ഗ്ലാസ്ഗോ: കോമണ്വെല്ത്ത് ഗെയിംസ് പുരുഷ ലോങ് ജംപില് ഇന്ത്യയുടെ മെഡല് പ്രതീക്ഷയായ മുരളി ശ്രീശങ്കര് തകര്പ്പന് പ്രകടനത്തോടെ ഫൈനലിലേക്ക്. ആദ്യ ശ്രമത്തില് തന്നെ 8.01 മീറ്റര് ചാടി ഓട്ടോമാറ്റിക് യോഗ്യതാ മാര്ക്കായ 8.00 മീറ്റര് മറികടന്ന കേരളത്തിന്റെ അഭിമാന താരം, ഒരു ചാട്ടം മാത്രം മതിയാക്കി ഫൈനല് ഉറപ്പിച്ചു. യോഗ്യത നേടിയതോടെ ശേഷിച്ച ശ്രമങ്ങള് ഒഴിവാക്കി ഊര്ജം ഫൈനലിനായി കരുതിവെക്കുകയും ചെയ്തു.
പുരുഷന്മാരുടെ 100 മീറ്റര് ഹീറ്റ്സില് ഗുരിന്ദര്വീര് സിങ്ങിന്റെ പുറത്താകലിലൂടെ നിരാശയിലായ ഇന്ത്യന് ക്യാമ്പിന് ആശ്വാസമായത് ശ്രീശങ്കറിന്റെ ഈ മിന്നും പ്രകടനമാണ്. പിന്നാലെ ഇന്ത്യയുടെ മറ്റൊരു താരം ലോകേഷ് സത്യനാഥനും 7.77 മീറ്റര് ചാടി ഫൈനലിലേക്ക് യോഗ്യത നേടി. ഇതോടെ ലോങ് ജംപ് ഫൈനലില് ഇന്ത്യക്ക് ഇരട്ട സാന്നിധ്യമായി.
ജൂലൈ 29-ന് നടക്കുന്ന ഫൈനലില് ജമൈക്കയുടെ തജയ് ഗെയ്ല് (യോഗ്യതയില് 8.10 മീറ്റര്) ശ്രീശങ്കറിന്റെ പ്രധാന വെല്ലുവിളിയാകും. സെന്റ് വിന്സെന്റ് ആന്ഡ് ദ ഗ്രനഡൈന്സിന്റെ ഉറോയ് റയാന് (8.04 മീറ്റര്) ശക്തമായ മത്സരാര്ത്ഥിയാണ്. എന്നാല് ഈ സീസണില് 8.38 മീറ്റര് ചാടി ഫീല്ഡിലെ ഏറ്റവും മികച്ച പ്രകടനം സ്വന്തമാക്കിയിരിക്കുന്നത് ശ്രീശങ്കറാണ്.
2022 ബര്മിംഗ്ഹാം കോമണ്വെല്ത്ത് ഗെയിംസില് വെള്ളി മെഡല് നേടിയ ശ്രീശങ്കര്, 2023 ഏഷ്യന് ഗെയിംസിലും വെള്ളി സ്വന്തമാക്കിയിരുന്നു. പാരിസ് ഒളിമ്പിക്സിന് മുന്പ് പരിശീലനത്തിനിടെ ഗുരുതരമായ മുട്ടിനേറ്റ പരിക്ക് താരത്തിന്റെ കരിയറിന് വലിയ തിരിച്ചടിയായി. ശസ്ത്രക്രിയയും നീണ്ട പുനരധിവാസവും കാരണം ഒളിമ്പിക്സ് നഷ്ടമായെങ്കിലും അതിശക്തമായ തിരിച്ചുവരവാണ് താരം നടത്തിയത്.
ഗ്ലാസ്ഗോയിലെ ആദ്യ ചാട്ടം തന്നെ ശ്രീശങ്കര് പൂര്ണ ഫിറ്റാണെന്ന പ്രഖ്യാപനമായി. നാല് വര്ഷം മുമ്പ് നഷ്ടമായ കോമണ്വെല്ത്ത് സ്വര്ണം ഇത്തവണ സ്വന്തമാക്കുകയാണ് ഇന്ത്യന് ലോങ് ജംപ് താരത്തിന്റെ ലക്ഷ്യം.
