തിരുവനന്തപുരം: അറഫാ ഗോൾഡ് ആൻഡ് ഡയമണ്ട്സിന്റെ സ്ഥാപനങ്ങളിൽ എൻഫോഴ്സ്മെന്റ് ഡയറക്ടറേറ്റിന്റെ (ഇ.ഡി) പരിശോധന തുടരുന്നു. തിരുവനന്തപുരം കിഴക്കേകോട്ടയിലെ സ്ഥാപനത്തിലാണ് നിലവിൽ പരിശോധന നടക്കുന്നത്. കൊല്ലത്തും തിരുവനന്തപുരത്തെ മറ്റ് മൂന്ന് കേന്ദ്രങ്ങളിലും ഉൾപ്പെടെ പരിശോധന പുരോഗമിക്കുകയാണ്. അറഫാ ഗോൾഡ് ഉടമ അബ്ദുൾ സലാമിന്റെ കൊല്ലത്തെ വീട്ടിലും റെയ്ഡ് നടക്കുന്നുണ്ട്.
യൂക്കോ ബാങ്ക് നൽകിയ പരാതിയെ തുടർന്നുള്ള അന്വേഷണത്തിന്റെ ഭാഗമായാണ് ഇ.ഡി പരിശോധന നടത്തുന്നത്. ഏകദേശം 50 കോടി രൂപയുടെ ബാങ്ക് തട്ടിപ്പുമായി ബന്ധപ്പെട്ടാണ് അന്വേഷണം. അറഫാ ഗോൾഡ് ആൻഡ് ഡയമണ്ട്സിൻറം സാമ്പത്തിക ഇടപാടുകളാണ് അന്വേഷണ പരിധിയിലുള്ളത്.
അറഫാ ഗോൾഡ് ആൻഡ് ഡയമണ്ട്സിന്റെ ബാധ്യത 65 കോടിയിലധികമാണെന്ന് യുകോ ബാങ്ക് 2025-ൽ കേരള ഹൈക്കോടതിയിൽ സമർപ്പിച്ച രേഖകളിൽ വ്യക്തമാക്കിയിരുന്നു. പരിശോധന പൂർത്തിയായ ശേഷമേ കേസുമായി ബന്ധപ്പെട്ട കൂടുതൽ വിവരങ്ങൾ പുറത്തുവരൂ.
