തിരുവനന്തപുരം: കേരളത്തിന്റെ തനത് സാംസ്കാരിക പൈതൃകവും ഉത്സവങ്ങളും കൂടുതൽ പ്രചാരത്തിലാക്കുന്നതിന്റെ ഭാഗമായി സംസ്ഥാനത്തെ പ്രമുഖ വള്ളംകളികൾക്കും പുലിക്കളിക്കും കേന്ദ്ര ടൂറിസം മന്ത്രാലയത്തിന്റെ സാമ്പത്തിക സഹായം. വിവിധ പരിപാടികൾക്കായി ആകെ 80 ലക്ഷം രൂപയുടെ ധനസഹായം അനുവദിച്ചതായി കേന്ദ്ര സഹമന്ത്രി സുരേഷ് ഗോപി അറിയിച്ചു.
കേരളത്തിന്റെ സാംസ്കാരിക പൈതൃകത്തിന്റെ നെടുംതൂണായ വള്ളംകളികളും ഉത്സവങ്ങളും ലോകത്തിന് മുന്നിൽ കൂടുതൽ തിളക്കത്തോടെ അവതരിപ്പിക്കുകയാണ് ലക്ഷ്യമെന്ന് സുരേഷ് ഗോപി വ്യക്തമാക്കി. കേരളത്തിന്റെ തനത് ആഘോഷങ്ങൾക്ക് കേന്ദ്രസർക്കാരിന്റെ ശക്തമായ പിന്തുണ ഉറപ്പാക്കിയതായും അദ്ദേഹം പറഞ്ഞു.
കേന്ദ്ര ടൂറിസം മന്ത്രാലയത്തിന്റെ സാമ്പത്തിക സഹായം ലഭിക്കുന്ന പ്രധാന പരിപാടികൾ:
നെഹ്റു ട്രോഫി വള്ളംകളി – ആഗസ്റ്റ് 22, 2026: ₹20 ലക്ഷം
പുലിക്കളി – ആഗസ്റ്റ് 29, 2026: ₹25 ലക്ഷം
ആറന്മുള ഉത്തൃട്ടാതി വള്ളംകളി – ആഗസ്റ്റ് 30, 2026: ₹20 ലക്ഷം
പ്രസിഡന്റ്സ് ട്രോഫി വള്ളംകളി – നവംബർ 1, 2026: ₹15 ലക്ഷം
കേരളത്തിന്റെ ടൂറിസം മേഖലയ്ക്കും പാരമ്പര്യ ഉത്സവങ്ങൾക്കും കൂടുതൽ കരുത്തുപകരുന്നതാണ് കേന്ദ്രസർക്കാരിന്റെ ധനസഹായമെന്ന് സുരേഷ് ഗോപി പറഞ്ഞു. “നമ്മുടെ പെരുമ ലോകമെങ്ങും മുഴങ്ങിക്കേൾക്കണം. നമ്മുടെ സംസ്കാരത്തെയും ആഘോഷങ്ങളെയും കൈപിടിച്ചുയർത്താൻ കേന്ദ്രസർക്കാരുണ്ട്. ഒത്തൊരുമിച്ച് ആഘോഷിക്കാം, നമ്മുടെ തനിമയെ ലോകത്തിന് മുന്നിൽ ഉയർത്തിപ്പിടിക്കാം,” സുരേഷ് ഗോപി വ്യക്തമാക്കി.
