അംബാല: ഹരിയാനയിലെ അംബാലയിൽ നിർമാണത്തിലിരുന്ന മൂന്ന് നില കെട്ടിടം തകർന്നുവീണ് ആറ് പേർ മരിച്ചു. ദുൽകോട്ട് ഗ്രാമത്തിലാണ് അപകടമുണ്ടായത്. തൊഴിലാളികൾ കെട്ടിടത്തിൽ ജോലി ചെയ്തുകൊണ്ടിരിക്കെയാണ് അപ്രതീക്ഷിതമായി കെട്ടിടം തകർന്നുവീണത്.
അപകടത്തിൽ 15ലേറെ പേർ കെട്ടിടാവശിഷ്ടങ്ങൾക്കിടയിൽ കുടുങ്ങിയതായാണ് പ്രാഥമിക വിവരം. വിവരം ലഭിച്ച ഉടൻ പൊലീസ്, സർക്കാർ ഉദ്യോഗസ്ഥർ, അഗ്നിരക്ഷാസേന എന്നിവർ സ്ഥലത്തെത്തി രക്ഷാപ്രവർത്തനം ആരംഭിച്ചു.
രക്ഷാപ്രവർത്തനത്തിനിടെ 13 പേരെ അവശിഷ്ടങ്ങൾക്കിടയിൽ നിന്ന് രക്ഷപ്പെടുത്തി. ഇതിനിടെ ഇന്ന് രാവിലെ ഒരാളുടെ മൃതദേഹം കൂടി കണ്ടെത്തിയതോടെയാണ് മരണസംഖ്യ ആറായി ഉയർന്നത്. അപകടത്തിൽ മരിച്ചവരുടെ മൃതദേഹങ്ങൾ എല്ലാം കണ്ടെത്തിയതായി അധികൃതർ അറിയിച്ചു.
കുടിയേറ്റ തൊഴിലാളികളും അപകടത്തിൽ
അപകടത്തിൽപ്പെട്ടവരിൽ നിരവധി പേർ കുടിയേറ്റ തൊഴിലാളികളാണെന്നാണ് വിവരം. നിർമാണത്തിലിരുന്ന കെട്ടിടം പെട്ടെന്ന് തകർന്നുവീണതോടെ തൊഴിലാളികൾക്ക് പുറത്തേക്ക് രക്ഷപ്പെടാൻ അവസരം ലഭിക്കാതെ അവശിഷ്ടങ്ങൾക്കിടയിൽ കുടുങ്ങുകയായിരുന്നു.
ദേശീയ ദുരന്ത നിവാരണ സേന, സംസ്ഥാന ദുരന്ത നിവാരണ സേന, അഗ്നിശമന വകുപ്പ് എന്നിവയുടെ നേതൃത്വത്തിലാണ് രക്ഷാപ്രവർത്തനം പുരോഗമിക്കുന്നത്. അവശിഷ്ടങ്ങൾക്കിടയിൽ ഇനിയും ആരെങ്കിലും കുടുങ്ങിക്കിടക്കുന്നുണ്ടോയെന്ന് കണ്ടെത്തുന്നതിനായി പരിശോധന തുടരുകയാണ്.
