തമിഴകത്തെ പുരാതനവും വിഖ്യാതവുമായ 108 വൈഷ്ണവ ദിവ്യദേശങ്ങളിൽ പ്രമുഖമാണ് ശ്രീവില്ലിപുത്തൂർ ആണ്ടാൾ ദേവി ക്ഷേത്രം. തമിഴ്നാടിന്റെ ഔദ്യോഗിക മുദ്രയിൽ തെളിഞ്ഞുനിൽക്കുന്ന 192 അടി ഉയരമുള്ള വിഖ്യാതമായ രാജഗോപുരം ഈ മണ്ണിലാണ് ഉയർന്നുനിൽക്കുന്നത്. എന്നാൽ ചരിത്രത്തിനും വാസ്തുവിദ്യയ്ക്കുമപ്പുറം, ശ്രീവില്ലിപുത്തൂർ ഇന്ന് ലോകമെമ്പാടുമുള്ള വിശ്വാസികൾക്ക് പ്രിയങ്കരമാകുന്നത് മംഗല്യഭാഗ്യത്തിന്റെ ഉറവിടം എന്ന നിലയിലാണ്. വിവാഹതടസ്സങ്ങൾ മാറി അനുയോജ്യരായ ജീവിതപങ്കാളിയെ ലഭിക്കാൻ ആണ്ടാൾ ദേവിയുടെ മുന്നിൽ നടത്തുന്ന പ്രാർത്ഥനകൾ വിഫലമാകില്ലെന്നാണ് വൈഷ്ണവ പാരമ്പര്യത്തിലെ ദൃഢമായ വിശ്വാസം.
ഭക്തിയും പ്രണയവും ഒന്നിച്ച അമരകഥ
പെരിയാഴ്വാർ തന്റെ തുളസിത്തോട്ടത്തിൽ നിന്ന് കണ്ടെടുത്തു വളർത്തിയ കുഞ്ഞായിരുന്നു കോതൈ അഥവാ ആണ്ടാൾ. ചെറുപ്പം മുതലേ ഭഗവാൻ മഹാവിഷ്ണുവിനോട് അടങ്ങാത്ത പ്രണയമായിരുന്നു അവൾക്ക്. പെരുമാളിന് അണിയാൻ അച്ഛൻ തെയ്യാറാക്കുന്ന പുഷ്പമാലകൾ അച്ഛൻ കാണാതെ താൻ സ്വയം അണിഞ്ഞു നോക്കി കണ്ണാടിയിൽ സ്വന്തം പ്രതിബിംബം നോക്കി രസിക്കുമായിരുന്നു കോതൈ. ഭഗവാനെ തന്റെ മണവാളനായി കണ്ടുകൊണ്ട് തനിക്ക് ശോഭിക്കുന്ന മാല മാത്രമാണ് അവൾ ഭഗവാന് നൽകിയത്. ഇതറിഞ്ഞ് ദുഃഖിതനായ പെരിയാഴ്വാർ പുതിയ മാല സമർപ്പിക്കാൻ തുനിഞ്ഞപ്പോൾ, “കോതൈ ചൂടി തന്ന ആ മാലയല്ലാതെ മറ്റൊന്നും ഞാൻ സ്വീകരിക്കില്ല” എന്ന് ഭഗവാൻ വടപത്രശായി പെരുമാൾ അരുളിച്ചെയ്തു എന്നാണ് ഐതിഹ്യം. അങ്ങനെയാണ് അവൾ ‘ചൂടിക്കൊടുത്ത ചുടർക്കൊടി’ എന്ന പേരിൽ പ്രശസ്തയായത്. ഒടുവിൽ തന്റെ പ്രണയ സാഫല്യമായി ശ്രീരംഗനാഥനിൽത്തന്നെ ലീനയായി മാറിയ ആണ്ടാൾ, പ്രണയത്തിന്റെയും സ്വതന്ത്രമായ തിരഞ്ഞെടുപ്പിന്റെയും നിത്യപ്രതീകമാണ്.
