ഗ്ലാസ്‌ഗോ: കോമണ്‍വെല്‍ത്ത് ഗെയിംസ് 2026-ല്‍ ഇന്ത്യയ്‌ക്ക് മത്സരങ്ങള്‍ തുടങ്ങും മുമ്പേ തന്നെ മെഡല്‍ ഉറപ്പായി. വനിതകളുടെ 75 കിലോഗ്രാം ബോക്‌സിങ് വിഭാഗത്തില്‍ ഇന്ത്യന്‍ താരം ലവ്ലീന ബോര്‍ഗോഹെയ്ന്‍ നേരിട്ട് സെമിഫൈനലിലേക്ക് കടന്നതോടെയാണ് കുറഞ്ഞത് വെങ്കലമെഡല്‍ ഉറപ്പായത്. ടോക്കിയോ ഒളിമ്പിക്‌സില്‍ വെങ്കലം നേടിയ ലവ്ലീനയ്‌ക്ക് അഞ്ച് താരങ്ങള്‍ മാത്രമുള്ള വിഭാഗത്തില്‍ ആദ്യ റൗണ്ടില്‍ ബൈ ലഭിച്ചു. ഇതോടെ ക്വാര്‍ട്ടര്‍ ഫൈനല്‍ കളിക്കാതെ തന്നെ സെമിയില്‍ പ്രവേശിക്കുകയും പോഡിയം സ്ഥാനം ഉറപ്പാക്കുകയും ചെയ്തു.
ജൂലൈ 31-ന് നടക്കുന്ന സെമിഫൈനലില്‍ ടുവാലുവിന്റെ ടറോണ ഖാനും ബാദി പാസോണി ടാഫാക്കിയെയാണ് ലവ്ലീന നേരിടുക. വിജയിക്കുന്ന താരം സ്വര്‍ണമെഡല്‍ പോരാട്ടത്തിലേക്ക് കടക്കും. ഒളിമ്പിക്‌സ്, ലോക ചാമ്പ്യന്‍ഷിപ്പ്, ഏഷ്യന്‍ ഗെയിംസ്, ഏഷ്യന്‍ ചാമ്പ്യന്‍ഷിപ്പ് എന്നിവയില്‍ മെഡലുകള്‍ നേടിയിട്ടുള്ള ലവ്ലീനയുടെ കരിയറില്‍ ഇതുവരെ ലഭിക്കാതെ പോയിരുന്ന പ്രധാന നേട്ടമായിരുന്നു കോമണ്‍വെല്‍ത്ത് ഗെയിംസ് മെഡല്‍. ഗ്ലാസ്‌ഗോയില്‍ ആ കുറവും താരം നികത്തുകയാണ്.
അഞ്ച് താരങ്ങള്‍ മാത്രമാണ് 75 കിലോഗ്രാം വിഭാഗത്തില്‍ മത്സരിക്കുന്നതിനാല്‍ ലവ്ലീനയ്‌ക്കൊപ്പം ടുവാലുവിന്റെ ടാഫാക്കിക്കും ഓസ്‌ട്രേലിയയുടെ എമ്മ-സ്യൂ ഗ്രീന്‍ട്രീക്കും ആദ്യ റൗണ്ടില്‍ ബൈ ലഭിച്ചു. ഇംഗ്ലണ്ടിന്റെ മേരി കേറ്റ് സ്മിത്തും നൈജീരിയയുടെ പട്രീഷ്യ എംബാറ്റയും തമ്മിലുള്ള ഏക ക്വാര്‍ട്ടര്‍ ഫൈനല്‍ വിജയിക്കുന്ന താരമാണ് ഗ്രീന്‍ട്രീയെ സെമിയില്‍ നേരിടുക. 2022-ലെ ബര്‍മിങ്ഹാം കോമണ്‍വെല്‍ത്ത് ഗെയിംസില്‍ ലൈറ്റ് മിഡില്‍വെയ്റ്റ് വിഭാഗത്തില്‍ ക്വാര്‍ട്ടര്‍ ഫൈനലില്‍ പുറത്തായ ലവ്ലീനയ്‌ക്ക് ഇത്തവണ മികച്ച തുടക്കമാണ് ലഭിച്ചിരിക്കുന്നത്.
ഇന്ന് നടക്കുന്ന ഉദ്ഘാടനച്ചടങ്ങില്‍ ഇന്ത്യന്‍ ഭാരോദ്വഹന താരം മീരാബായ് ചാനുവിനൊപ്പം ഇന്ത്യയുടെ പതാകവാഹകയായും ലവ്ലീന എത്തും. ഗ്ലാസ്‌ഗോ ഗെയിംസില്‍ ലവ്ലീനയ്‌ക്ക് പുറമെ ജാസ്മിന്‍ ലംബോറിയ (57 കിലോ), പ്രിയ ഘംഗാസ് (60 കിലോ), പ്രീതി പവാര്‍ (54 കിലോ) ഉള്‍പ്പെടെ എട്ട് ഇന്ത്യന്‍ ബോക്‌സര്‍മാര്‍ക്കും ആദ്യ റൗണ്ടില്‍ ബൈ ലഭിച്ചിട്ടുണ്ട്. ഇവര്‍ക്ക് ഒരു ജയം കൂടി നേടിയാല്‍ മെഡല്‍ ഉറപ്പിക്കാനാകും.
