തിരുവനന്തപുരം: അനധികൃത ഫ്ലക്സ് ബോർഡുകൾക്കെതിരെ നടപടി സ്വീകരിക്കുന്ന കേരള പൊലീസിന് തന്നെ നഗരസഭയുടെ പിഴ. തിരുവനന്തപുരം നഗരസഭാ പരിധിയിലെ പൊതുസ്ഥലങ്ങളിൽ അനധികൃതമായി ഫ്ലക്സ് ബോർഡുകൾ സ്ഥാപിച്ചതിന് കേരള പൊലീസിന് ₹15,030 പിഴ ചുമത്തി. സംഭവത്തിൽ സംസ്ഥാന പൊലീസ് മേധാവിക്ക് നഗരസഭാ സെക്രട്ടറി നോട്ടീസ് അയച്ചു.
കാൽനടയാത്രക്കാർക്കും വാഹന ഗതാഗതത്തിനും തടസ്സമുണ്ടാക്കുന്ന രീതിയിൽ പിഎംജി, വഴുതക്കാട് മേഖലകളിലാണ് ഫ്ലക്സ് ബോർഡുകൾ സ്ഥാപിച്ചിരുന്നത്. ഏതാനും ആഴ്ചകൾക്ക് മുമ്പ് തിരുവനന്തപുരത്ത് നടന്ന പൊലീസ് കായിക മേളയുടെ പ്രചാരണത്തിനായാണ് ഈ ബോർഡുകൾ സ്ഥാപിച്ചതെന്നാണ് വിവരം.
പൊതുസ്ഥലങ്ങളിലെ അനധികൃത ബോർഡുകൾ നീക്കം ചെയ്യണമെന്നും നിയമം ലംഘിച്ച് അവ സ്ഥാപിക്കുന്നവർക്കെതിരെ കർശന നടപടി സ്വീകരിക്കണമെന്നും നിർദേശിക്കുന്ന കേരള ഹൈക്കോടതി ഉത്തരവിന്റെ അടിസ്ഥാനത്തിലാണ് നഗരസഭ നടപടി സ്വീകരിച്ചത്.
പൊലീസ് മേധാവിക്ക് നോട്ടീസ്
നിയമലംഘനം ചൂണ്ടിക്കാട്ടി തിരുവനന്തപുരം നഗരസഭ നൽകിയ പിഴ നോട്ടീസ് സംസ്ഥാന പൊലീസ് മേധാവി തുടർനടപടികൾക്കായി കായിക മേളയുടെ സംഘാടകരായ ഉദ്യോഗസ്ഥർക്ക് കൈമാറി. നഗരസഭ ചുമത്തിയ പിഴത്തുക അടയ്ക്കാനും ബന്ധപ്പെട്ട ഉദ്യോഗസ്ഥർക്ക് നിർദേശം നൽകിയിട്ടുണ്ട്.
പൊതുസ്ഥലങ്ങളിൽ നിയമവിരുദ്ധമായി ഫ്ലക്സ് ബോർഡുകളും പരസ്യങ്ങളും സ്ഥാപിക്കുന്നവർക്കെതിരെ തദ്ദേശ സ്ഥാപനങ്ങളും പൊലീസും നടപടി സ്വീകരിക്കേണ്ട സാഹചര്യത്തിലാണ് നിയമപാലകരുടെ ഭാഗത്തുനിന്നുതന്നെ ഇത്തരമൊരു നിയമലംഘനം ഉണ്ടായത്.
തിരുവനന്തപുരം നഗരസഭ നേരത്തെയും പൊതുസ്ഥലങ്ങളിൽ അനധികൃതമായി സ്ഥാപിച്ച ഫ്ലക്സ് ബോർഡുകൾക്കെതിരെ നടപടിയെടുത്തിട്ടുണ്ട്. രാഷ്ട്രീയ പാർട്ടികളും വിവിധ സംഘടനകളും സ്ഥാപിച്ച ബോർഡുകൾക്കെതിരെയും നഗരസഭ നടപടി സ്വീകരിച്ചിട്ടുള്ള സാഹചര്യത്തിലാണ് ഇപ്പോൾ പൊലീസ് കായിക മേളയുടെ പ്രചാരണ ബോർഡുകൾക്കെതിരായ നടപടി ശ്രദ്ധേയമാകുന്നത്.
