തായ്പേയ്: ഇന്ത്യന് ബാഡ്മിന്റണിന്റെ ഭാവി വാഗ്ദാനമെന്ന വിശേഷണം ഒരിക്കല്ക്കൂടി ശരിവച്ച് 17കാരി തന്വി ശര്മ്മ. കരിയറിലെ ആദ്യ ബിഡബ്ല്യുഎഫ് വേള്ഡ് ടൂര് കിരീടം സ്വന്തമാക്കി ഇന്ത്യന് ബാഡ്മിന്റണില് പുതിയ ചരിത്രമാണ് പഞ്ചാബുകാരി കുറിച്ചത്. തായ്പേയ് ഓപ്പണ് സൂപ്പര് 300 വനിതാ സിംഗിള്സ് ഫൈനലില് വിയറ്റ്നാമിന്റെ തുയി ലിന് എന്ഗുയെനെ നേരിട്ടുള്ള ഗെയിമുകള്ക്ക് തോല്പ്പിച്ചാണ് തന്വി കിരീടം ചൂടിയത്. വെറും 36 മിനിറ്റ് മാത്രം നീണ്ട ഫൈനലില് 21-16, 21-16 എന്ന സ്കോറിനായിരുന്നു ഇന്ത്യന് താരത്തിന്റെ ആധികാരിക ജയം.
തുടക്കം മുതല് അവസാന നിമിഷം വരെ മത്സരത്തില് പൂര്ണ നിയന്ത്രണം പുലര്ത്തിയ തന്വി എതിരാളിക്ക് തിരിച്ചുവരാന് അവസരം നല്കിയില്ല. 2008ല് സൈന നെഹ്വാള് തായ്പേയ് ഓപ്പണ് കിരീടം നേടിയതിന് ശേഷം ആദ്യമായാണ് ഒരു ഇന്ത്യന് താരം ഈ നേട്ടം സ്വന്തമാക്കുന്നത്. 18 വര്ഷം നീണ്ട ഇന്ത്യയുടെ കാത്തിരിപ്പിനാണ് തന്വി വിരാമമിട്ടത്. പി.വി. സിന്ധുവിന്റെ മുന് പരിശീലകന് പാര്ക്ക് തായ് സാങിന്റെ കീഴിലാണ് തന്വി നിലവില് പരിശീലനം നടത്തുന്നത്.
കിരീടത്തിനൊപ്പം മറ്റൊരു ചരിത്രനേട്ടവും തന്വി സ്വന്തമാക്കി. 17 വര്ഷവും 222 ദിവസവും പ്രായമുള്ളപ്പോള് തായ്പേയ് ഓപ്പണ് ഫൈനല് കളിക്കുന്ന ചരിത്രത്തിലെ ഏറ്റവും പ്രായം കുറഞ്ഞ താരമായി (പുരുഷ-വനിത വിഭാഗങ്ങള് ഉള്പ്പെടെ) തന്വി മാറി. 2006ല് കൊറിയയുടെ ലീ യോങ് ഡേ സ്ഥാപിച്ച 20 വര്ഷം പഴക്കമുള്ള റെക്കോര്ഡാണ് ഇന്ത്യന് താരം തിരുത്തിയത്. ആദ്യ ഗെയിമില് 10-2ന് മുന്നിലെത്തിയാണ് തന്വി മത്സരം നിയന്ത്രണത്തിലാക്കിയത്. ചില പിഴവുകള് കാരണം എതിരാളി സ്കോര് കുറച്ചെങ്കിലും 21-16ന് ഗെയിം സ്വന്തമാക്കി.
രണ്ടാം ഗെയിമില് 0-3ന് പിന്നിലായ ശേഷവും തിരിച്ചുവന്ന തന്വി അതിവേഗ സ്മാഷുകളും കൃത്യമായ നെറ്റ് ഷോട്ടുകളും കൊണ്ട് ലീഡ് പിടിച്ചെടുത്തു. ഏഴ് മാച്ച് പോയിന്റുകള് നേടിയ താരം നാലാമത്തെ അവസരത്തില് വിജയപോയിന്റ് നേടി കരിയറിലെ ഏറ്റവും വലിയ കിരീടം സ്വന്തമാക്കി. കഴിഞ്ഞ രണ്ട് വര്ഷമായി മികച്ച പ്രകടനമാണ് തന്വി പുറത്തെടുക്കുന്നത്. ജൂനിയര് ലോക ചാമ്പ്യന്ഷിപ്പില് ഒരേ എഡിഷനില് സിംഗിള്സില് വെള്ളിയും ഡബിള്സില് വെങ്കലവും നേടി ചരിത്രം കുറിച്ച താരം, ഏഷ്യന് ടീം ചാമ്പ്യന്ഷിപ്പില് ഇന്ത്യയുടെ സ്വര്ണനേട്ടത്തിലും നിര്ണായക പങ്കുവഹിച്ചു.
2025ല് യുഎസ് ഓപ്പണ് സൂപ്പര് 300, ഒഡിഷ മാസ്റ്റേഴ്സ് സൂപ്പര് 100, ഗുവാഹത്തി മാസ്റ്റേഴ്സ് സൂപ്പര് 100 ടൂര്ണമെന്റുകളില് റണ്ണറപ്പായിരുന്ന തന്വി, ഇപ്പോള് തായ്പേയ് ഓപ്പണ് കിരീടത്തോടെ ലോക ബാഡ്മിന്റണില് തന്റെ വരവ് ഗംഭീരമാക്കി.
