മുംബൈ: ഒരുകാലത്ത് ക്രിക്കറ്റ് മൈതാനത്ത് തകർത്തടിച്ച ബാറ്റിംഗ് പ്രകടനങ്ങളിലൂടെ ആരാധകരുടെ മനസിൽ ഇടം നേടിയ വിനോദ് കാംബ്ലിയുടെ പുതിയ വീഡിയോ സമൂഹമാധ്യമങ്ങളിൽ ശ്രദ്ധ നേടുന്നു. ആരോഗ്യപ്രശ്നങ്ങളെത്തുടർന്ന് താനിപ്പോൾ വയോജന പരിപാലന കേന്ദ്രത്തിൽ കഴിയുകയാണെന്ന് മുൻ ഇന്ത്യൻ താരം വീഡിയോയിൽ വ്യക്തമാക്കി.
താനെയിലെ നിദാൻ സെന്റർ ഫോർ എൽഡർലി കെയർ എന്ന വയോജന പരിപാലന കേന്ദ്രത്തിലാണ് കാംബ്ലി നിലവിൽ കഴിയുന്നത്. ഇവിടെ ലഭിക്കുന്ന പരിചരണത്തെയും സൗകര്യങ്ങളെയും അദ്ദേഹം വീഡിയോയിൽ പ്രശംസിച്ചു.
ചികിത്സയുടെ ഭാഗമായി ഇവിടെ കഴിയുകയാണെന്നും കേന്ദ്രത്തിലെ അന്തരീക്ഷം തനിക്ക് ആശ്വാസം നൽകുന്നുണ്ടെന്നും കാംബ്ലി പറഞ്ഞു. വീട്ടിൽനിന്ന് അകലെ കഴിയുന്നുവെന്ന തോന്നൽ പോലും ഇവിടെയുണ്ടാകുന്നില്ലെന്നും ജീവനക്കാരിൽനിന്നും മറ്റുള്ളവരിൽനിന്നും സ്നേഹവും ആദരവും ലഭിക്കുന്നുണ്ടെന്നും അദ്ദേഹം വ്യക്തമാക്കി.
എന്നാൽ സംസാരിക്കുന്നതിനിടെ കാംബ്ലിയുടെ വാക്കുകൾ പലപ്പോഴും ഇടറുന്നുണ്ട്. ആരോഗ്യപ്രശ്നങ്ങൾ അദ്ദേഹത്തിന്റെ സംസാരത്തെയും ശാരീരികാവസ്ഥയെയും ബാധിച്ചിട്ടുണ്ടെന്ന് വീഡിയോയിൽനിന്ന് വ്യക്തമാണ്. വയോജന കേന്ദ്രം സന്ദർശിക്കാനെത്തിയവരാണ് കാംബ്ലിയുമായി സംസാരിക്കുന്ന ദൃശ്യങ്ങൾ പകർത്തിയത്.
ക്രിക്കറ്റ് കരിയറിൽ ഇന്ത്യക്കായി 17 ടെസ്റ്റ് മത്സരങ്ങളും 104 ഏകദിനങ്ങളും കളിച്ച കാംബ്ലി ശ്രദ്ധേയമായ പ്രകടനങ്ങളാണ് പുറത്തെടുത്തത്. ടെസ്റ്റിൽ 1084 റൺസും ഏകദിനത്തിൽ 2477 റൺസുമാണ് അദ്ദേഹത്തിന്റെ സമ്പാദ്യം. ടെസ്റ്റ് ക്രിക്കറ്റിൽ നാല് സെഞ്ചുറികളും ഏകദിനത്തിൽ രണ്ട് സെഞ്ചുറികളും കാംബ്ലിയുടെ പേരിലുണ്ട്.
എന്നാൽ രാജ്യാന്തര ക്രിക്കറ്റിൽനിന്ന് വിരമിച്ചതിന് ശേഷമുള്ള വർഷങ്ങൾ കാംബ്ലിക്ക് അത്ര എളുപ്പമായിരുന്നില്ല. ആരോഗ്യപ്രശ്നങ്ങൾക്കൊപ്പം സാമ്പത്തിക പ്രതിസന്ധികളും അദ്ദേഹത്തെ വേട്ടയാടി. പല ഘട്ടങ്ങളിലും അദ്ദേഹത്തിന്റെ ആരോഗ്യനിലയെക്കുറിച്ചുള്ള വാർത്തകൾ പുറത്തുവന്നിരുന്നു.
