ന്യൂഡൽഹി: ജന്തർ മന്തറിൽ വനിതാ മാധ്യമപ്രവർത്തകയെ ഡൽഹി പൊലീസ് ഉദ്യോഗസ്ഥൻ അപമാനിക്കുകയും പീഡിപ്പിക്കുകയും ചെയ്യുന്നുവെന്ന തരത്തിൽ പ്രചരിച്ച വൈറൽ ദൃശ്യങ്ങൾ AI ഉപയോഗിച്ച് കൃത്രിമമായി സൃഷ്ടിച്ചതെന്ന് ഡൽഹി പൊലീസ്. സംഭവവുമായി ബന്ധപ്പെട്ട് 24കാരനായ യൂട്യൂബർ നദീം അഹമ്മദിനെ പൊലീസ് അറസ്റ്റ് ചെയ്തു. ഹരിയാന സ്വദേശിയായ ഇയാൾ News Aiyna എന്ന യൂട്യൂബ് ചാനൽ നടത്തിയിരുന്നതായും പൊലീസ് അറിയിച്ചു.
ഒക്ടോബർ മൂന്നിന് ജന്തർ മന്തറിൽ പ്രതിഷേധം റിപ്പോർട്ട് ചെയ്യുന്നതിനിടെ അഡീഷണൽ ഡെപ്യൂട്ടി കമ്മീഷണർ വിവേക് ഭഗത് ലൈംഗികമായി ഉപദ്രവിച്ചെന്ന സ്വതന്ത്ര മാധ്യമപ്രവർത്തക റോസിയുടെ ആരോപണത്തിന് പിന്നാലെയാണ് ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചത്. ദൃശ്യങ്ങളുടെ ആധികാരികത സംബന്ധിച്ച് പൊലീസ് അന്വേഷണം ആരംഭിച്ചിരുന്നു.
ഡൽഹി പൊലീസിന്റെ സോഷ്യൽ മീഡിയ നിരീക്ഷണ വിഭാഗമാണ് ദൃശ്യങ്ങൾ പ്രചരിപ്പിച്ച അക്കൗണ്ട് കണ്ടെത്തിയത്. അന്വേഷണം News Aiyna എന്ന യൂട്യൂബ് ചാനലിലേക്ക് എത്തുകയായിരുന്നു. തുടർന്ന് നടത്തിയ അന്വേഷണത്തിലാണ് നദീം അഹമ്മദിനെ കണ്ടെത്തിയതും അറസ്റ്റ് ചെയ്തതും.
പ്രതിയിൽ നിന്ന് AI നിർമാണവുമായി ബന്ധപ്പെട്ട നിരവധി ഉപകരണങ്ങൾ കണ്ടെത്തിയതായി പൊലീസ് പറഞ്ഞു. ഡൽഹി പൊലീസിനെ മോശമായി ചിത്രീകരിക്കുകയെന്ന ലക്ഷ്യത്തോടെയാണ് AI ഉപയോഗിച്ച് ദൃശ്യങ്ങൾ തയ്യാറാക്കി പ്രചരിപ്പിച്ചതെന്ന് ചോദ്യം ചെയ്യലിൽ ഇയാൾ സമ്മതിച്ചതായും പൊലീസ് അവകാശപ്പെട്ടു.
‘അരാജകത്വം സൃഷ്ടിക്കുകയായിരുന്നു ലക്ഷ്യം’
സമാധാനാന്തരീക്ഷം തകർക്കാനും അരാജകത്വം സൃഷ്ടിക്കാനുമുള്ള ഗൂഢാലോചനയുടെ ഭാഗമായാണ് പ്രതി ദൃശ്യങ്ങൾ തയ്യാറാക്കി സമൂഹമാധ്യമങ്ങളിൽ പ്രചരിപ്പിച്ചത്. സംഭവത്തിൽ കലാപവുമായി ബന്ധപ്പെട്ട വകുപ്പുകളും എഫ്ഐആറിൽ ചേർത്തിട്ടുണ്ട്. പ്രതിക്ക് സാമ്പത്തിക സഹായം ലഭിച്ചിരുന്നോയെന്നും വിദേശബന്ധമുണ്ടോയെന്നും പൊലീസ് അന്വേഷിക്കുന്നുണ്ട്.
താൻ സ്വതന്ത്ര മാധ്യമപ്രവർത്തകനാണെന്നാണ് നദീം സ്വയം പരിചയപ്പെടുത്തിയിരുന്നത്. സാകേതിലെ ഒരു മദ്രസയിൽ പഠിച്ചിരുന്ന ഇയാൾ പത്താം ക്ലാസ് പോലും പൂർത്തിയാക്കിയിട്ടില്ലെന്നും അന്വേഷണ സംഘം വ്യക്തമാക്കി. സംഭവത്തിൽ കൂടുതൽ പേർക്ക് പങ്കുണ്ടോയെന്ന് കണ്ടെത്തുന്നതിനും AI ദൃശ്യങ്ങൾ തയ്യാറാക്കിയതിന്റെയും പ്രചരിപ്പിച്ചതിന്റെയും മുഴുവൻ സാഹചര്യങ്ങളും വ്യക്തമാക്കുന്നതിനുമായി അന്വേഷണം തുടരുകയാണ്.