വിവാഹതടസ്സം മാറാൻ ശ്രീവില്ലിപുത്തൂരിലെ പ്രത്യേക പ്രാർത്ഥനകൾ (തിരുമണ പരിഹാരങ്ങൾ)
ആണ്ടാൾ ദേവി ഭഗവാൻ ശ്രീരംഗനാഥനെ തന്റെ ജീവിതപങ്കാളിയായി വരിച്ച് പ്രണയസാഫല്യം നേടിയ ദിവ്യഭൂമിയായതിനാൽ, ഇവിടെ നടത്തുന്ന വിവാഹ പ്രാർത്ഥനകൾക്ക് അതിവിശേഷമായ ശക്തിയുണ്ടെന്ന് തമിഴ് പ്രാമാണിക ഗ്രന്ഥങ്ങളും തമിഴ്നാട്ടിലെ വിശ്വാസങ്ങളും സാക്ഷ്യപ്പെടുത്തുന്നു.
1. ‘വാരണം ആയിരം’ പാരായണം: ആണ്ടാൾ രചിച്ച ‘നാച്ചിയാർ തിരുമൊഴി’യിലെ “വാരണം ആയിരം ചൂഴ വലം ചെയ്ത്…” എന്ന് തുടങ്ങുന്ന 11 പാശുരങ്ങൾ (കവിതകൾ) അതിവിശേഷമാണ്. ഭഗവാനുമായുള്ള തന്റെ മംഗല്യസ്വപ്നത്തെയും വിവാഹച്ചടങ്ങുകളെയും വിവരിക്കുന്ന ഈ വരികൾ, മംഗല്യ തടസ്സം നേരിടുന്ന പെൺകുട്ടികൾ ദിനവും ഭക്തിയോടെ പാരായണം ചെയ്താൽ അവർക്ക് എത്രയും വേഗം വരനെ ലഭിച്ച് വിവാഹം നടക്കുമെന്നത് നൂറ്റാണ്ടുകളായുള്ള അനുഭവവിശ്വാസമാണ്.
2. തുളസിമാലയും അർച്ചനയും (9 ആഴ്ച പൂജ): വിവാഹം നീണ്ടുപോകുന്ന യുവാക്കളും യുവതികളും തുടർച്ചയായി 9 ആഴ്ചകൾ (പ്രത്യേകിച്ച് ബുധൻ, വെള്ളി ദിവസങ്ങളിൽ) ആണ്ടാൾ ദേവിക്കും ശ്രീ രംഗമന്നാർ (വിഷ്ണു) ഭഗവാനും സ്വന്തം കൈകൊണ്ട് തയ്യാറാക്കിയ വിവിധ വർണ്ണങ്ങളിലുള്ള പൂമാലകളും തുളസിമാലകളും സമർപ്പിച്ച് അർച്ചന കഴിക്കുന്നു. ഒമ്പതാം ആഴ്ച ശ്രീവില്ലിപുത്തൂരിൽ നേരിട്ടെത്തി ദർശനം നടത്തി പ്രാർത്ഥന പൂർത്തിയാക്കുന്നതോടെ വിവാഹതടസ്സങ്ങളായ ജാതകദോഷങ്ങളും (ബുധ, ശുക്ര ദോഷങ്ങൾ) കളത്രദോഷങ്ങളും മാറുമെന്നാണ് കരുതപ്പെടുന്നത്.
