തിരുവനന്തപുരം: സംസ്ഥാനത്ത് വൈദ്യുതി നിരക്ക് വര്ധിച്ചേക്കുമെന്ന സൂചന നല്കി കെഎസ്ഇബി ചെയര്മാന് എം.ജി. രാജമാണിക്യം. കഴിഞ്ഞ മൂന്ന് മാസത്തിനിടെ 1500 കോടിയിലേറെ രൂപയുടെ വൈദ്യുതി പുറത്തുനിന്ന് വാങ്ങിയതായി അദ്ദേഹം വ്യക്തമാക്കി. വൈദ്യുതി നിരക്ക് വര്ധിപ്പിക്കുമോ എന്ന ചോദ്യത്തിന്, വലിയ തോതില് വൈദ്യുതി വാങ്ങിയതിന്റെ കണക്ക് റെഗുലേറ്ററി കമ്മിറ്റിക്ക് കൈമാറുമെന്നും നിരക്ക് സംബന്ധിച്ച് തീരുമാനമെടുക്കേണ്ടത് കമ്മിറ്റിയാണെന്നും രാജമാണിക്യം പറഞ്ഞു. വൈദ്യുതി പ്രതിസന്ധി ഒക്ടോബര് മാസത്തോടെ പരിഹരിക്കാനാകുമെന്നാണ് പ്രതീക്ഷയെന്നും കെഎസ്ഇബി ചെയര്മാന് പറഞ്ഞു.
സംസ്ഥാനത്തെ വൈദ്യുതി ആവശ്യകത ഇപ്പോഴും ഉയര്ന്ന നിലയിലാണ്. കഴിഞ്ഞ ദിവസങ്ങളില് വടക്കേ ഇന്ത്യയിലടക്കം മഴ ലഭിച്ചതോടെ റിയല് ടൈം മാര്ക്കറ്റില് വൈദ്യുതി ലഭ്യത വര്ധിച്ചിരുന്നു. കുറഞ്ഞ നിരക്കില് വൈദ്യുതി വാങ്ങാന് കഴിഞ്ഞതും കെഎസ്ഇബിക്ക് ആശ്വാസമായി. ഒക്ടോബറിലേക്കുള്ള ടെന്ഡര് നടപടികളും കൈമാറ്റ കരാര് അവസാനിച്ചതും വൈദ്യുതി ലഭ്യത ഉറപ്പാക്കാന് സഹായിച്ചിട്ടുണ്ടെന്നും രാജമാണിക്യം പറഞ്ഞു. 500 മെഗാവാട്ടിന്റെ കുറവുണ്ടായാലും റിയല് ടൈം മാര്ക്കറ്റില് നിന്ന് വൈദ്യുതി വാങ്ങാന് കഴിയുമെന്ന് അദ്ദേഹം വ്യക്തമാക്കി.
പീക്ക് സമയത്ത് ആവശ്യത്തിന് മാത്രം വൈദ്യുതി ഉപയോഗിച്ചാല് പുറത്തുനിന്നുള്ള വൈദ്യുതി വാങ്ങല് കുറയ്ക്കാനാകുമെന്നും കെഎസ്ഇബി ചെയര്മാന് പറഞ്ഞു. 2000ല് കേരളം ഉത്പാദിപ്പിച്ച് ഉപയോഗിച്ചിരുന്ന വൈദ്യുതിയുടെ അളവില് കാര്യമായ വര്ധനയില്ലെന്നും 2026ലും ഉത്പാദനം ഏതാണ്ട് അതേ നിലയില് തുടരുകയാണെന്നും അദ്ദേഹം വ്യക്തമാക്കി. അതേസമയം, വൈദ്യുതി നിയന്ത്രണം ശക്തമാക്കാന് കഴിഞ്ഞ വ്യാഴാഴ്ചയും കെഎസ്ഇബിക്ക് സര്ക്കാര് നിര്ദേശം നല്കിയിരുന്നു. വൈദ്യുതി ആവശ്യകത കൂടുതലുള്ള രാത്രി ഏഴ് മുതല് 12 വരെയുള്ള പീക്ക് സമയത്തെ നിയന്ത്രണം തുടരും.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
പീക്ക് സമയത്തെ വൈദ്യുതി ഉപയോഗം പരമാവധി കുറയ്ക്കുകയും ഉയര്ന്ന ലോഡ് രാവിലെ ഒമ്പത് മുതല് വൈകിട്ട് നാല് വരെയുള്ള സമയത്തേക്ക് മാറ്റുകയും ചെയ്യണമെന്നാണ് ഊര്ജവകുപ്പിന്റെ നിര്ദേശം. വാട്ടര് അതോറിറ്റിയുടെ പമ്പിങ് പകല് സമയത്തേക്ക് മാറ്റാനും നിര്ദേശിച്ചിട്ടുണ്ട്. ഷിഫ്റ്റ് അടിസ്ഥാനത്തില് പ്രവര്ത്തിക്കുന്ന വ്യവസായ സ്ഥാപനങ്ങളുടെ പ്രവര്ത്തനം ഓഫ്-പീക്ക്, സോളാര് സമയങ്ങളിലേക്ക് പുനഃക്രമീകരിക്കാനും സര്ക്കാര് ആവശ്യപ്പെട്ടിട്ടുണ്ട്.
