ചണ്ഡീഗഢ്: ഇന്ത്യന് ക്രിക്കറ്റ് താരം രമണ്ദീപ് സിങ്ങും ടെലിവിഷന് താരം ചാര്ലി ചൗഹാനും വിവാഹിതരായി. എട്ട് വര്ഷത്തെ പരിചയത്തിനും പ്രണയത്തിനും ശേഷമാണ് ഇരുവരും വിവാഹിതരായത്. സിഖ് ആചാരപ്രകാരമായിരുന്നു വിവാഹച്ചടങ്ങുകള്. ലളിതമായ ചടങ്ങില് അടുത്ത ബന്ധുക്കളും സുഹൃത്തുക്കളും ക്രിക്കറ്റ്, ടെലിവിഷന് രംഗത്തെ പ്രമുഖരും മാത്രമാണ് പങ്കെടുത്തത്.
വിവാഹത്തിന്റെ ചിത്രങ്ങള് സമൂഹമാധ്യമങ്ങളില് പങ്കുവച്ചത് രമണ്ദീപും ചാര്ലി ചൗഹാനും തന്നെയാണ്. ചിത്രങ്ങള് പുറത്തുവന്നതോടെ ആരാധകരും സഹതാരങ്ങളും ഇരുവര്ക്കും ആശംസകളുമായി രംഗത്തെത്തി. ഇന്ത്യന് പേസര് അര്ഷ്ദീപ് സിങ്, മുംബൈ ഇന്ത്യന്സിന്റെ താരങ്ങളായ നമന് ധിര്, അശ്വനി കുമാര്, പഞ്ചാബ് താരം ജസീന്ദര് സിങ് എന്നിവര് വിവാഹാഘോഷങ്ങളില് പങ്കെടുത്തു. ഇന്ത്യന് ക്യാപ്റ്റന് ശുഭ്മാന് ഗില്, അഭിഷേക് ശര്മ, രവിചന്ദ്രന് അശ്വിന് തുടങ്ങിയവരും രമണ്ദീപിന് ആശംസകള് നേര്ന്നു.
ആഭ്യന്തര ക്രിക്കറ്റില് പഞ്ചാബിനായി കളിക്കുന്ന രമണ്ദീപ് സിങ് 2024ല് ഐപിഎല് കിരീടം നേടിയ കൊല്ക്കത്ത നൈറ്റ് റൈഡേഴ്സ് ടീമിലെ അംഗമായിരുന്നു. 2024 നവംബറില് ദക്ഷിണാഫ്രിക്കയ്ക്കെതിരെയാണ് ഇന്ത്യക്കായി ടി20 അന്താരാഷ്ട്ര ക്രിക്കറ്റില് അരങ്ങേറ്റം കുറിച്ചത്. ഇന്ത്യന് ജഴ്സിയില് ഇതുവരെ രണ്ട് ടി20 മത്സരങ്ങളാണ് താരം കളിച്ചത്.
‘കൈസി യേ യാരിയാന്’, ‘ബെസ്റ്റ് ഫ്രണ്ട്സ് ഫോര്എവര്’, ‘പ്യാര് തൂനെ ക്യാ കിയാ’, ‘നാച്ച് ബലിയേ 5’ തുടങ്ങിയ ടെലിവിഷന് പരമ്പരകളിലൂടെയും റിയാലിറ്റി ഷോകളിലൂടെയും ചാര്ലി ചൗഹാന് ശ്രദ്ധ നേടിയിട്ടുണ്ട്. എംടിവി റോഡീസിലും താരം പങ്കെടുത്തിരുന്നു. വിവാഹച്ചടങ്ങില് ക്രിക്കറ്റ് താരങ്ങള്ക്കും ടെലിവിഷന് താരങ്ങള്ക്കുമൊപ്പം അടുത്ത സുഹൃത്തുക്കളും കുടുംബാംഗങ്ങളും മാത്രമാണ് പങ്കെടുത്തത്.