തിരുവനന്തപുരം: സിഎംആർഎൽ–എക്സാലോജിക് സാമ്പത്തിക ഇടപാടുമായി ബന്ധപ്പെട്ട മാസപ്പടി കേസിൽ പുതിയ അന്വേഷണത്തിന് വഴിയൊരുങ്ങുന്നു. മുൻ മുഖ്യമന്ത്രി പിണറായി വിജയൻ, മകൾ ടി. വീണ, മുൻ മന്ത്രി പി.എ. മുഹമ്മദ് റിയാസ് എന്നിവർക്കെതിരെ അന്വേഷണം നടത്തണമെന്ന എൻഫോഴ്സ്മെന്റ് ഡയറക്ടറേറ്റിന്റെ ശുപാർശ സർക്കാർ അംഗീകരിച്ചു.
കേസിൽ ക്രൈംബ്രാഞ്ച് അന്വേഷണം നടത്താൻ ആഭ്യന്തരമന്ത്രി രമേശ് ചെന്നിത്തല സംസ്ഥാന പൊലീസ് മേധാവി റാവഡ ചന്ദ്രശേഖറിന് നിർദേശം നൽകി. ക്രൈംബ്രാഞ്ച് എഡിജിപിയുടെ മേൽനോട്ടത്തിൽ പ്രത്യേക അന്വേഷണ സംഘത്തിനും രൂപം നൽകും.
സിഎംആർഎല്ലിൽ നിന്ന് വീണ വിജയന്റെ കമ്പനിയായ എക്സാലോജിക്കിലേക്ക് നടന്ന സാമ്പത്തിക ഇടപാടുകൾ സംബന്ധിച്ച് ഇ.ഡി നടത്തിയ അന്വേഷണത്തിനൊടുവിലാണ് സംസ്ഥാന പൊലീസ് മേധാവിക്ക് വിശദമായ റിപ്പോർട്ട് കൈമാറിയത്. അഴിമതി നിരോധന നിയമപ്രകാരം കേസെടുത്ത് അന്വേഷണം നടത്തണമെന്നാണ് ഇ.ഡി ആവശ്യപ്പെട്ടത്.
ഇ.ഡിയുടെ റിപ്പോർട്ടിൽ ചൂണ്ടിക്കാട്ടിയ കാര്യങ്ങൾ പരിശോധിച്ച ശേഷമാണ് സർക്കാർ തുടർനടപടിയിലേക്ക് കടന്നത്. നേരത്തെ നിയമോപദേശം ലഭിച്ച ശേഷമേ തീരുമാനമെടുക്കൂ എന്നായിരുന്നു ആഭ്യന്തരമന്ത്രിയുടെ നിലപാട്. മുഖ്യമന്ത്രിയുമായി കൂടിക്കാഴ്ച നടത്തിയ ശേഷമാണ് അന്വേഷണത്തിന് അനുമതി നൽകിയതെന്നാണ് വിവരം.
ഇ.ഡി ശുപാർശയിൽ വിജിലൻസാണോ ക്രൈംബ്രാഞ്ചാണോ അന്വേഷണം നടത്തേണ്ടതെന്നതിൽ നേരത്തെ ആശയക്കുഴപ്പം നിലനിന്നിരുന്നു. രണ്ട് ഏജൻസികളും ഒരേസമയം അന്വേഷണം നടത്തേണ്ടതില്ലെന്ന നിലപാടാണ് ആഭ്യന്തരവകുപ്പ് സ്വീകരിച്ചത്. അതേസമയം, മുഖ്യമന്ത്രിയായിരുന്ന പിണറായി വിജയന്റെ പങ്ക് പരിശോധിക്കാൻ വിജിലൻസ് അന്വേഷണം ആവശ്യമായി വരുമെന്ന അഭിപ്രായവും ഉയർന്നിരുന്നു.
ഇ.ഡിയുടെ കത്ത് പരിശോധിച്ച അഡ്വക്കേറ്റ് ജനറലിന്റെ നിയമോപദേശവും സർക്കാരിന്റെ തീരുമാനത്തിൽ നിർണായകമായി. പ്രാഥമിക അന്വേഷണം നടത്തുന്നതിന് വിജിലൻസിനെയോ ക്രൈംബ്രാഞ്ചിനെയോ ചുമതലപ്പെടുത്താമെന്നായിരുന്നു നിയമോപദേശമെന്നാണ് വിവരം.
സിഎംആർഎല്ലിൽ നിന്നുള്ള പണമിടപാടുമായി ബന്ധപ്പെട്ട് പിണറായി വിജയനും വീണ വിജയനും എതിരെ അഴിമതി നിരോധന നിയമപ്രകാരം നടപടി സ്വീകരിക്കാമെന്ന നിയമോപദേശവും നേരത്തെ ലഭിച്ചിരുന്നു. 3.28 കോടി രൂപയുടെ ഇടപാടാണ് ഇതുമായി ബന്ധപ്പെട്ട് ഇ.ഡി റിപ്പോർട്ടിൽ പരാമർശിച്ചിട്ടുള്ളത്.
ഇ.ഡി അന്വേഷണത്തിൽ ലഭിച്ച രേഖകളും സാമ്പത്തിക ഇടപാടുകളുമായി ബന്ധപ്പെട്ട വിവരങ്ങളും പുതിയ അന്വേഷണ സംഘം പരിശോധിക്കും. കേസിൽ കൂടുതൽ തെളിവുകൾ ശേഖരിക്കുകയും ബന്ധപ്പെട്ടവരുടെ മൊഴിയെടുക്കുകയും ചെയ്ത ശേഷമായിരിക്കും തുടർനടപടികൾ തീരുമാനിക്കുക.
