ഹൊററും നർമ്മവും നിറച്ച് ‘ചടങ്ങ്’ തുടങ്ങി; വിനീത് ശ്രീനിവാസനും മീനാക്ഷി മാധവനും പ്രധാന വേഷങ്ങളിൽ, നവാഗതൻ അഭിജിത്ത് സര്യ സംവിധാനം

കൊച്ചി: വിനീത് ശ്രീനിവാസനെ കേന്ദ്രകഥാപാത്രമാക്കി നവാഗതനായ അഭിജിത്ത് സര്യ സംവിധാനം ചെയ്യുന്ന പുതിയ ചിത്രം ‘ചടങ്ങി’ന്റെ ചിത്രീകരണത്തിന് തുടക്കമായി. ഓഗസ്റ്റ് 30 ഞായറാഴ്ച കൊച്ചി വൈറ്റില പുന്നുരുന്നി ശ്രീനാരായണേശ്വരി ക്ഷേത്രത്തിൽ നടന്ന പൂജാ ചടങ്ങുകളോടെയാണ് ചിത്രത്തിന് തുടക്കമായത്.

വിനീത് ശ്രീനിവാസൻ, സുരേഷ് കൃഷ്ണ, ചിത്രത്തിലെ നായിക മീനാക്ഷി മാധവൻ, നിർമാതാക്കളായ ഡോൾവിൻ കുര്യാക്കോസ്, ഡെൽറ്റ മണി, ഷബീർ മലവെട്ടത്ത്, സംവിധായകൻ അഭിജിത്ത് സര്യ, ഷാഹി കബീർ, സംവിധായിക ഷിഫ്ന തുടങ്ങിയവരും അണിയറ പ്രവർത്തകരും ചേർന്ന് ഭദ്രദീപം തെളിയിച്ചാണ് ചടങ്ങുകൾ ആരംഭിച്ചത്. സംവിധായകൻ അഭിജിത്ത് സര്യയുടെ മാതാപിതാക്കളായ ശ്രീധരൻ-ശോഭ എന്നിവർ സ്വിച്ചോൺ കർമം നിർവഹിച്ചു. വിനീത് ശ്രീനിവാസൻ ഫസ്റ്റ് ക്ലാപ്പും നൽകി.

തിയേറ്റർ ഓഫ് ഡ്രീംസ്, എം.സ്റ്റാർ എന്റർടെയ്ൻമെന്റ്, ഡ്രീം മർച്ചന്റ് എന്നീ ബാനറുകളിൽ ഡോൾവിൻ കുര്യാക്കോസ്, ഡെൽറ്റ മണി, ഷബീർ മലവെട്ടത്ത് എന്നിവർ ചേർന്നാണ് ചിത്രം നിർമിക്കുന്നത്.

മലബാറിലെ ഒരു വീടിനെ പശ്ചാത്തലമാക്കി ഒരുക്കുന്ന ചിത്രമാണ് ‘ചടങ്ങ്’. ഫാമിലി ഹൊറർ ഹ്യൂമർ വിഭാഗത്തിൽപ്പെടുന്ന ചിത്രത്തിൽ ഹൊററിനും നർമ്മത്തിനും ഒരുപോലെ പ്രാധാന്യം നൽകുന്നുണ്ട്. കുടുംബ പശ്ചാത്തലത്തിൽ ഭയവും നർമ്മവും സമന്വയിപ്പിച്ചുള്ള അവതരണമാണ് ചിത്രത്തിന്റേത്.

വിനീത് ശ്രീനിവാസനൊപ്പം സുരേഷ് കൃഷ്ണ, സോനാ നായർ, ജഗദീഷ്, നിഹാൽ നിസാം, ബിജു സോപാനം, ശ്രീജിത്ത് ബാബു തുടങ്ങിയവരും പ്രധാന വേഷങ്ങളിലെത്തുന്നു. മീനാക്ഷി മാധവനാണ് ചിത്രത്തിലെ നായിക.

അഭിജിത്ത് സര്യയും വിഷ്ണു വിനോദനും ചേർന്നാണ് തിരക്കഥ ഒരുക്കുന്നത്. ബിബിൻ അശോകാണ് സംഗീതം. ഹലോ റഷാദ് ഛായാഗ്രഹണവും കണ്ണൻ മോഹൻ എഡിറ്റിംഗും നിർവഹിക്കുന്നു.

ദിലീപ് നാഥാണ് പ്രൊഡക്ഷൻ ഡിസൈനർ. അഖിൽ രാജ് ചിറയിൽ കലാസംവിധാനം നിർവഹിക്കുന്നു. രജീഷ് വേലായുധനാണ് ചീഫ് അസോസിയേറ്റ് ഡയറക്ടർ. ആക്ഷൻ കലൈ കിംഗ്സ്റ്റണും മേക്കപ്പ് സുധി സുരേന്ദ്രനും കോസ്റ്റ്യൂം ഡിസൈൻ സമീര സനീഷും നിർവഹിക്കുന്നു.

സാജൻ ആർ. ശാരദ ക്രിയേറ്റീവ് പ്രൊഡ്യൂസറാണ്. സുഹൈൽ വരട്ടിപ്പള്ളിയാൽ പ്രൊഡക്ഷൻ എക്സിക്യൂട്ടീവും ഷെയ്ൻ സാബുറ സ്റ്റിൽസും നിർവഹിക്കുന്നു. ഓൾഡ് മങ്ക്സാണ് ഡിസൈൻ. ഷബീർ മലവെട്ടത്താണ് പ്രൊഡക്ഷൻ കൺട്രോളർ.

വണ്ടൂരിലും പരിസര പ്രദേശങ്ങളിലുമായാണ് ‘ചടങ്ങി’ന്റെ പ്രധാന ചിത്രീകരണം പൂർത്തിയാക്കുക. ഹൊററും നർമ്മവും കുടുംബബന്ധങ്ങളും ചേർത്തൊരുക്കുന്ന ചിത്രം പ്രേക്ഷകർക്ക് വ്യത്യസ്തമായ അനുഭവമാകുമെന്നാണ് അണിയറപ്രവർത്തകരുടെ പ്രതീക്ഷ.