തിരുവനന്തപുരം: രണ്ടുദിവസത്തെ സന്ദർശനത്തിനായി ഉപരാഷ്‌ട്രപതി സി.പി. രാധാകൃഷ്ണൻ ഇന്ന് കേരളത്തിലെത്തും. ഉച്ചയ്‌ക്ക് 12.30ന് കൊച്ചിയിലെത്തുന്ന ഉപരാഷ്‌ട്രപതി ഹെലികോപ്റ്ററിൽ ആലപ്പുഴയിലേക്ക് പോകും. തുടർന്ന് വിവിധ പരിപാടികളിൽ പങ്കെടുക്കും.
ആലപ്പുഴയിലെ ലിയോ തേർട്ടീന്ത് എച്ച്എസ്എസ് ഓഡിറ്റോറിയത്തിൽ നടക്കുന്ന കേരളകൗമുദിയുടെ 115-ാം വാർഷികാഘോഷവും പത്മഭൂഷൺ ലഭിച്ച എസ്‌എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനുള്ള ആദരവും ഉപരാഷ്‌ട്രപതി ഉദ്ഘാടനം ചെയ്യും. ചടങ്ങിൽ വെള്ളാപ്പള്ളി നടേശനെ ഉപരാഷ്‌ട്രപതി ആദരിക്കും. ഗവർണർ രാജേന്ദ്ര വിശ്വനാഥ് ആർലേക്കർ മുഖ്യാതിഥിയാകും.
തുടർന്ന് ഉച്ചയ്‌ക്ക് ഒന്നരയോടെ ആറന്മുള ഉത്രട്ടാതി വള്ളംകളി ഉപരാഷ്‌ട്രപതി ഉദ്ഘാടനം ചെയ്യും. ചടങ്ങിന് ശേഷം 2.30ഓടെ പ്രമാടത്തെത്തി ഹെലികോപ്റ്ററിൽ തിരുവനന്തപുരത്തേക്ക് പോകും. വൈകിട്ട് അഞ്ചിന് ഓണത്തോടനുബന്ധിച്ച ടൂറിസം വാരാഘോഷത്തിന്റെ സമാപന ഘോഷയാത്രയും ഉപരാഷ്‌ട്രപതി ഉദ്ഘാടനം ചെയ്യും.
ഓണാഘോഷങ്ങളുടെ ഭാഗമായി സംസ്ഥാനത്ത് നടക്കുന്ന പ്രധാന പരിപാടികളിലൊന്നായ ആറന്മുള ഉത്രട്ടാതി ജലമേളയ്‌ക്ക് ഉപരാഷ്ട്രപതിയുടെ സാന്നിധ്യം പ്രത്യേക പ്രാധാന്യം നൽകുന്നതാണ്. നിരവധി പള്ളിയോടങ്ങൾ പങ്കെടുക്കുന്ന വള്ളംകളിയുടെ ഉദ്ഘാടന ചടങ്ങിൽ ഉപരാഷ്‌ട്രപതി പങ്കെടുക്കും.
ഓഗസ്റ്റ് 31ന് രാവിലെ 8.15ന് ഉപരാഷ്‌ട്രപതി ലക്ഷദ്വീപിലെ അഗത്തിയിലേക്ക് പോകും. ഉച്ചയ്‌ക്ക് ഒന്നരയോടെ കൊച്ചിയിൽ തിരിച്ചെത്തുന്ന അദ്ദേഹം വൈകിട്ട് നാലിന് കാക്കനാട് രാജഗിരി എൻജിനിയറിങ് കോളജിന്റെ രജത ജൂബിലി ആഘോഷങ്ങൾ ഉദ്ഘാടനം ചെയ്യും.
തുടർന്ന് വൈകിട്ട് ആറേകാലോടെ ഉപരാഷ്‌ട്രപതി കേരളത്തിൽനിന്ന് ഡൽഹിയിലേക്ക് മടങ്ങും. രണ്ട് ദിവസത്തെ സന്ദർശനത്തിനിടെ സംസ്ഥാനത്തെ വിവിധ പ്രധാന ചടങ്ങുകളിൽ ഉപരാഷ്‌ട്രപതി പങ്കെടുക്കുന്നതോടെ സുരക്ഷാ ക്രമീകരണങ്ങളും ഗതാഗത നിയന്ത്രണങ്ങളും ബന്ധപ്പെട്ട പ്രദേശങ്ങളിൽ ഏർപ്പെടുത്തും.
