തിരുവനന്തപുരം: സംസ്ഥാനത്ത് പെയ്ത അതിതീവ്ര മഴയില് കെഎസ്ഇബിയുടെ വൈദ്യുതി വിതരണ ശൃംഖലയ്ക്ക് വന്നാശം. പ്രാഥമിക കണക്കുകള് പ്രകാരം 25.43 കോടി രൂപയുടെ നഷ്ടമാണ് ഉണ്ടായിരിക്കുന്നതെന്ന് കെഎസ്ഇബി അറിയിച്ചു. തിങ്കളാഴ്ച വൈകിട്ട് നാല് മണിവരെയുള്ള കണക്കനുസരിച്ച് 2,892 ട്രാന്സ്ഫോര്മറുകളെ മഴക്കെടുതി ബാധിച്ചു. ഇതോടെ 6,56,770 ഉപഭോക്താക്കള്ക്ക് വൈദ്യുതി വിതരണം തടസ്സപ്പെട്ടു.
349 ഹൈടെന്ഷന് പോസ്റ്റുകളും 2,599 ലോടെന്ഷന് പോസ്റ്റുകളും തകര്ന്നു. കൂടാതെ 248 ഇടങ്ങളില് ഹൈടെന്ഷന് ലൈനുകളും 7,212 ഇടങ്ങളില് ലോടെന്ഷന് ലൈനുകളും പൊട്ടിവീണു. മഴയെ തുടര്ന്ന് 233 ട്രാന്സ്ഫോര്മറുകള് പൂര്ണമായും വെള്ളത്തിനടിയിലായി. നിലവില് 63,676 ഉപഭോക്താക്കള്ക്ക് വൈദ്യുതി വിതരണം പുനഃസ്ഥാപിക്കാനുണ്ട്.
സംസ്ഥാന വ്യാപകമായി വൈദ്യുതി തകരാറുകള് പരിഹരിക്കാനുള്ള പ്രവര്ത്തനങ്ങള് ഊര്ജിതമായി തുടരുകയാണെന്ന് കെഎസ്ഇബി അറിയിച്ചു. കണ്ണൂര്, പത്തനംതിട്ട ജില്ലകളിലാണ് വൈദ്യുതി തടസ്സം ഏറ്റവും കൂടുതല് റിപ്പോര്ട്ട് ചെയ്തിരിക്കുന്നത്. വെള്ളപ്പൊക്ക ബാധിത പ്രദേശങ്ങളിലാണ് തകരാറുകള് കൂടുതലായുള്ളത്.
വെള്ളം പൂര്ണമായും ഇറങ്ങിയ ശേഷവും സുരക്ഷാ മാനദണ്ഡങ്ങള് പാലിച്ചുമാത്രമേ വൈദ്യുതി പുനഃസ്ഥാപിക്കാന് കഴിയൂവെന്ന് കെഎസ്ഇബി വ്യക്തമാക്കി. പുനഃസ്ഥാപന പ്രവര്ത്തനങ്ങള് കൂടുതല് കാര്യക്ഷമമാക്കുന്നതിനായി സര്ക്കിള് തലത്തില് പ്രത്യേക കണ്ട്രോള് റൂമുകള് പ്രവര്ത്തനം ആരംഭിച്ചിട്ടുണ്ട്. വൈദ്യുതി വിതരണം പൂര്ണമായി സാധാരണ നിലയിലാക്കാന് ഉപഭോക്താക്കളുടെ സഹകരണവും കെഎസ്ഇബി അഭ്യര്ഥിച്ചു.
