ബരാബങ്കി: കാണ്ഗ്രസിനെയും സമാജ്വാദി പാര്ട്ടിയെയും രൂക്ഷമായി വിമര്ശിച്ചു മുഖ്യമന്ത്രി യോഗി ആദിത്യനാഥ്. ഉത്തര്പ്രദേശിലെ ബരാബങ്കി ജില്ലയില് 542 കോടി രൂപയുടെ 82 വികസന പദ്ധതികള് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മുന് സര്ക്കാരുകള് സനാതന ധര്മ്മത്തെയും രാജ്യത്തിന്റെ സാംസ്കാരിക പൈതൃകത്തെയും അവഗണിച്ചുവെന്നും ശ്മശാനങ്ങളുടെ അതിര്ത്തി മതിലുകള്ക്ക് മാത്രമാണ് ഫണ്ട് അനുവദിച്ചതെന്നും അദ്ദേഹം ആരോപിച്ചു.
ലോധേശ്വര് മഹാദേവ ക്ഷേത്ര ഇടനാഴിയുടെ നിര്മ്മാണത്തിന് സര്ക്കാര് ഫണ്ട് അനുവദിച്ചതായും യോഗി പ്രഖ്യാപിച്ചു. ക്ഷേത്രം സന്ദര്ശിച്ചതിന് ശേഷം ആത്മീയമായ സന്തോഷം അനുഭവപ്പെട്ടുവെന്നും, ഈ പദ്ധതി ഭക്തര്ക്കുള്ള സൗകര്യങ്ങള് വര്ധിപ്പിക്കുന്നതിനൊപ്പം പ്രദേശത്തെ മതടൂറിസത്തിനും വലിയ ഉണര്വ് നല്കുമെന്നും അദ്ദേഹം പറഞ്ഞു.
ലോധേശ്വര് മഹാദേവ് ക്ഷേത്രം, പാരിജാത വൃക്ഷം, ഇതിഹാസ ഹോക്കി താരം കെ.ഡി. സിംഗ് ബാബു എന്നിവയിലൂടെ പ്രശസ്തമായ ബരാബങ്കിയുടെ പൈതൃകം സ്വാതന്ത്ര്യാനന്തരം ദീര്ഘകാലം അവഗണിക്കപ്പെട്ടിരുന്നുവെന്നും, തന്റെ സര്ക്കാര് അവ സംരക്ഷിക്കാനും വികസിപ്പിക്കാനുമാണ് മുന്ഗണന നല്കുന്നതെന്നും മുഖ്യമന്ത്രി വ്യക്തമാക്കി.
സനാതന ധര്മ്മമാണ് ഇന്ത്യയുടെ യഥാര്ത്ഥ സ്വത്വമെന്നും, അത് സംരക്ഷിക്കപ്പെടുമ്പോഴാണ് രാജ്യവും സുരക്ഷിതമാകുകയെന്നും യോഗി പറഞ്ഞു. രാജാ ബലഭദ്ര സിംഗ്, മഹാരാജ സുഹല്ദേവ്, മഹാറാണ പ്രതാപ്, ഛത്രപതി ശിവാജി മഹാരാജ്, ഗുരു ഗോവിന്ദ് സിംഗ് തുടങ്ങി രാജ്യത്തിനും സംസ്കാരത്തിനുമായി ജീവിതം സമര്പ്പിച്ച മഹാന്മാരുടെ പൈതൃകം സംരക്ഷിക്കേണ്ടത് സര്ക്കാരിന്റെ ഉത്തരവാദിത്തമാണെന്നും അദ്ദേഹം കൂട്ടിച്ചേര്ത്തു.
കോണ്ഗ്രസും സമാജ്വാദി പാര്ട്ടിയും പ്രീണന രാഷ്ട്രീയം മാത്രമാണ് നടത്തിയതെന്നും, അയോധ്യ, കാശി വിശ്വനാഥ് ധാം, ലോധേശ്വര് മഹാദേവ ക്ഷേത്രം, ഗോള ഗോകര്ണനാഥ്, മഹാരാജ സുഹല്ദേവ്, ബിജ്ലി പാസി എന്നിവയുമായി ബന്ധപ്പെട്ട മത-ചരിത്ര കേന്ദ്രങ്ങളുടെ വികസനത്തിന് മുന് സര്ക്കാരുകള് യാതൊരു പ്രാധാന്യവും നല്കിയില്ലെന്നും അദ്ദേഹം ആരോപിച്ചു.
കന്വാര് യാത്രകള് തടയുന്നതും രാമനവമി ഘോഷയാത്രകള്ക്ക് നിയന്ത്രണം ഏര്പ്പെടുത്തുന്നതും ജന്മാഷ്ടമി, ദുര്ഗാപൂജ പോലുള്ള ആഘോഷങ്ങള്ക്ക് വിലക്കേര്പ്പെടുത്തുന്നതുമാണ് ഒരുകാലത്ത് മതേതരത്വമെന്ന് ചിലര് കരുതിയിരുന്നതെന്നും യോഗി വിമര്ശിച്ചു. തന്റെ സര്ക്കാര് എല്ലാ മതാചാരങ്ങളും ഉത്സവങ്ങളും സുരക്ഷിതമായും ബഹുമാനത്തോടെയും ആഘോഷിക്കപ്പെടുന്ന സാഹചര്യം ഉറപ്പാക്കിയിട്ടുണ്ടെന്നും അദ്ദേഹം പറഞ്ഞു.
ക്രമസമാധാന രംഗത്തും വലിയ മാറ്റമാണ് ഉത്തര്പ്രദേശില് ഉണ്ടായതെന്ന് ചൂണ്ടിക്കാട്ടിയ മുഖ്യമന്ത്രി, മുമ്പ് അനധികൃതമായി പിസ്റ്റളുകളും ബോംബുകളും നിര്മ്മിച്ചിരുന്ന സംസ്ഥാനത്ത് ഇന്ന് ബ്രഹ്മോസ് മിസൈലുകള് നിര്മ്മിക്കുന്ന പ്രതിരോധ ഉല്പാദന കേന്ദ്രങ്ങള് ഉയര്ന്നുവന്നിട്ടുണ്ടെന്ന് വ്യക്തമാക്കി. വ്യാപാരികള്ക്കും സ്ത്രീകള്ക്കും സുരക്ഷയില്ലാത്ത അവസ്ഥയില് നിന്ന് ഇന്ന് നിക്ഷേപത്തിനും വികസനത്തിനും മാതൃകയായ സംസ്ഥാനമായി ഉത്തര്പ്രദേശ് മാറിയെന്നും യോഗി ആദിത്യനാഥ് പറഞ്ഞു.
