ശബരിമല: അയ്യപ്പസന്നിധിയിലെ വെടിവഴിപാട് ഇത്തവണ ദേവസ്വം ബോർഡ് ലേലത്തിൽ നിന്ന് ഒഴിവാക്കി. ശബരിമല പെരിയാർ കടുവാ സങ്കേതത്തിനുള്ളിലായതിനാൽ സ്ഥിരമായി ഉണ്ടാകുന്ന വെടിയൊച്ച വന്യമൃഗങ്ങൾക്ക് ശല്യമാകുമെന്ന വനം വകുപ്പിന്റെ എതിർപ്പാണ് തീരുമാനത്തിന് പിന്നിൽ.
ശബരിമലയിൽ വെടിവഴിപാട് നടത്തുന്നതുമായി ബന്ധപ്പെട്ട് വനം വകുപ്പ് എതിർപ്പ് അറിയിച്ചിരുന്നു. തീർഥാടന കാലത്ത് സ്ഥിരമായി ഉണ്ടാകുന്ന വെടിയൊച്ച വന്യമൃഗങ്ങളുടെ സ്വാഭാവിക ആവാസവ്യവസ്ഥയെ ബാധിക്കുമെന്ന ആശങ്കയാണ് വകുപ്പ് ഉന്നയിച്ചത്. ഇതു പരിഗണിച്ചാണ് ഇത്തവണത്തെ ലേലത്തിൽ വെടിവഴിപാട് ഉൾപ്പെടുത്താതിരിക്കാൻ ദേവസ്വം ബോർഡ് തീരുമാനിച്ചത്.
അതേസമയം, വെടിവഴിപാടിനായി ഉപയോഗിക്കുന്ന വെടിമരുന്നിന്റെ സംഭരണവുമായി ബന്ധപ്പെട്ട് ആവശ്യമായ അനുമതികളും സുരക്ഷാ പരിശോധനകളും ഉണ്ടായിരുന്നുവെന്നാണ് ലഭിക്കുന്ന വിവരം.
500 കിലോ വെടിമരുന്ന് സൂക്ഷിക്കാൻ അനുമതി
500 കിലോ വെടിമരുന്ന് സൂക്ഷിക്കുന്നതിന് ചെന്നൈയിലെ എക്സ്പ്ലോസീവ് കൺട്രോളറുടെ അനുമതി ദേവസ്വം ബോർഡിനുണ്ടായിരുന്നു. ജില്ലാ കലക്ടറുടെ ലൈസൻസിനും കാലാവധിയുണ്ട്. വെടിവഴിപാടിന്റെ കരാറുകാരൻ കൊച്ചിയിലെ എക്സ്പ്ലോസീവ് കൺട്രോളർ ഓഫീസിൽ നടത്തിയ പരീക്ഷ വിജയിച്ച് സർട്ടിഫിക്കറ്റും നേടിയിട്ടുണ്ട്.
തീർഥാടകർ എത്താത്ത പ്രദേശത്താണ് വെടിമരുന്ന് സൂക്ഷിക്കുന്നതിനുള്ള കെട്ടിടം ഒരുക്കിയിരിക്കുന്നത്. ഇവിടെ അഗ്നിരക്ഷാസേനയും പൊലീസും പരിശോധന നടത്തി സുരക്ഷ ഉറപ്പാക്കിയിട്ടുണ്ട്.
പാറമടകളിൽ അനധികൃതമായി വെടിമരുന്ന് സൂക്ഷിക്കുന്നത് കണ്ടെത്തുന്നതിനായി പ്രവർത്തിക്കുന്ന സംഘവും ശബരിമലയിലെ വെടിമരുന്ന് സംഭരണ കേന്ദ്രത്തിൽ പരിശോധന നടത്തിയിരുന്നു.
എന്നാൽ വെടിമരുന്ന് സംഭരണവുമായി ബന്ധപ്പെട്ട സുരക്ഷാ അനുമതികളും പരിശോധനകളും ഉണ്ടായിരുന്ന സാഹചര്യത്തിലും, വെടിവഴിപാടിൽ നിന്നുണ്ടാകുന്ന വെടിയൊച്ച വന്യമൃഗങ്ങളെ ബാധിക്കുമെന്ന വനം വകുപ്പിന്റെ എതിർപ്പിനാണ് ഇത്തവണ മുൻതൂക്കം ലഭിച്ചത്. ഇതോടെയാണ് വെടിവഴിപാട് ലേലത്തിൽ നിന്ന് ഒഴിവാക്കിയത്.
