തിരുവനന്തപുരം: കേരള സംസ്ഥാന വഖഫ് ബോർഡ് പിരിച്ചുവിടാനുള്ള നിയമവഴികൾ പരിശോധിച്ച് സംസ്ഥാന സർക്കാർ. കെ.എസ്. ഹംസ അധ്യക്ഷനായ നിലവിലെ ബോർഡ് പുനഃസംഘടിപ്പിക്കുന്നതിന്റെ ഭാഗമായാണ് സർക്കാർ നടപടി ആലോചിക്കുന്നത്. അംഗങ്ങളിൽ പലർക്കും ചട്ടപ്രകാരമുള്ള യോഗ്യതയില്ലെന്ന നിലപാടാണ് സർക്കാരിനുള്ളത്.
കഴിഞ്ഞ ഫെബ്രുവരിയിൽ രൂപീകരിച്ച ബോർഡിന്റെ ഘടന സംബന്ധിച്ച് നേരത്തെ തന്നെ നിയമപ്രശ്നങ്ങൾ ഉയർന്നിരുന്നു. വഖഫ് നിയമത്തിലെ വ്യവസ്ഥകൾ അനുസരിച്ചുള്ള പ്രാതിനിധ്യം പാലിച്ചല്ല ബോർഡ് രൂപീകരിച്ചതെന്ന നിലപാട് സർക്കാർ ഹൈക്കോടതിയിൽ അറിയിച്ചിരുന്നു.
ബോർഡിന്റെ ഘടന ചോദ്യം ചെയ്തുള്ള ഹർജികൾ പരിഗണിച്ച ഹൈക്കോടതി, നിലവിലെ സാഹചര്യത്തിൽ ബോർഡിന്റെ പുനഃസംഘടന സംബന്ധിച്ച് സർക്കാർ നിലപാട് വ്യക്തമാക്കണമെന്ന് ആവശ്യപ്പെട്ടിരുന്നു. തുടർന്ന് സർക്കാർ പുനഃസംഘടന ആവശ്യമാണെന്ന് കോടതിയെ അറിയിച്ചു.
അതേസമയം, ബോർഡിന്റെ പ്രവർത്തനവുമായി ബന്ധപ്പെട്ട് ഹൈക്കോടതി നേരത്തെ നിയന്ത്രണങ്ങളും ഏർപ്പെടുത്തിയിരുന്നു. ജൂലൈയിൽ പുറപ്പെടുവിച്ച ഇടക്കാല ഉത്തരവിൽ ബോർഡിന് നയപരമായ തീരുമാനങ്ങൾ എടുക്കുന്നതിന് വിലക്ക് ഏർപ്പെടുത്തിയിരുന്നു.
ഈ സാഹചര്യത്തിലാണ് നിലവിലെ ബോർഡ് പിരിച്ചുവിട്ട് പുതിയ ഘടനയിലേക്ക് നീങ്ങാനുള്ള നിയമസാധ്യത സർക്കാർ പരിശോധിക്കുന്നത്. എന്നാൽ അംഗങ്ങളുടെ നിയമപരമായ സ്ഥിതി സംബന്ധിച്ച് കോടതിവിധികളും മറ്റ് നടപടികളും നിലനിൽക്കുന്നതിനാൽ നേരിട്ട് തീരുമാനമെടുക്കുന്നതിന് നിയമപരമായ തടസ്സങ്ങളുണ്ടാകാമെന്നാണ് സർക്കാർ വിലയിരുത്തൽ.
നിലവിലെ ബോർഡിന്റെ കാലാവധി ഇനിയും ഏകദേശം നാലര വർഷം ബാക്കിയുള്ളപ്പോഴാണ് പിരിച്ചുവിടൽ. പുതിയ ബോർഡ് രൂപീകരിക്കുമ്പോൾ അംഗങ്ങളുടെ യോഗ്യതയും നിയമപ്രകാരമുള്ള പ്രാതിനിധ്യവും ഉറപ്പാക്കേണ്ടതുണ്ട്. രണ്ട് അമുസ്ലിം അംഗങ്ങളെ ഉൾപ്പെടുത്തുന്നതുമായി ബന്ധപ്പെട്ട വിഷയവും നിലവിൽ കോടതിയുടെ പരിഗണനയിലുള്ളതാണ്. അന്തിമവിധിക്ക് ശേഷമായിരിക്കും ഇക്കാര്യത്തിൽ വ്യക്തമായ തീരുമാനമെടുക്കുകയെന്ന വിവരവും പുറത്തുവരുന്നുണ്ട്.
വിഷയം അടുത്ത മന്ത്രിസഭാ യോഗത്തിൽ ചർച്ച ചെയ്യാനാണ് സർക്കാർ നീക്കം. നിയമപരമായ പരിശോധനകൾ പൂർത്തിയാക്കിയ ശേഷമായിരിക്കും ബോർഡ് പിരിച്ചുവിടൽ സംബന്ധിച്ച അന്തിമ തീരുമാനം.