3. ആണ്ടാൾ കിളിയും പച്ചക്കളിമണ്ണും: ശ്രീവില്ലിപുത്തൂർ ക്ഷേത്രത്തിലെ മറ്റൊരു പ്രത്യേകത ആണ്ടാൾ ദേവിയുടെ ഇടതു കയ്യിൽ പ്രതിഷ്ഠിക്കുന്ന പച്ചിലയും പൂക്കളും കൊണ്ട് നിർമ്മിച്ച ‘കിളി’ (തത്ത) ആണ്. ഭഗവാനിലേക്ക് തന്റെ പ്രണയസന്ദേശം എത്തിക്കാൻ ആണ്ടാൾ നിയോഗിച്ച ഈ തത്തയോട് തങ്ങളുടെ മനസ്സിന്റെ ആഗ്രഹം പറഞ്ഞ് പ്രാർത്ഥിച്ചാൽ, ആ പ്രാർത്ഥന ദേവി നേരിട്ട് ഭഗവാനിലേക്ക് എത്തിച്ച് മംഗല്യം ഉറപ്പിച്ചു നൽകുമെന്നാണ് സങ്കൽപ്പം.
4. തിരുപ്പാവൈ നോമ്പ്: മാർഗഴി (ധനു) മാസത്തിൽ ആണ്ടാൾ ദേവി കൂട്ടുകാരികൾക്കൊപ്പം ആചരിച്ച പാവൈ നോമ്പ് പിന്തുടർന്ന് പെൺകുട്ടികൾ പ്രാർത്ഥിക്കുന്നത് തടസ്സങ്ങളില്ലാത്ത സുമംഗലീ യോഗം നൽകുന്നു.
5. മാല മാറ്റൽ മംഗല്യ പ്രാർത്ഥന: ശ്രീവില്ലിപുത്തൂരിലെ തിരുക്കല്യാണ ഉത്സവനാളുകളിലോ മറ്റു പവിത്ര ദിനങ്ങളിലോ ദേവിക്കും ഭഗവാനും ചാർത്തിയ മാല വാങ്ങിച്ചാർത്തി പ്രാർത്ഥിക്കുന്നതും, വിവാഹം നിശ്ചയിച്ചതിനു ശേഷം ദമ്പതികൾ ഒരുമിച്ച് ക്ഷേത്രത്തിലെത്തി ദേവിക്ക് കൃതജ്ഞതയായി മാല സമർപ്പിക്കുന്നതും ഇവിടുത്തെ പ്രധാന വഴിപാടാണ്.
കണ്ണാടി കിണറ്റിൽ സ്വന്തം രൂപവും മാലയും നോക്കി ഭഗവാനായി കാത്തിരുന്ന ആണ്ടാളിന്റെ ദിവ്യസാന്നിധ്യം ശ്രീവില്ലിപുത്തൂരിൽ ഇന്നും ഓരോ കോണിലുമുണ്ട്. സ്വന്തം ശബ്ദമുയർത്തി ആഗ്രഹിച്ച പ്രണയം നേടിയെടുത്ത ആണ്ടാൾ ദേവിയുടെ മുന്നിൽ വിതുമ്പുന്ന മനസ്സോടെ എത്തുന്ന ഏത് പെൺകുട്ടിക്കും ആശ്വാസത്തിന്റെയും മംഗല്യ സൗഭാഗ്യത്തിന്റെയും വാഗ്ദാനമായി ഈ ക്ഷേത്രം നിലകൊള്ളുന്നു.
നിങ്ങളുടെ ജീവിതത്തിലും ആഗ്രഹിച്ച പങ്കാളിയുമൊത്തുള്ള സുന്ദരമായ ഒരു തുടക്കത്തിനായി കാത്തിരിക്കുന്നുവെങ്കിൽ, ശ്രീവില്ലിപുത്തൂരിലെ ആണ്ടാളിന്റെ തിരുമുമ്പിലേക്ക് ഒരു യാത്രയാകാം… അവിടെ കയ്യിലെ കിളിയുമായി, മനസ്സിൽ പ്രണയവുമായി ദേവി മംഗല്യത്തിന്റെ അമൃതവർഷം ചൊരിയാൻ കാത്തിരിപ്പുണ്ട്!
