ചണ്ഡിഗഡ്: ഇന്ത്യ-പാകിസ്താന്‍ അതിര്‍ത്തിയില്‍ നുഴഞ്ഞുകയറ്റ ശ്രമം തകര്‍ത്ത് അതിര്‍ത്തി സുരക്ഷാ സേന. പഞ്ചാബിലെ തര്‍ണ്‍ തരണ്‍ മേഖലയിലാണ് പാകിസ്താന്‍ ഭാഗത്തുനിന്ന് ഇന്ത്യന്‍ അതിര്‍ത്തിയിലേക്ക് കടക്കാന്‍ ശ്രമിച്ച രണ്ട് നുഴഞ്ഞുകയറ്റക്കാര്‍ കൊല്ലപ്പെട്ടത്. ഒരാള്‍ തിരികെ പാകിസ്താന്‍ ഭാഗത്തേക്ക് രക്ഷപ്പെട്ടതായി ബിഎസ്എഫ് അറിയിച്ചു. വെള്ളിയാഴ്ച പുലര്‍ച്ചെ 12.30ഓടെയാണ് സംഭവം. തര്‍ണ്‍ തരണ്‍ മേഖലയിലെ ബിഒപി രാജോക്കെ പ്രദേശത്ത് പാകിസ്താന്‍ ഭാഗത്തെ ചട്ടന്‍വാലെയില്‍ നിന്ന് മൂന്ന് പേര്‍ ഇന്ത്യന്‍ അതിര്‍ത്തിയിലേക്ക് നീങ്ങുന്നത് ഉദ്യോഗസ്ഥരുടെ ശ്രദ്ധയില്‍പ്പെടുകയായിരുന്നു.
ഇവരോട് സുരക്ഷാസേന മുന്നറിയിപ്പ് നല്‍കിയെങ്കിലും മുന്നോട്ടുള്ള നീക്കം തുടര്‍ന്നതായാണ് ബിഎസ്എഫ് പറയുന്നത്. തുടര്‍ന്ന് സേന വെടിയുതിര്‍ക്കുകയായിരുന്നു. ഏറ്റുമുട്ടലിനിടെ രണ്ട് നുഴഞ്ഞുകയറ്റക്കാര്‍ കൊല്ലപ്പെട്ടു. വെടിവയ്പിനിടെ മൂന്നാമത്തെയാള്‍ പാകിസ്താന്‍ ഭാഗത്തേക്ക് തിരികെ രക്ഷപ്പെട്ടതായും ഉദ്യേഗസ്ഥര്‍ വ്യക്തമാക്കി. സംഭവത്തെ തുടര്‍ന്ന് അതിര്‍ത്തിയില്‍ സുരക്ഷ ശക്തമാക്കിയിട്ടുണ്ട്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
നുഴഞ്ഞുകയറ്റക്കാരുടെ വ്യക്തിവിവരങ്ങളോ ഇന്ത്യയിലേക്ക് കടക്കാന്‍ ശ്രമിച്ചതിന്റെ ലക്ഷ്യമോ സംബന്ധിച്ച കൂടുതല്‍ വിവരങ്ങള്‍ അധികൃതര്‍ പുറത്തുവിട്ടിട്ടില്ല. പഞ്ചാബിലെ ഇന്ത്യ-പാകിസ്താന്‍ അന്താരാഷ്‌ട്ര അതിര്‍ത്തിയില്‍ നുഴഞ്ഞുകയറ്റ സാധ്യത കണക്കിലെടുത്ത് കനത്ത ജാഗ്രത തുടരുകയാണ്. സംഭവത്തെ തുടര്‍ന്ന് അതിര്‍ത്തി മേഖലയില്‍ സുരക്ഷാ പരിശോധനകളും നിരീക്ഷണവും ശക്തമാക്കിയിട്ടുണ്ട്. പഞ്ചാബിലെ പുതിയ സംഭവത്തിന് പിന്നാലെ അതിര്‍ത്തിയിലെ സുരക്ഷാ സംവിധാനങ്ങള്‍ കൂടുതല്‍ ജാഗ്രതയിലാണ്.
