ഇടുക്കി: അണക്കരയിൽ നിന്ന് കട്ടപ്പനയിലേക്ക് രോഗിയുമായി പോയ ആംബുലൻസ് അപകടത്തിൽപ്പെട്ട് രോഗി മരിച്ചു. അണക്കര സ്വദേശി രാജൻ ആണ് മരിച്ചത്.
അണക്കരയിലെ സ്വകാര്യ ആശുപത്രിയിൽ ചികിത്സയിലായിരുന്ന രാജന് ശ്വാസംമുട്ടൽ കൂടിയതിനെ തുടർന്നാണ് കട്ടപ്പനയിലേക്ക് ആംബുലൻസിൽ കൊണ്ടുപോയത്. ഇതിനിടെയാണ് ഇടുക്കി–കുമളി റോഡിലെ അണക്കര പാറക്കടവിൽ ആംബുലൻസ് മറിഞ്ഞത്.
അപകടത്തിൽ രാജൻ മരിക്കുകയും ആംബുലൻസ് ഡ്രൈവർക്ക് പരുക്കേൽക്കുകയും ചെയ്തു. പരുക്കേറ്റ ഡ്രൈവറെ ആശുപത്രിയിൽ പ്രവേശിപ്പിച്ചു.
നാലുപേരാണ് ആംബുലൻസിൽ ഉണ്ടായിരുന്നത്. അപകടത്തിന്റെ കൂടുതൽ വിവരങ്ങൾ ലഭ്യമായിട്ടില്ല. സംഭവത്തിൽ അധികൃതർ തുടർനടപടികൾ സ്വീകരിച്ചുവരികയാണ്.
