കൊളംബോ: ശ്രീലങ്കയ്ക്കെതിരായ രണ്ടാം ടെസ്റ്റിന്റെ ആദ്യ ദിനത്തിലെ സംഭവത്തില് ഇന്ത്യന് താരം യശസ്വി ജയ്സ്വാളിനും ശ്രീലങ്കന് പേസര് അസിത ഫെര്ണാണ്ടോയ്ക്കും ഐസിസിയുടെ നടപടി. ഇരുവര്ക്കും മത്സരഫീസിന്റെ 25 ശതമാനം പിഴ ചുമത്തുകയും ഓരോ ഡീമെറിറ്റ് പോയിന്റ് വീതം നല്കുകയും ചെയ്തു. ഐസിസി പെരുമാറ്റച്ചട്ടത്തിലെ ആര്ട്ടിക്കിള് 2.12 ലംഘിച്ചതിനാണ് നടപടി. അന്താരാഷ്ട്ര മത്സരത്തിനിടെ താരങ്ങള്, സപ്പോര്ട്ട് സ്റ്റാഫ്, അമ്പയര്, മാച്ച് റഫറി തുടങ്ങിയവരുമായി അനുചിതമായ ശാരീരിക സമ്പര്ക്കം പുലര്ത്തുന്നത് ഈ നിയമത്തിന്റെ പരിധിയില് വരും.
ഇന്ത്യയുടെ ഇന്നിങ്സിലെ 17-ാം ഓവറിലാണ് സംഭവമുണ്ടായത്. ജയ്സ്വാളിനെ അസിത ഫെര്ണാണ്ടോ പുറത്താക്കിയതിന് പിന്നാലെ ഇരുവരും തമ്മില് വാക്കുതര്ക്കമുണ്ടായി. ഫെര്ണാണ്ടോ ജയ്സ്വാളിന് നേരെ തല അടുപ്പിച്ചതിന് പിന്നാലെ ജയ്സ്വാളും മുന്നോട്ടേക്ക് നീങ്ങിയതോടെ ഇരുവരുടെയും തലകള് തമ്മില് കൂട്ടിയിടിക്കുകയായിരുന്നു. സംഭവത്തില് ഇരുവരും കുറ്റം സമ്മതിക്കുകയും ഐസിസി എലൈറ്റ് പാനല് മാച്ച് റഫറി ആന്ഡി പൈക്രോഫ്റ്റ് നിര്ദേശിച്ച ശിക്ഷ അംഗീകരിക്കുകയും ചെയ്തു.
അതിനാല് ഔപചാരിക ഹിയറിങ് ആവശ്യമായി വന്നില്ല. കഴിഞ്ഞ 24 മാസത്തിനിടെ ഇരുവര്ക്കുമെതിരെ സമാനമായ കുറ്റങ്ങളൊന്നും റിപ്പോര്ട്ട് ചെയ്തിട്ടില്ല. എന്നിരുന്നാലും സംഭവത്തിന്റെ ഗൗരവം കണക്കിലെടുത്താണ് പിഴയും ഡീമെറിറ്റ് പോയിന്റും നല്കിയത്. അതേസമയം, കൊളംബോയില് നടക്കുന്ന രണ്ടാം ടെസ്റ്റില് ഇന്ത്യ ശക്തമായ നിലയിലാണ്. ധ്രുവ് ജുറെലിന്റെ പുറത്താകാത്ത സെഞ്ചുറിയുടെ മികവില് ഇന്ത്യ 503/9 എന്ന നിലയില് ഒന്നാം ഇന്നിങ്സ് ഡിക്ലയര് ചെയ്തു. രണ്ടാം ദിനത്തിലെ അവസാന സെഷനില് മഴയെ തുടര്ന്ന് കളി തടസ്സപ്പെട്ടിരിക്കുകയാണ്.
