മലപ്പുറം: പൊട്ടിവീണ വൈദ്യുതി കമ്പിയിൽ നിന്ന് ഷോക്കേറ്റ് വീട്ടമ്മ മരിച്ചു. കരുവാരക്കുണ്ട് കൽക്കുണ്ട് സ്വദേശി പ്രവിതയാണ് മരിച്ചത്. വീടിനോട് ചേർന്ന പറമ്പിൽ പശുവിന് പുല്ലരിയാൻ പോയപ്പോഴായിരുന്നു ദാരുണ അപകടം.
രാവിലെ പറമ്പിലെത്തിയ പ്രവിത പൊട്ടിവീണ വൈദ്യുതി കമ്പിയുമായി സമ്പർക്കത്തിലായതിനെ തുടർന്ന് ഷോക്കേൽക്കുകയായിരുന്നു. അപകടത്തിൽ ഗുരുതരമായി പരിക്കേറ്റ വീട്ടമ്മയെ ഉടൻ മഞ്ചേരി മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
വീടിന് സമീപത്തെ പറമ്പിൽ വൈദ്യുതി കമ്പി പൊട്ടിവീണതാണ് അപകടത്തിന് കാരണമായത്. സംഭവത്തിൽ കൂടുതൽ വിവരങ്ങൾ ലഭ്യമായിട്ടില്ല.
