കൊച്ചി: കെഎസ്ആർടിസിയുടെ പ്രിയദർശിനി ബസിൽ പ്ലസ് ടു വിദ്യാർഥിനിയെ അസഭ്യം പറയുകയും സ്ത്രീത്വത്തെ അപമാനിക്കുകയും ചെയ്തെന്ന പരാതിയിൽ കണ്ടക്ടർക്ക് സസ്പെൻഷൻ. കണ്ടക്ടറുടെ ഭാഗത്തുനിന്ന് ഗുരുതരമായ വീഴ്ചയുണ്ടായെന്ന വിജിലൻസ് റിപ്പോർട്ടിന്റെ അടിസ്ഥാനത്തിലാണ് കെഎസ്ആർടിസി സിഎംഡി ഡോ. പി.എസ്. പ്രമോജ് ശങ്കർ നടപടി സ്വീകരിച്ചത്. സംഭവത്തിൽ ഉൾപ്പെട്ട മൂന്ന് യാത്രക്കാർക്കെതിരെയും നോർത്ത് പറവൂർ പൊലീസ് കേസെടുത്തിട്ടുണ്ട്.
ഗുരുവായൂർ–എറണാകുളം റൂട്ടിൽ സർവീസ് നടത്തുന്ന ലിമിറ്റഡ് സ്റ്റോപ്പ് പ്രിയദർശിനി ബസിൽ വച്ചാണ് പ്ലസ് ടു വിദ്യാർഥിനിക്ക് ദുരനുഭവമുണ്ടായതെന്നാണ് പരാതി. വിദ്യാർഥിനിയെ കണ്ടക്ടർ പരസ്യമായി അധിക്ഷേപിക്കുകയും അർഹമായ കൺസെഷൻ സീറോ ടിക്കറ്റ് നൽകാൻ വിസമ്മതിക്കുകയും ചെയ്തെന്നാണ് ആരോപണം.
തുടർന്ന് പണം വാങ്ങി ടിക്കറ്റ് നൽകിയെങ്കിലും മറ്റ് യാത്രക്കാരുടെ മുന്നിൽവച്ച് ഉച്ചത്തിൽ സംസാരിച്ച് അപമാനിച്ചെന്നും വിദ്യാർഥിനി പരാതിയിൽ പറയുന്നു.
‘നിന്നെ കണ്ടാൽ ഞങ്ങൾക്ക് പെണ്ണായി തോന്നുന്നില്ല’ എന്ന് കണ്ടക്ടർ പറഞ്ഞതായും പരാതിയിലുണ്ട്. കൂടാതെ, ‘നീ പെണ്ണാണോ എന്ന് അറിയാൻ ഡ്രസ്സ് ഊരി നോക്കേണ്ടി വരും, അല്ലെങ്കിൽ നെറ്റിയിൽ എഴുതിയൊട്ടിക്കണം’ എന്ന തരത്തിൽ അസഭ്യമായി സംസാരിച്ചെന്നും വിദ്യാർഥിനി പറവൂർ പൊലീസിന് നൽകിയ പരാതിയിൽ ആരോപിക്കുന്നു.
മറ്റ് യാത്രക്കാരോട് വിദ്യാർഥിനിയെ ചൂണ്ടിക്കാട്ടി ‘ഇതിനെ കണ്ടാൽ പെണ്ണാണെന്ന് തോന്നുമോ’ എന്ന് ചോദിച്ച് അവരെക്കൊണ്ടും അധിക്ഷേപിക്കാൻ അവസരമുണ്ടാക്കിയെന്നും പരാതിയിൽ പറയുന്നു.
മൂന്ന് യാത്രക്കാർക്കെതിരെയും കേസ്
സംഭവത്തിൽ കണ്ടക്ടർക്ക് പുറമെ മൂന്ന് യാത്രക്കാർക്കെതിരെയും നോർത്ത് പറവൂർ പൊലീസ് കേസ് രജിസ്റ്റർ ചെയ്തിട്ടുണ്ട്. സംഭവത്തെ തുടർന്ന് വിദ്യാർഥിനിക്ക് കടുത്ത മാനസിക ബുദ്ധിമുട്ടും നാണക്കേടും ഉണ്ടായതായാണ് പരാതി.
കുറ്റക്കാർക്കെതിരെ ശക്തമായ നടപടി സ്വീകരിച്ച് നീതി ഉറപ്പാക്കണമെന്ന് ആവശ്യപ്പെട്ടാണ് വിദ്യാർഥിനി പൊലീസിനെയും കെഎസ്ആർടിസി അധികൃതരെയും സമീപിച്ചത്. പരാതിയെ തുടർന്ന് നടത്തിയ വിജിലൻസ് പരിശോധനയിലാണ് കണ്ടക്ടറുടെ ഭാഗത്ത് ഗുരുതരമായ വീഴ്ച കണ്ടെത്തിയതെന്നാണ് കെഎസ്ആർടിസി വ്യക്തമാക്കുന്നത്.
പൊലീസ് കേസിൽ തുടർ അന്വേഷണം നടത്തുന്നതിനൊപ്പം കെഎസ്ആർടിസിയുടെ ആഭ്യന്തര നടപടികളും തുടരും.
