വിശാഖപട്ടണം: യുവാക്കളിലേക്കും വിദ്യാർഥികളിലേക്കും മയക്കുമരുന്ന് എത്തുന്ന സാഹചര്യം വർധിക്കുന്നതിൽ ആശങ്ക രേഖപ്പെടുത്തി ഗുഡിലോവയിൽ സമാപിച്ച ആർഎസ്എസ് സമന്വയ ബൈഠക്. ലഹരിമുക്ത സമൂഹം സൃഷ്ടിക്കാനുള്ള ഉത്തരവാദിത്വം സർക്കാരിനും പോലീസിനും മാത്രമായി പരിമിതപ്പെടുത്താനാകില്ലെന്നും സമൂഹത്തിലെ വിവിധ വിഭാഗങ്ങളുടെ ഏകോപിത ഇടപെടൽ അനിവാര്യമാണെന്നും യോഗം ചൂണ്ടിക്കാട്ടി.
വിദ്യാഭ്യാസ സ്ഥാപനങ്ങൾ, രക്ഷിതാക്കൾ, സാമൂഹിക സംഘടനകൾ, ഭരണകൂടം, പോലീസ് തുടങ്ങിയവയെ ഒരുമിച്ച് ഉൾപ്പെടുത്തി ശക്തമായ ബോധവത്കരണവും പ്രതിരോധ പ്രവർത്തനങ്ങളും ആവിഷ്കരിക്കേണ്ടതുണ്ടെന്നാണ് യോഗത്തിന്റെ വിലയിരുത്തൽ. പ്രത്യേകിച്ച് വിദ്യാർഥികളെയും യുവാക്കളെയും ലക്ഷ്യമിട്ട് ലഹരി വ്യാപനം നടക്കുന്നത് സമൂഹത്തിന്റെ ഭാവിയെ തന്നെ ബാധിക്കുന്ന വിഷയമാണെന്നും യോഗം അഭിപ്രായപ്പെട്ടു.
പ്രകൃതിദുരന്തങ്ങളിലെ സേവനപ്രവർത്തനങ്ങളും അവലോകനം ചെയ്തു
പ്രകൃതിദുരന്തങ്ങൾ നേരിട്ട മേഖലകളിൽ ആർഎസ്എസ് നടത്തിയ സേവന-പുനരധിവാസ പ്രവർത്തനങ്ങളും സമന്വയ ബൈഠക്കിൽ അവലോകനം ചെയ്തു. ദുരന്തബാധിതർക്ക് അടിയന്തര സഹായം നൽകുന്നതിന് പുറമെ പുനരധിവാസ പ്രവർത്തനങ്ങളിൽ സമൂഹത്തിന്റെ പങ്കാളിത്തം ശക്തമാക്കേണ്ടതിന്റെ ആവശ്യകതയും ചർച്ചയായി.
സന്ത് രവിദാസിന്റെ 650-ാം ജന്മവാർഷികത്തോടനുബന്ധിച്ച് രാജ്യത്തിന്റെ വിവിധ ഭാഗങ്ങളിൽ സംഘടിപ്പിച്ച പരിപാടികളും തുടർപ്രവർത്തനങ്ങളും യോഗത്തിൽ വിലയിരുത്തി.
കുടുംബവും മൂല്യങ്ങളും ശക്തിപ്പെടുത്തണം
സംഘ ശതാബ്ദിയോടനുബന്ധിച്ച് മുന്നോട്ടുവച്ച പഞ്ചപരിവർത്തനത്തിന്റെ വിവിധ വശങ്ങളും യോഗം ചർച്ച ചെയ്തു. ഭാരതീയ കുടുംബവ്യവസ്ഥയും കുടുംബമൂല്യങ്ങളും സാംസ്കാരിക പാരമ്പര്യങ്ങളും അടുത്ത തലമുറയിലേക്ക് കൂടുതൽ ശക്തമായി കൈമാറേണ്ടതിന്റെ ആവശ്യകത യോഗത്തിൽ ഉയർന്നു.
പരിസ്ഥിതി സംരക്ഷണത്തിലും വ്യക്തികളുടെ ദൈനംദിന ജീവിതത്തിൽ തന്നെ മാറ്റങ്ങൾ കൊണ്ടുവരണമെന്ന് സമന്വയ ബൈഠക് അഭിപ്രായപ്പെട്ടു. പ്രമേയങ്ങൾ പാസാക്കുന്നതിൽ മാത്രം ഒതുങ്ങാതെ ജലത്തിന്റെ വിവേകപൂർവമായ ഉപയോഗം, പ്ലാസ്റ്റിക് ഉപയോഗം കുറയ്ക്കൽ, പച്ചപ്പ് വർധിപ്പിക്കൽ തുടങ്ങിയ ശീലങ്ങൾ ജീവിതത്തിന്റെ ഭാഗമാക്കണമെന്നും യോഗം നിർദേശിച്ചു.
എഐയുടെ സ്വാധീനവും ചർച്ചയായി
സമൂഹത്തിൽ ആർട്ടിഫിഷ്യൽ ഇന്റലിജൻസിന്റെ വർധിച്ചുവരുന്ന സ്വാധീനവും സമന്വയ ബൈഠക്കിൽ ചർച്ചയായി. സഹസർകാര്യവാഹ് സി. ആർ. മുകുന്ദ വാർത്താസമ്മേളനത്തിലാണ് ഇക്കാര്യം വ്യക്തമാക്കിയത്.
സമൂഹത്തിന്റെ പ്രയോജനത്തിനായി എഐ ഉൾപ്പെടെയുള്ള സാങ്കേതികവിദ്യകൾ എങ്ങനെ ഫലപ്രദമായി ഉപയോഗിക്കാമെന്നും അതിന്റെ പ്രതികൂല ഫലങ്ങളെക്കുറിച്ച് പൊതുസമൂഹത്തെ എങ്ങനെ ബോധവത്കരിക്കാമെന്നും സംബന്ധിച്ച് തുടർന്നും ചർച്ചകളും പ്രവർത്തനങ്ങളും നടത്തുമെന്ന് അദ്ദേഹം പറഞ്ഞു.
ലഹരിവിരുദ്ധ പോരാട്ടം മുതൽ കുടുംബമൂല്യങ്ങളും പരിസ്ഥിതി സംരക്ഷണവും പുതിയ സാങ്കേതികവിദ്യയുടെ സ്വാധീനവും വരെ—സമൂഹജീവിതത്തെ നേരിട്ട് ബാധിക്കുന്ന വിവിധ വിഷയങ്ങളാണ് ഗുഡിലോവയിലെ സമന്വയ ബൈഠക്കിൽ പ്രധാനമായും ചർച്ചയായത്.
