കൊച്ചി: ഓപ്പറേഷന് തൂഫാന്റെ ഭാഗമായി നടത്തിയ പരിശോധനയില് സൗത്ത് വാഴക്കുളത്ത് 20 ലക്ഷം രൂപ വിലവരുന്ന 65 ഗ്രാം ഹെറോയിനുമായി യുവതി ഉള്പ്പെടെ മൂന്ന് ഇതര സംസ്ഥാന തൊഴിലാളികളെ പൊലീസ് പിടികൂടി. അസം നൗഗാവ് സ്വദേശികളായ ബഹാറുല് ഇസ്ലാം (26), മുക്സിദുല് ഇസ്ലാം (33), രശ്മി കാത്തൂന് (21) എന്നിവരാണ് പിടിയിലായത്. പെരുമ്പാവൂര് എസ്പിയുടെ നേതൃത്വത്തിലുള്ള അന്വേഷണ സംഘവും തടിയിട്ടപറമ്പ് പൊലീസും ചേര്ന്നാണ് പ്രതികളെ പിടികൂടിയത്.
അസമില്നിന്ന് ട്രെയിന് മാര്ഗം ആലുവയിലെത്തിയ സംഘം ഓട്ടോയില് പെരുമ്പാവൂരിലേക്ക് പോകുന്നതിനിടെ സൗത്ത് വാഴക്കുളം ഭാഗത്തുവച്ചാണ് പിടിയിലായത്. രഹസ്യവിവരത്തിന്റെ അടിസ്ഥാനത്തില് പ്രതികള് കുറച്ചുനാളായി അന്വേഷണ സംഘത്തിന്റെ നിരീക്ഷണത്തിലായിരുന്നു. ബാഗില് വസ്ത്രങ്ങള്ക്കിടയില് അഞ്ച് സോപ്പുപെട്ടികളിലായാണ് ഹെറോയിന് ഒളിപ്പിച്ചിരുന്നത്.
ലഹരിമരുന്ന് വില്പ്പന നടത്തിയതിന് പിന്നാലെ അടുത്ത ദിവസം തന്നെ അസമിലേക്ക് മടങ്ങുന്നതായിരുന്നു സംഘത്തിന്റെ രീതിയെന്ന് പൊലീസ് പറഞ്ഞു. ഇടയ്ക്കിടെ കേരളത്തിലെത്താറുണ്ടെന്നും പ്രതികള് പൊലീസിനോട് സമ്മതിച്ചതായാണ് വിവരം. പ്രതികളില്നിന്ന് ലഹരിമരുന്ന് വാങ്ങിയിരുന്നവരെക്കുറിച്ചും പൊലീസ് അന്വേഷണം ആരംഭിച്ചിട്ടുണ്ട്.
