കൊച്ചി: മുട്ടിൽ മരംമുറിക്കേസുമായി ബന്ധപ്പെട്ട വഞ്ചനാക്കേസിലെ വിചാരണ നടപടികൾ സ്റ്റേ ചെയ്യണമെന്ന അഗസ്റ്റിൻ സഹോദരന്മാരുടെ ആവശ്യം ഹൈക്കോടതി തള്ളി. വിചാരണക്കോടതിയെ സമീപിക്കാനാണ് ഹൈക്കോടതി നിർദേശം നൽകിയത്.
മുട്ടിൽ മരംമുറിക്കേസിലെ നടപടികൾ വയനാട്ടിലെ വിചാരണക്കോടതിയിൽ നടക്കുന്നതിനാൽ, മരംമുറിയുമായി ബന്ധപ്പെട്ട വഞ്ചനാക്കേസിൽ ചോറ്റാനിക്കര മജിസ്ട്രേറ്റ് കോടതിയിലെ നടപടികൾ നിർത്തിവയ്ക്കണമെന്നായിരുന്നു റോജി അഗസ്റ്റിൻ, ആന്റോ അഗസ്റ്റിൻ, ജോസ് കുട്ടി അഗസ്റ്റിൻ എന്നിവരുടെ ആവശ്യം.
എന്നാൽ ഈ ആവശ്യം ഹൈക്കോടതി അംഗീകരിച്ചില്ല. വിചാരണക്കോടതിയെ സമീപിക്കാനാണ് നിർദേശിച്ചത്. അതേസമയം, വഞ്ചനാക്കേസിൽ കുറ്റങ്ങൾ വായിച്ചുകേൾപ്പിക്കുന്ന നടപടിയുടെ ഭാഗമായി ഇന്ന് കോടതിയിൽ ഹാജരാകണമെന്ന നിർദേശം ആന്റോ അഗസ്റ്റിനും ജോസ് കുട്ടി അഗസ്റ്റിനും പാലിച്ചില്ല.
റോജി അഗസ്റ്റിൻ മാത്രമാണ് ചോറ്റാനിക്കര മജിസ്ട്രേറ്റ് കോടതിയിൽ ഹാജരായത്. മറ്റുള്ളവർ എവിടെയെന്ന് കോടതി റോജിയോട് ചോദിച്ചു. ഇതിന് പിന്നാലെ ‘ആളെ കളിപ്പിക്കുകയാണോ’ എന്ന തരത്തിൽ മജിസ്ട്രേറ്റ് രൂക്ഷമായി പ്രതികരിക്കുകയും ചെയ്തു.
ചോറ്റാനിക്കര മജിസ്ട്രേറ്റ് കോടതിയുടെ പരിധിയിൽ ഈ വഞ്ചനാക്കേസ് നിലനിൽക്കില്ലെന്ന വാദവും അഗസ്റ്റിൻ സഹോദരന്മാർ ഉന്നയിച്ചിരുന്നു. എന്നാൽ കേസ് പരിഗണിക്കാൻ കോടതിക്ക് അധികാരമുണ്ടെന്ന് ചോറ്റാനിക്കര മജിസ്ട്രേറ്റ് വ്യക്തമാക്കി. ഇക്കാര്യത്തിൽ വിശദമായ ഉത്തരവ് വെള്ളിയാഴ്ച പുറപ്പെടുവിക്കുമെന്ന് കോടതി അറിയിച്ചു.
അതേസമയം, വിചാരണ നടപടികളുടെ ഭാഗമായി വീഡിയോ കോൺഫറൻസിലൂടെ ഹാജരാകാൻ അനുവദിക്കണമെന്ന അഗസ്റ്റിൻ സഹോദരന്മാരുടെ അപേക്ഷയിലും ചോറ്റാനിക്കര മജിസ്ട്രേറ്റ് കോടതി വെള്ളിയാഴ്ച തീരുമാനം എടുക്കും.
മുട്ടിൽ മരംമുറിക്കേസ് ഉൾപ്പെടെ സംസ്ഥാനത്ത് ഏറെ ചർച്ചയായ വിഷയത്തിൽ പ്രതികൾക്കെതിരായ വിവിധ നിയമനടപടികൾ തുടരുന്നതിനിടെയാണ് വഞ്ചനാക്കേസിലെ വിചാരണ തടയണമെന്ന ആവശ്യം ഹൈക്കോടതി തള്ളിയത്. ഇതോടെ ചോറ്റാനിക്കര മജിസ്ട്രേറ്റ് കോടതിയിലെ നടപടികൾ തുടരുന്നതിനുള്ള സാഹചര്യമാണുള്ളത്.
