കാഠ്മണ്ഡു: തേൻ കഴിച്ച് ഗുരുതര ആരോഗ്യപ്രശ്നങ്ങളുണ്ടായതിനെ തുടർന്ന് 59കാരൻ ആശുപത്രിയിൽ. നേപ്പാളിൽ നിന്നുള്ള പ്രാദേശികമായി ശേഖരിച്ച ‘മാഡ് ഹണി’ (Mad Honey) 15–20 മില്ലി കഴിച്ച് ഒരു മണിക്കൂറിനുള്ളിലാണ് ഇയാൾക്ക് ആരോഗ്യപ്രശ്നങ്ങൾ ആരംഭിച്ചത്. ഛർദ്ദി, തലകറക്കം, ഓക്കാനം എന്നിവയ്ക്കൊപ്പം ഹൃദയമിടിപ്പ് മിനിറ്റിൽ 42 ആയി കുറഞ്ഞു. രക്തസമ്മർദ്ദം 60/40ലേക്ക് താഴുകയും ചെയ്തു.
റോഡോഡെൻഡ്രോൺ (മലനിരകളിൽ വളരുന്ന ഒരു സസ്യം) പൂക്കളിൽ നിന്ന് തേനീച്ചകൾ ശേഖരിക്കുന്ന തേൻ ആണ് ‘മാഡ് ഹണി’. ഇതിൽ അടങ്ങിയിരിക്കുന്ന ഗ്രയാനോടോക്സിൻ (Grayanotoxin) എന്ന വിഷാംശമാണ് ഗുരുതരമായ ആരോഗ്യപ്രശ്നങ്ങൾക്ക് കാരണമാകുന്നത്. ഹൃദയത്തിന്റെയും നാഡീവ്യവസ്ഥയുടെയും പ്രവർത്തനത്തെ ഈ വിഷാംശം ബാധിക്കാം. സംഭവത്തെക്കുറിച്ചുള്ള റിപ്പോർട്ട് International Journal of Emergency Medicine-ൽ പ്രസിദ്ധീകരിച്ചിട്ടുണ്ട്.
നേപ്പാളിലും തുർക്കിയിലും നൂറ്റാണ്ടുകളായി മാഡ് ഹണി പരമ്പരാഗത ചികിത്സാരീതികളിൽ ഉപയോഗിക്കുന്നുണ്ട്. ഉയർന്ന രക്തസമ്മർദ്ദം, ദഹനപ്രശ്നങ്ങൾ തുടങ്ങിയവയ്ക്കുള്ള നാടൻ ഔഷധമായാണ് ചിലർ ഇത് ഉപയോഗിക്കുന്നത്.
എന്നാൽ ഇതിലെ വിഷാംശത്തിന്റെ അളവ് ഓരോ തേൻ ശേഖരത്തിലും വ്യത്യാസപ്പെടാം. അതിനാൽ സുരക്ഷിതമായ അളവ് കൃത്യമായി നിർണയിക്കുന്നത് ബുദ്ധിമുട്ടാണ്. ഓൺലൈൻ വിൽപ്പന വ്യാപകമായതോടെ മാഡ് ഹണിയുടെ വീര്യം അറിയാത്ത ഉപഭോക്താക്കളിലേക്കും ഇത് എത്തുന്നുണ്ട്. ദക്ഷിണ കൊറിയ, ഫ്രാൻസ്, ഖത്തർ, അമേരിക്ക എന്നിവിടങ്ങളിൽ ഉൾപ്പെടെ മാഡ് ഹണി കഴിച്ചതിനെ തുടർന്നുള്ള വിഷബാധ കേസുകൾ റിപ്പോർട്ട് ചെയ്തിട്ടുണ്ട്.
മണിക്കൂറുകൾക്കുള്ളിൽ ഹൃദയമിടിപ്പ് താഴാം
മാഡ് ഹണി കഴിച്ചതിന് പിന്നാലെ തലകറക്കം, ഛർദ്ദി, ഹൃദയമിടിപ്പ് കുറയുക, രക്തസമ്മർദ്ദം താഴുക തുടങ്ങിയ ലക്ഷണങ്ങൾ ഉണ്ടാകാം. ചിലരിൽ അലർജി, ബോധാവസ്ഥയിലെ മാറ്റങ്ങൾ തുടങ്ങിയവയും റിപ്പോർട്ട് ചെയ്തിട്ടുണ്ട്. ഗുരുതരമായ ഹൃദയമിടിപ്പ് കുറവും രക്തസമ്മർദ്ദം താഴുന്നതും ഹൃദയാഘാതം പോലുള്ള അവസ്ഥയിലേക്ക് നയിച്ചേക്കാം. തേൻ കഴിച്ചതിന്റെ വിവരം ഡോക്ടർമാരോട് പറയാത്ത പക്ഷം ശരിയായ കാരണം കണ്ടെത്താനും വൈകാം.
പാരമ്പര്യത്തിൽ നിന്ന് ആഗോള വിപണിയിലേക്ക്
നേപ്പാളിലെ ഗുരുങ് വിഭാഗത്തിന്റെ പാരമ്പര്യവുമായി മാഡ് ഹണിക്ക് അടുത്ത ബന്ധമുണ്ട്. ഹിമാലയൻ മലഞ്ചെരിവുകളിൽ കാണപ്പെടുന്ന Apis laboriosa എന്ന ഭീമൻ തേനീച്ചകൾ റോഡോഡെൻഡ്രോൺ പൂക്കളിൽ നിന്ന് തേൻ ശേഖരിച്ചാണ് ഇത് ഉൽപ്പാദിപ്പിക്കുന്നത്.
ഏകദേശം 13,000 അടി ഉയരമുള്ള കുത്തനെയുള്ള പാറക്കെട്ടുകളിലാണ് ഇവയുടെ വലിയ തേൻകൂടുകൾ കാണപ്പെടുന്നത്. റോഡോഡെൻഡ്രോൺ പൂക്കളുടെ സാന്നിധ്യം കൂടുതലുള്ള വസന്തകാലത്ത് തേൻനിലെ വിഷാംശത്തിന്റെ അളവും ഉയർന്നേക്കാം. നേപ്പാളിലെ വിവിധ പ്രദേശങ്ങളിൽ നിന്ന് തേനും റോഡോഡെൻഡ്രോൺ പൂക്കളും ശേഖരിച്ച് വിഷാംശത്തിന്റെ അളവും തരവും പഠിക്കാനുള്ള ശ്രമങ്ങളും ഗവേഷകർ നടത്തിവരികയാണ്.
