപിച്ച സുചേതയുടെ പ്രകടനമാണ് സംഗീതാസ്വാദകരുടെ പ്രത്യേക പ്രശംസ നേടുന്നത്. ഗാനത്തിലെ ഭാവപ്രകടനവും ശബ്ദത്തിന്റെ മാധുര്യവും ‘ഹയാതി’യെ ആഗോള പ്രേക്ഷകർ ഏറ്റെടുക്കാൻ കാരണമായതായി വിലയിരുത്തപ്പെടുന്നു.
155 ഭാഷകളിൽ ഗാനങ്ങൾ ആലപിച്ച് ലോകശ്രദ്ധ നേടിയ സുചേത സതീഷ്, ഓരോ ഭാഷയുടെയും ഉച്ചാരണശുദ്ധി കൃത്യമായി നിലനിർത്തുന്ന അസാധാരണ കഴിവിലൂടെ ഇരട്ട ഗിന്നസ് വേൾഡ് റെക്കോർഡുകൾ ഉൾപ്പെടെ നിരവധി ദേശീയ-അന്തർദേശീയ അംഗീകാരങ്ങൾ സ്വന്തമാക്കിയ ഗായികയാണ്.
ഹൃദയസ്പർശിയായ സംഗീതം, മനോഹരമായ ദൃശ്യാവിഷ്‌കാരം, സുചേത സതീഷിന്റെയും സിക്കന്ദർ മാണിന്റെയും ഹൃദ്യമായ ആലാപനം എന്നിവയുടെ സമന്വയമാണ് ‘ഹയാതി’യെ ലോകമെമ്പാടുമുള്ള സംഗീതാസ്വാദകരുടെ പ്ലേലിസ്റ്റിലേക്ക് എത്തിച്ചത്. റിലീസിന് പിന്നാലെ തന്നെ 20 മില്യൺ കാഴ്ചക്കാരെ പിന്നിട്ട ഈ നേട്ടം, സുചേതയുടെ സംഗീതജീവിതത്തിലെ മറ്റൊരു ചരിത്രമുഹൂർത്തമായാണ് വിലയിരുത്തപ്പെടുന്നത്.
