വാൽപ്പാറ: അമ്മയുടെ മടിയിലിരുന്ന അഞ്ചുവയസ്സുകാരനെ പുലി ആക്രമിച്ചു. അമ്മയും അയൽവാസികളും ചെറുത്തുനിന്നതോടെ കുട്ടിയെ രക്ഷപ്പെടുത്താനായി. ഗുരുതരമായി പരിക്കേറ്റ കുട്ടിയെ കോയമ്പത്തൂർ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
തോട്ടം തൊഴിലാളികളായ ഗുരുസ്വാമിയുടെയും നാഗജ്യോതിയുടെയും മകൻ ദീക്ഷിതനാണ് പുലിയുടെ ആക്രമണത്തിൽ പരിക്കേറ്റത്. പ്രദേശത്തെ പഞ്ചായത്ത് യൂണിയൻ പ്രൈമറി സ്കൂളിലെ ഒന്നാം ക്ലാസ് വിദ്യാർഥിയാണ്.
വ്യാഴാഴ്ച വൈകിട്ട് സ്കൂളിൽനിന്ന് വീട്ടിലെത്തിയ ദീക്ഷിത് വീടിന്റെ വാതിൽക്കൽ അമ്മയുടെ മടിയിൽ ഇരിക്കുകയായിരുന്നു. ഇതിനിടെ സമീപത്തെ കുറ്റിക്കാട്ടിൽനിന്ന് പുറത്തേക്ക് ചാടിയ പുലി കുട്ടിയെ ആക്രമിക്കുകയായിരുന്നു.
പുലി കുട്ടിയെ കടിച്ചുകൊണ്ടുപോകാൻ ശ്രമിച്ചെങ്കിലും അമ്മ മകനെ വിട്ടുകൊടുത്തില്ല. കുട്ടിയെ ചേർത്തുപിടിച്ച് അമ്മ നിലവിളിച്ചതോടെ അയൽവാസികൾ സ്ഥലത്തേക്ക് ഓടിയെത്തി. വടികളുമായി പുലിയെ നേരിട്ടതോടെ കുട്ടിയെ ഉപേക്ഷിച്ച് പുലി സമീപത്തെ കുറ്റിക്കാട്ടിലേക്ക് ഓടിമറഞ്ഞു.
ആക്രമണത്തിൽ ദീക്ഷിതിന്റെ തലയുടെ പിന്നിലും മുഖത്തിന്റെ വലതുഭാഗത്തും ഗുരുതരമായി പരിക്കേറ്റു. ആദ്യം വാൽപ്പാറ സർക്കാർ ആശുപത്രിയിൽ എത്തിച്ച് ചികിത്സ നൽകി. തുടർന്ന് പൊള്ളാച്ചി സർക്കാർ ആശുപത്രിയിലേക്കും പിന്നീട് വിദഗ്ധ ചികിത്സയ്ക്കായി കോയമ്പത്തൂർ മെഡിക്കൽ കോളേജ് ആശുപത്രിയിലേക്കും മാറ്റുകയായിരുന്നു.
വാൽപ്പാറയിൽ അടുത്തിടെ പുലിയുടെ ആക്രമണത്തിൽ രണ്ട് കുട്ടികൾ കൊല്ലപ്പെട്ടിരുന്നു. ഇതിനെ തുടർന്ന് പ്രദേശത്ത് ജനകീയസമരം ശക്തമായിരുന്നു. പിന്നാലെ ജില്ലാഭരണകൂടം ഇടപെട്ട് സുരക്ഷാ നടപടികൾ സ്വീകരിച്ചിരുന്നു.
പുതിയ പുലിയാക്രമണം പ്രദേശത്ത് വീണ്ടും ആശങ്ക സൃഷ്ടിച്ചിട്ടുണ്ട്.
