തിരുവനന്തപുരം: ശ്രീചിത്ര പുവർ ഹോമിൽ നിന്ന് രണ്ട് പെൺകുട്ടികളെ കാണാതായി. കിളിമാനൂർ, പേട്ട സ്വദേശിനികളായ 14 വയസും 16 വയസുമുള്ള പെൺകുട്ടികളാണ് വ്യാഴാഴ്ച വൈകിട്ട് സ്ഥാപനത്തിൽ നിന്ന് പുറത്തുപോയതിന് പിന്നാലെ തിരിച്ചെത്താതിരുന്നത്.
വൈകിട്ടോടെ പുറത്തേക്ക് പോയ പെൺകുട്ടികൾ ഏറെ സമയം കഴിഞ്ഞിട്ടും മടങ്ങിയെത്താതായതോടെയാണ് അധികൃതർ പൊലീസിൽ വിവരം അറിയിച്ചത്. തുടർന്ന് വഞ്ചിയൂർ പൊലീസ് കേസെടുത്ത് അന്വേഷണം ആരംഭിച്ചു.
പെൺകുട്ടികൾ എവിടേക്കാണ് പോയതെന്നതിനെക്കുറിച്ച് നിലവിൽ വ്യക്തതയില്ല. ഇവർ സ്ഥാപനത്തിൽ നിന്ന് പുറത്തുപോയതിന് ശേഷമുള്ള നീക്കങ്ങൾ കണ്ടെത്തുന്നതിനായി സിസിടിവി ദൃശ്യങ്ങൾ കേന്ദ്രീകരിച്ചാണ് പൊലീസ് അന്വേഷണം നടത്തുന്നത്.
പെൺകുട്ടികൾ പുവർ ഹോമിൽ നിന്ന് പുറത്തുപോകാനുള്ള കാരണം സംബന്ധിച്ചും അധികൃതർക്ക് വ്യക്തമായ വിവരങ്ങൾ ലഭിച്ചിട്ടില്ല. സംഭവത്തിൽ കൂടുതൽ വിവരങ്ങൾ ശേഖരിച്ചുവരികയാണെന്ന് പൊലീസ് അറിയിച്ചു.
