തൃശൂർ: ചിങ്ങമാസത്തിലെ ആദ്യ ഞായറാഴ്ച ഗുരുവായൂർ ക്ഷേത്രത്തിൽ റെക്കോർഡ് വിവാഹങ്ങൾ. ഈ മാസം 23ന് ഗുരുവായൂർ ക്ഷേത്രത്തിൽ ഇതുവരെ 377 വിവാഹങ്ങളാണ് ബുക്ക് ചെയ്തിരിക്കുന്നത്. നിലവിലുള്ള കണക്കുകളെ മറികടക്കുന്ന ബുക്കിംഗാണിത്. വിവാഹദിവസത്തിലേക്ക് ഇനിയും ദിവസങ്ങൾ ബാക്കിയുള്ളതിനാൽ ബുക്കിംഗ് ഇനിയും ഉയരാൻ സാധ്യതയുണ്ടെന്നാണ് ക്ഷേത്രം അധികൃതരുടെ വിലയിരുത്തൽ. അങ്ങനെയെങ്കിൽ വിവാഹങ്ങളുടെ എണ്ണം 400ലേക്ക് എത്തുമെന്നാണ് പ്രതീക്ഷ.
2024 സെപ്തംബറിൽ ഗുരുവായൂർ ക്ഷേത്രത്തിൽ നടന്ന 334 വിവാഹങ്ങളാണ് നിലവിലെ റെക്കോർഡ്. അന്ന് 350ലേറെ വിവാഹങ്ങൾ ബുക്ക് ചെയ്തിരുന്നെങ്കിലും നടന്നത് 334 വിവാഹങ്ങളായിരുന്നു. ഇത്തവണ 377 വിവാഹങ്ങൾ ഇതിനോടകം ബുക്ക് ചെയ്തതോടെ പുതിയ റെക്കോർഡ് പിറക്കാനുള്ള സാധ്യതയാണ് മുന്നിലുള്ളത്. വലിയ തിരക്ക് പ്രതീക്ഷിക്കുന്ന സാഹചര്യത്തിൽ വിവാഹച്ചടങ്ങുകൾ സുഗമമായി നടത്തുന്നതിനുള്ള ക്രമീകരണങ്ങൾ ദേവസ്വം ബോർഡ് ആരംഭിച്ചിട്ടുണ്ട്.
സ്ഥിരം വിവാഹ മണ്ഡപവും ഒരുങ്ങുന്നു
വിവാഹങ്ങളുടെ എണ്ണം വർധിക്കുന്ന സാഹചര്യത്തിൽ സ്ഥിരമായി ഉപയോഗിക്കാവുന്ന പുതിയ വിവാഹ മണ്ഡപവും ഗുരുവായൂരിൽ ഒരുങ്ങുന്നുണ്ട്. ചെന്നൈ സ്വദേശിയായ ഒരു ഭക്തനാണ് മണ്ഡപം വഴിപാടായി സമർപ്പിക്കുന്നത്. കോതച്ചിറ സ്വദേശിയായ ശിൽപി സുധിൽ കുമാറിന്റെ നേതൃത്വത്തിലാണ് പുതിയ മണ്ഡപത്തിന്റെ നിർമാണം. നിലവിൽ ക്ഷേത്രത്തിൽ നാല് വിവാഹ മണ്ഡപങ്ങളാണുള്ളത്.
വിവാഹങ്ങളുടെ എണ്ണം 200 കടക്കുന്ന ദിവസങ്ങളിൽ അധിക തിരക്ക് ഒഴിവാക്കുന്നതിനായി നിലവിൽ താത്കാലികമായി മറ്റൊരു മണ്ഡപം കൂടി സജ്ജീകരിക്കാറുണ്ട്. എന്നാൽ ഇത്തവണ നിർമിക്കുന്ന മണ്ഡപം സ്ഥിരമായി ഉപയോഗിക്കാവുന്ന തരത്തിലുള്ളതായിരിക്കും.
