യുഎൻ രക്ഷാസമിതിയിൽ ഇന്ത്യയ്‌ക്ക് സ്ഥിരാംഗത്വം; പിന്തുണച്ച് നാല് യൂറോപ്യൻ രാജ്യങ്ങൾ

ന്യൂയോർക്ക്: ഐക്യരാഷ്‌ട്രസഭാ സുരക്ഷാ കൗൺസിലിൽ ഇന്ത്യയ്‌ക്ക് സ്ഥിരാംഗത്വം നൽകണമെന്ന ആവശ്യത്തിന് നാല് യൂറോപ്യൻ രാജ്യങ്ങളുടെ പിന്തുണ. ഹംഗറി, പോളണ്ട്, സ്ലോവാക്യ, ചെക്ക് റിപ്പബ്ലിക് എന്നീ രാജ്യങ്ങൾ ഉൾപ്പെടുന്ന വൈസെഗ്രാഡ് ഗ്രൂപ്പ് (V4) ആണ് ഇന്ത്യയുടെ സ്ഥിരാംഗത്വത്തെ പിന്തുണച്ചത്.

81-ാം യുഎൻ പൊതുസഭാ സമ്മേളനത്തിന്റെ ഭാഗമായി ന്യൂയോർക്കിൽ നടന്ന ആദ്യ V4+India ഉന്നതതല വിദേശകാര്യമന്ത്രിമാരുടെ യോഗത്തിലാണ് പിന്തുണ അറിയിച്ചത്. സ്ലോവാക്യൻ വിദേശകാര്യമന്ത്രി യുറാജ് ബ്ലാനാർ ആണ് ഇക്കാര്യം വ്യക്തമാക്കിയത്. “ഗ്ലോബൽ സൗത്തിന്റെ ഭാഗമായ ഇന്ത്യ  യുഎൻ സുരക്ഷാ കൗൺസിലിൽ സ്ഥിരാംഗമായി ഉണ്ടാകണമെന്നാണ് നാല് രാജ്യങ്ങളുടെയും നിലപാട്,” ബ്ലാനാർ പറഞ്ഞു.

ഇന്ത്യ–V4 ആദ്യ ഉന്നതതല യോഗം
ഇന്ത്യയും V4 രാജ്യങ്ങളും തമ്മിലുള്ള ആദ്യ വിദേശകാര്യമന്ത്രിതല യോഗമായിരുന്നു ന്യൂയോർക്കിൽ നടന്നത്. ഇന്ത്യയുടെ വിദേശകാര്യമന്ത്രി എസ്. ജയശങ്കറും പോളണ്ട്, ഹംഗറി, സ്ലോവാക്യ, ചെക്ക് റിപ്പബ്ലിക് എന്നീ രാജ്യങ്ങളിലെ പ്രതിനിധികളും യോഗത്തിൽ പങ്കെടുത്തു.

“പുതിയ ചരിത്രപരമായ അവസരം” എന്നാണ് പരിപാടിയെ ജയശങ്കർ വിശേഷിപ്പിച്ചത്. രാഷ്‌ട്രീയ, സാമ്പത്തിക, പ്രതിരോധ, സാങ്കേതികവിദ്യ, ബഹിരാകാശം, കണക്റ്റിവിറ്റി, ജനങ്ങൾ തമ്മിലുള്ള ബന്ധം തുടങ്ങിയ മേഖലകളിലെ സഹകരണം ചർച്ച ചെയ്തതായി അദ്ദേഹം പറഞ്ഞു. വർഷംതോറും യോഗം നടത്താനും വാർഷിക ബിസിനസ് ഫോറം സംഘടിപ്പിക്കാനും തീരുമാനിച്ചു. പ്രതിരോധ സഹകരണം പുനരുജ്ജീവിപ്പിക്കുക, സാങ്കേതികവിദ്യയിലും നവീകരണത്തിലും കൂടുതൽ സഹകരണം ഉറപ്പാക്കുക, സാംസ്കാരിക-ജനതാതല ബന്ധങ്ങൾ ശക്തിപ്പെടുത്തുക തുടങ്ങിയ കാര്യങ്ങളിലും ധാരണയായതായി ജയശങ്കർ വ്യക്തമാക്കി.

നിലവിൽ യുഎൻ സുരക്ഷാ കൗൺസിലിൽ അഞ്ച് സ്ഥിരാംഗങ്ങളാണുള്ളത് — അമേരിക്ക, റഷ്യ, ചൈന, ഫ്രാൻസ്, ബ്രിട്ടൻ. കൂടാതെ രണ്ട് വർഷത്തേക്ക് തിരഞ്ഞെടുക്കപ്പെടുന്ന 10 താൽക്കാലിക അംഗങ്ങളുമുണ്ട്. സുരക്ഷാ കൗൺസിലിന്റെ ഘടന നിലവിലെ ആഗോള യാഥാർഥ്യങ്ങളെ പ്രതിഫലിപ്പിക്കുന്ന തരത്തിൽ പരിഷ്‌കരിക്കണമെന്നാണ് ഇന്ത്യയുടെ ദീർഘകാല ആവശ്യം. സ്ഥിരാംഗത്വത്തിനായുള്ള ഇന്ത്യയുടെ ആവശ്യത്തിന് ഫ്രാൻസ്, ബ്രിട്ടൻ, അമേരിക്ക, റഷ്യ തുടങ്ങിയ രാജ്യങ്ങൾ നേരത്തെ പിന്തുണ അറിയിച്ചിട്ടുണ്ട്.

പ്രതിരോധം മുതൽ ബഹിരാകാശം വരെ സഹകരണം
ഇന്ത്യയും V4 രാജ്യങ്ങളും തമ്മിലുള്ള ചർച്ചയിൽ പ്രതിരോധം, സാങ്കേതികവിദ്യ, ബഹിരാകാശം, വ്യാപാരം, കണക്റ്റിവിറ്റി തുടങ്ങിയ മേഖലകൾക്ക് പുറമെ യുക്രെയ്ൻ സംഘർഷവും ഗൾഫ് മേഖലയിലെ സംഭവവികാസങ്ങളും ഉൾപ്പെടെയുള്ള ആഗോള വിഷയങ്ങളും ചർച്ചയായി.

ഇന്ത്യയും യൂറോപ്യൻ യൂണിയനും തമ്മിലുള്ള ബന്ധം കൂടുതൽ ശക്തമാകുന്ന സാഹചര്യത്തിൽ V4 രാജ്യങ്ങളുമായുള്ള സഹകരണത്തിനും പ്രത്യേക പ്രാധാന്യമുണ്ടെന്ന് ജയശങ്കർ വ്യക്തമാക്കി. സ്ലോവാക്യയുടെ നേതൃത്വത്തിലാണ് ആദ്യ V4+India യോഗം നടന്നത്. 11 വർഷത്തെ ശ്രമങ്ങൾക്ക് ശേഷമാണ് ഈ പുതിയ ഫോർമാറ്റ് യാഥാർഥ്യമായതെന്ന് സ്ലോവാക്യൻ വിദേശകാര്യ മന്ത്രാലയം അറിയിച്ചു.