കൊച്ചി: പൊലീസ് ഡിപ്പാർട്ട്മെന്റിന്റെ നടപടിക്രമങ്ങളിലൂടെയും കേസന്വേഷണത്തിന്റെ സങ്കീർണമായ വഴികളിലൂടെയും പ്രേക്ഷകരെ കൊണ്ടുപോകുന്ന ‘പ്രഥമ ദൃഷ്ട്യാ കുറ്റക്കാർ’ എന്ന ചിത്രത്തിന്റെ ടീസർ പുറത്തിറങ്ങി. ഷഹദ് സംവിധാനം ചെയ്യുന്ന ചിത്രം ഒരു തികഞ്ഞ പൊലീസ് സ്റ്റോറിയായാണ് ഒരുങ്ങുന്നത്. പൊലീസ് ക്യാമ്പിലെയും പൊലീസ് സ്റ്റേഷനിലെയും ദൃശ്യങ്ങൾ ഉൾക്കൊള്ളുന്ന ടീസർ ചിത്രത്തിന്റെ പ്രമേയത്തിൽ ഒളിഞ്ഞിരിക്കുന്ന ഗൗരവമേറിയ ദുരൂഹതകളിലേക്കാണ് സൂചന നൽകുന്നത്.
നീതിനിർവഹണത്തിനും കേസ് തെളിയിക്കുന്നതിനുമായി പൊലീസ് ഡിപ്പാർട്ട്മെന്റിന് കൃത്യമായ നിരവധി നടപടിക്രമങ്ങളുണ്ട്. അന്വേഷണത്തിന്റെ ഓരോ ഘട്ടത്തിലും ഈ നടപടിക്രമങ്ങൾ നിർണായകമാകാറുണ്ട്. ഇത്തരം നടപടിക്രമങ്ങളുടെ ചില ഭാഗങ്ങൾ ടീസറിൽ ദൃശ്യവൽക്കരിക്കുന്നുണ്ട്.
“അവളെ ഒറ്റക്കാക്കിയിട്ട് ഞാനെങ്ങോട്ടും ഒരിക്കലും വരില്ല സാർ…”
“കുറ്റം എന്നെങ്കിലും ഒരു നാൾ മറനീക്കി പുറത്തുവരും. ആ ഒരു ദിവസത്തിനു വേണ്ടി ഞാൻ കാത്തിരിക്കും.”
ടീസറിലെ ഈ സംഭാഷണങ്ങൾ ചിത്രത്തിന്റെ കഥാഗതിയിൽ ഒളിഞ്ഞിരിക്കുന്ന ശക്തമായ വൈകാരികതയിലേക്കും ദുരൂഹതകളിലേക്കും വിരൽചൂണ്ടുന്നു. ഒരു പൊലീസ് സ്റ്റേഷന്റെ പശ്ചാത്തലത്തിൽ അരങ്ങേറുന്ന സംഭവങ്ങളിലൂടെ റിയലിസ്റ്റിക് ഇമോഷണൽ ത്രില്ലർ അനുഭവമാണ് ചിത്രം പ്രേക്ഷകർക്ക് സമ്മാനിക്കുന്നതെന്ന് അണിയറപ്രവർത്തകർ നേരത്തെ വ്യക്തമാക്കിയിരുന്നു.
പോലീസ് സംവിധാനത്തിന്റെ ഉള്ളറകളും കേസന്വേഷണത്തിന്റെ വിവിധ തലങ്ങളും കഥാപാത്രങ്ങളുടെ വൈകാരിക സംഘർഷങ്ങളും കോർത്തിണക്കിയാണ് ചിത്രം ഒരുക്കിയിരിക്കുന്നത്. ശക്തമായ കഥയുടെ കെട്ടുറപ്പും ചിത്രത്തിന്റെ പ്രധാന ആകർഷണമാകുമെന്നാണ് അണിയറപ്രവർത്തകരുടെ വിലയിരുത്തൽ.
സെപ്റ്റംബർ 11ന് ചിത്രം തിയറ്ററുകളിലെത്തുന്നതിന് മുന്നോടിയായാണ് ടീസർ പുറത്തിറക്കിയത്. റിലീസ് ചെയ്ത് കുറഞ്ഞ സമയത്തിനുള്ളിൽ തന്നെ നവമാധ്യമങ്ങളിൽ ടീസറിന് മികച്ച സ്വീകാര്യത ലഭിച്ചു. ചിത്രത്തെക്കുറിച്ചുള്ള പ്രേക്ഷകരുടെ പ്രതീക്ഷ വ്യക്തമാക്കുന്നതാണ് ടീസറിന് ലഭിക്കുന്ന പ്രതികരണങ്ങൾ.
11 ഐക്കൺ ഫിലിംസിന്റെ ബാനറിൽ അർജുൻ സെൽ നിർമ്മിക്കുന്ന ചിത്രത്തിൽ പാർവ്വതി തിരുവോത്ത് കേന്ദ്ര കഥാപാത്രത്തെ അവതരിപ്പിക്കുന്നു. പാർവ്വതിക്കൊപ്പം മലയാളത്തിലെ ശ്രദ്ധേയരായ നിരവധി താരങ്ങളും ചിത്രത്തിന്റെ ഭാഗമാണ്. വിജയരാഘവൻ, സായ് കുമാർ, മാത്യു തോമസ്, വിനയ് ഫോർട്ട്, അസീസ് നെടുമങ്ങാട്, സിദ്ധാർത്ഥ് ഭരതൻ, ഉണ്ണിമായ പ്രസാദ്, ജയശ്രീ, നിയാസ് ബക്കർ, സിറാജ് എന്നിവർക്കൊപ്പം പ്രശസ്ത തമിഴ് നടൻ പാർത്ഥിപനും പ്രധാന കഥാപാത്രത്തെ അവതരിപ്പിക്കുന്നു.
പി.എസ്. സുബ്രഹ്മണ്യവും വിജേഷ് തോട്ടുങ്കലും ചേർന്നാണ് തിരക്കഥയും രചനയും നിർവഹിച്ചിരിക്കുന്നത്. മുജീബ് മജീദാണ് സംഗീതം ഒരുക്കുന്നത്. ഛായാഗ്രഹണം റോബി രാജ്. എഡിറ്റിംഗ് ചമൻ ചാക്കോ. കലാസംവിധാനം മഹേഷ് മോഹൻ. മേക്കപ്പ് അമൽ. കോസ്റ്റ്യൂം ഡിസൈൻ സമീറ സനീഷ്.
ബേബി പണിക്കർ ചീഫ് അസോസിയേറ്റ് ഡയറക്ടറാണ്. സ്റ്റിൽസ് റിജാഷ് മുഹമ്മദ്. ദീപക് ലൈൻ പ്രൊഡ്യൂസറായും എൽദോ ജോൺ പ്രൊഡക്ഷൻ മാനേജറായും ഫഹദ് (അപ്പു) പ്രൊഡക്ഷൻ എക്സിക്യൂട്ടീവായും പ്രവർത്തിക്കുന്നു. സനൂപ് ചങ്ങനാശ്ശേരിയാണ് പ്രൊഡക്ഷൻ കൺട്രോളർ.
സെൻട്രൽ പിക്ചേഴ്സ് ചിത്രം പ്രദർശനത്തിനെത്തിക്കുന്നു. വാഴൂർ ജോസ് പി.ആർ.ഒ.