ന്യൂഡൽഹി: കേന്ദ്ര സർക്കാർ ഉന്നത വിദ്യാഭ്യാസ വകുപ്പിൽ നിർണായക അഴിച്ചുപണി നടത്തി. ഉന്നത വിദ്യാഭ്യാസ സെക്രട്ടറി വിനീത് ജോഷിയെ മാറ്റി പഞ്ചായത്ത് രാജ് സെക്രട്ടറിയായി നിയമിച്ചു. അദ്ദേഹത്തിന് പകരം പശ്ചിമ ബംഗാൾ കേഡറിലെ ഐഎഎസ് ഉദ്യോഗസ്ഥനായ നരേഷ് പാൽ ഗാംഗ്വാറിനെ പുതിയ ഉന്നത വിദ്യാഭ്യാസ സെക്രട്ടറിയായി നിയമിച്ചു.
ബുധനാഴ്ച പുറത്തിറക്കിയ കേന്ദ്രസർക്കാരിന്റെ ഉത്തരവിലാണ് നിയമനമാറ്റം. 1992 ബാച്ച് മണിപ്പൂർ കേഡർ ഐഎഎസ് ഉദ്യോഗസ്ഥനാണ് വിനീത് ജോഷി. 1994 ബാച്ച് പശ്ചിമ ബംഗാൾ കേഡർ ഉദ്യോഗസ്ഥനായ നരേഷ് പാൽ ഗാംഗ്വാർ ഇതുവരെ കേന്ദ്ര മൃഗസംരക്ഷണ-ക്ഷീരവികസന വകുപ്പിന്റെ സെക്രട്ടറിയായിരുന്നു.
നീറ്റ് (NEET) ഉൾപ്പെടെയുള്ള മത്സരപരീക്ഷകളിലെ ചോദ്യപേപ്പർ ചോർച്ച ആരോപണങ്ങളെ തുടർന്ന് വിവാദംപൊട്ടിപ്പുറപ്പെട്ട സാഹചര്യത്തിലാണ് ഈ ഭരണനടപടി.
Photo : Naresh Pal Gangwar
