തൃശൂർ: വടക്കാഞ്ചേരി കൊളത്താശ്ശേരിയിൽ യുവാവ് കുത്തേറ്റു മരിച്ചു. തെക്കുംകര സ്വദേശി സോളമൻ (38) ആണ് മരിച്ചത്. കട്ടിലപ്പൂവം സ്വദേശി എൽദോസാണ് പ്രതിയെന്ന് പൊലീസ്.
ഇന്ന് ഉച്ചതിരിഞ്ഞ് മൂന്നുമണിയോടെയാണ് സംഭവം. എൽദോസിന്റെ വീട്ടിൽ സോളമനും മറ്റ് രണ്ട് സുഹൃത്തുക്കളുമടക്കം നാലുപേർ ചേർന്ന് മദ്യപിക്കുന്നതിനിടെയാണ് വാക്കുതർക്കമുണ്ടായത്. തുടർന്നുണ്ടായ സംഘർഷത്തിനിടെയാണ് സോളമന് കുത്തേറ്റത്.
കുത്തേറ്റ സോളമനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. സംഭവത്തിന് പിന്നാലെ എൽദോസ് സമീപത്തെ കാട്ടിലേക്ക് ഓടി രക്ഷപ്പെട്ടതായാണ് വിവരം. ഇയാൾക്കായി പൊലീസ് തിരച്ചിൽ ആരംഭിച്ചിട്ടുണ്ട്.
സോളമനും എൽദോസും ഒരുമിച്ച് തടിപ്പണി ചെയ്തിരുന്നവരാണെന്നും പൊലീസ് പറയുന്നു. എൽദോസ് നിരവധി കേസുകളിൽ പ്രതിയാണെന്നും പൊലീസ് അറിയിച്ചു.
സംഭവസമയത്ത് ഒപ്പമുണ്ടായിരുന്ന രണ്ട് പേരിൽ ഒരാളെ വടക്കാഞ്ചേരി പൊലീസ് കസ്റ്റഡിയിലെടുത്തിട്ടുണ്ട്. ഇയാളിൽനിന്ന് സംഭവത്തെക്കുറിച്ച് പൊലീസ് വിവരങ്ങൾ ശേഖരിച്ചുവരികയാണ്.
കൊലപാതകത്തിലേക്ക് നയിച്ച വാക്കുതർക്കത്തിന്റെ കാരണം ഉൾപ്പെടെയുള്ള കാര്യങ്ങൾ പൊലീസ് അന്വേഷിച്ചുവരികയാണ്. സംഭവസ്ഥലത്തും പരിസരത്തും പരിശോധന നടത്തിയ പൊലീസ് പ്രതിക്കായുള്ള അന്വേഷണം ഊർജിതമാക്കി.
