ന്യൂഡൽഹി: ബിജെപി നേതാവും മഹിളാ മോർച്ച മുൻ സംസ്ഥാന അധ്യക്ഷയുമായ നിവേദിത സുബ്രഹ്മണ്യനെ ദേശീയ വനിതാ കമ്മിഷൻ അംഗമായി കേന്ദ്ര സർക്കാർ നിയമിച്ചു. മൂന്ന് വർഷത്തേക്കാണ് നിയമനം. കേന്ദ്ര വനിതാ-ശിശു വികസന മന്ത്രാലയം സെപ്റ്റംബർ 24ന് പുറത്തിറക്കിയ ഗസറ്റ് വിജ്ഞാപനത്തിലാണ് നിയമനം വ്യക്തമാക്കുന്നത്. ചുമതലയേൽക്കുന്ന തീയതി മുതൽ മൂന്ന് വർഷം, 65 വയസ് പൂർത്തിയാകുന്നത്, അല്ലെങ്കിൽ കേന്ദ്രത്തിന്റെ അടുത്ത ഉത്തരവ് — ഇവയിൽ ഏതാണ് ആദ്യം സംഭവിക്കുന്നത് അതുവരെയാണ് കാലാവധി.
ഉത്തർപ്രദേശിൽ നിന്നുള്ള അർച്ചന മിശ്രയെയും നിവേദിതയ്ക്കൊപ്പം ദേശീയ വനിതാ കമ്മിഷൻ അംഗമായി കേന്ദ്ര സർക്കാർ നാമനിർദേശം ചെയ്തിട്ടുണ്ട്. ദേശീയ വനിതാ കമ്മിഷൻ നിയമം, 1990ലെ സെക്ഷൻ 3 പ്രകാരമാണ് നിയമനം.
ഗുരുവായൂർ സ്വദേശിനിയായ നിവേദിത നിലവിൽ ബിജെപിയുടെ തൃശൂർ നോർത്ത് ജില്ലാ പ്രസിഡന്റാണ്. മഹിളാ മോർച്ചയുടെ സംസ്ഥാന അധ്യക്ഷയായും അവർ പ്രവർത്തിച്ചിട്ടുണ്ട്. 2016ലെ നിയമസഭാ തിരഞ്ഞെടുപ്പിൽ ഗുരുവായൂർ മണ്ഡലത്തിൽ നിന്ന് മത്സരിച്ചാണ് നിവേദിത രാഷ്ട്രീയ രംഗത്ത് ശ്രദ്ധേയമായ സാന്നിധ്യമായത്.
2024ലെ ലോക്സഭാ തിരഞ്ഞെടുപ്പിൽ പൊന്നാനി മണ്ഡലത്തിൽ നിന്ന് എൻഡിഎ സ്ഥാനാർഥിയായും നിവേദിത മത്സരിച്ചു.
ദേശീയ വനിതാ കമ്മിഷൻ സ്ത്രീകളുടെ അവകാശ സംരക്ഷണം, സ്ത്രീകൾക്കെതിരായ അതിക്രമങ്ങളുമായി ബന്ധപ്പെട്ട പരാതികൾ, നിയമങ്ങളുടെ നടപ്പാക്കൽ തുടങ്ങിയ വിഷയങ്ങളിൽ ഇടപെടുന്ന ദേശീയതലത്തിലുള്ള നിയമപരമായ സ്ഥാപനമാണ്. പരാതികളിൽ അന്വേഷണം നടത്താനും ബന്ധപ്പെട്ട അധികാരികളോട് നടപടി ആവശ്യപ്പെടാനും കമ്മിഷന് അധികാരങ്ങളുണ്ട്.
