കൊച്ചി: മട്ടാഞ്ചേരിയിൽ പൊലീസിന്റെയും കൊച്ചി ഡാൻസാഫ് സംഘത്തിന്റെയും നേതൃത്വത്തിൽ വൻ ലഹരിവേട്ട. രണ്ട് കിലോയിലധികം എംഡിഎംഎയുമായി രണ്ടുപേരെ പൊലീസ് കസ്റ്റഡിയിലെടുത്തു. ഓപ്പറേഷൻ തൂഫാന്റെ ഭാഗമായി നടത്തിയ അന്വേഷണത്തിലാണ് വൻതോതിൽ ലഹരിമരുന്ന് പിടികൂടിയത്.
മട്ടാഞ്ചേരി സ്വദേശി നൗഫൽ (35) ഉൾപ്പെടെ രണ്ടുപേരാണ് കസ്റ്റഡിയിലുള്ളത്. നൗഫലിന്റെ സുഹൃത്തിനെ കഴിഞ്ഞ ദിവസം പാലാരിവട്ടത്തുനിന്ന് പൊലീസ് പിടികൂടിയിരുന്നു. ഇയാളിൽനിന്ന് ചെറിയ അളവിൽ എംഡിഎംഎയും കണ്ടെത്തിയിരുന്നു.
സുഹൃത്തിനെ ചോദ്യം ചെയ്തതോടെയാണ് അന്വേഷണസംഘം നൗഫലിലേക്ക് എത്തിയത്. തുടർന്ന് നൗഫൽ താമസിച്ചിരുന്ന വാടകവീട്ടിൽ നടത്തിയ പരിശോധനയിലാണ് വൻതോതിൽ എംഡിഎംഎ കണ്ടെത്തിയത്.
നൗഫൽ സ്ഥിരം കുറ്റവാളിയാണെന്നും കഴിഞ്ഞ അഞ്ച് വർഷമായി ലഹരിമരുന്ന് വിൽപ്പനയിൽ ഏർപ്പെട്ടിരുന്നതായും സ്ഥിരീകരിക്കാത്ത വിവരങ്ങളുണ്ട്. ലഹരിക്കടത്ത് സംഘത്തിൽ കൂടുതൽ പേർ ഉൾപ്പെട്ടിട്ടുണ്ടെന്നാണ് പൊലീസിന്റെ പ്രാഥമിക നിഗമനം.
പിടിയിലായവരെ വിശദമായി ചോദ്യം ചെയ്യുകയാണ്. ലഹരിമരുന്നിന്റെ ഉറവിടം, വിതരണ ശൃംഖല, സംഘത്തിലെ മറ്റ് അംഗങ്ങൾ എന്നിവയെക്കുറിച്ചുള്ള വിവരങ്ങൾ കണ്ടെത്തുന്നതിനുള്ള അന്വേഷണം പുരോഗമിക്കുകയാണ്.
