ന്യൂഡല്‍ഹി: ഇന്ത്യന്‍ വ്യോമസേനയുടെ ശേഷി വര്‍ധിപ്പിക്കാന്‍ ലക്ഷ്യമിട്ടുള്ള 114 റഫാല്‍ യുദ്ധവിമാനങ്ങളുടെ പദ്ധതിയില്‍ നിര്‍ണായക പുരോഗതി. വിമാനങ്ങളുടെ വലിയൊരു ഭാഗം ഇന്ത്യയില്‍ തന്നെ അസംബിള്‍ ചെയ്യുന്നതിനൊപ്പം ഇന്ത്യന്‍ ആയുധങ്ങളും സംവിധാനങ്ങളും പരമാവധി സംയോജിപ്പിക്കാനാണ് നീക്കം. പദ്ധതി ഈ സാമ്പത്തിക വര്‍ഷം അവസാനത്തോടെ ഒരു നിഗമനത്തിലെത്തിക്കാനാകുമെന്നാണ് പ്രതീക്ഷയെന്ന് പ്രതിരോധ സെക്രട്ടറി രാജേഷ് കുമാര്‍ സിംഗ് വ്യക്തമാക്കി.
റഫാല്‍ വിമാനങ്ങളുടെ പുതിയ കരാറില്‍ മുന്‍പത്തേതിനേക്കാള്‍ കൂടുതല്‍ തദ്ദേശീയവല്‍ക്കരണത്തിനാണ് ഇന്ത്യ ശ്രമിക്കുന്നത്. നേരത്തെ ഇന്ത്യന്‍ നാവികസേനയ്‌ക്കായി കരാര്‍ ചെയ്ത റഫാല്‍ മറൈന്‍ വിമാനങ്ങളിലും ഇന്ത്യന്‍ ആയുധങ്ങള്‍ സംയോജിപ്പിക്കാന്‍ ഫ്രാന്‍സ് സമ്മതിച്ചിരുന്നു. പുതിയ പദ്ധതിയില്‍ അതിനേക്കാള്‍ ഒരു പടി കൂടി മുന്നോട്ട് പോകാനാണ് ഇന്ത്യ ലക്ഷ്യമിടുന്നതെന്ന് രാജേഷ് കുമാര്‍ സിംഗ് പറഞ്ഞു.
പ്രതിരോധ സെക്രട്ടറിയുടെ വിശദീകരണമനുസരിച്ച്, ഇത് ‘Buy and Make’ രീതിയിലുള്ള പദ്ധതിയായിരിക്കും. വിമാനങ്ങളുടെ വലിയൊരു ഭാഗം ഇന്ത്യയില്‍ തന്നെ അസംബിള്‍ ചെയ്യുകയും ഇന്ത്യന്‍ സംവിധാനങ്ങളും ആയുധങ്ങളും ഗണ്യമായ തോതില്‍ സംയോജിപ്പിക്കുകയും ചെയ്യും. റഫാല്‍ പദ്ധതിയുടെ ഭൂരിഭാഗം വിമാനങ്ങളും ഇന്ത്യയില്‍ നിര്‍മ്മിക്കണമെന്ന ലക്ഷ്യത്തിന് 2026 ഫെബ്രുവരിയില്‍ പ്രതിരോധ ഏറ്റെടുക്കല്‍ കൗണ്‍സില്‍ അംഗീകാരം നല്‍കിയിരുന്നു.
114 റഫാല്‍ വിമാനങ്ങള്‍ക്കായുള്ള Request for Proposal (RFP) ഘട്ടത്തില്‍ ലഭിച്ച ബിഡുകള്‍ നിലവില്‍ ഔദ്യോഗിക പരിശോധനയിലാണ്. ബിഡുകള്‍ വിലയിരുത്തിയശേഷം ഇന്ത്യന്‍ ഭാഗം തുടര്‍നടപടികളിലേക്ക് കടക്കും. നിലവിലെ നടപടിക്രമങ്ങള്‍ പൂര്‍ത്തിയാക്കി ഈ സാമ്പത്തിക വര്‍ഷം അവസാനിക്കുന്നതിന് മുമ്പ് പദ്ധതിയില്‍ ഒരു നിഗമനത്തിലെത്താനാകുമെന്നാണ് പ്രതീക്ഷയെന്നും പ്രതിരോധ സെക്രട്ടറി വ്യക്തമാക്കി. സ്വദേശീയ യുദ്ധവിമാനമായ LCA Mk2 അഥവാ തേജസ് Mk2 പദ്ധതിയും മുന്നോട്ടുപോകുകയാണെന്ന് രാജേഷ് കുമാര്‍ സിംഗ് പറഞ്ഞു.
പ്രോട്ടോടൈപ്പിന്റെ ആദ്യ പറക്കല്‍ അടുത്ത വര്‍ഷം മധ്യത്തോടെ നടത്താനാണ് നിലവിലെ ലക്ഷ്യം. പ്രോട്ടോടൈപ്പുകള്‍ തയ്യാറായ ശേഷം വ്യോമസേന അവ വിലയിരുത്തുകയും അതിന്റെ അടിസ്ഥാനത്തില്‍ തുടര്‍നടപടികള്‍ തീരുമാനിക്കുകയും ചെയ്യും. തേജസ് Mk2 പദ്ധതിയില്‍ ഘട്ടംഘട്ടമായി ശേഷി വികസിപ്പിക്കുന്ന ‘സ്‌പൈറല്‍ ഡെവലപ്മെന്റ്’ രീതിയാണ് പിന്തുടരേണ്ടതെന്നും പ്രതിരോധ സെക്രട്ടറി വ്യക്തമാക്കി. ഹിന്ദുസ്ഥാന്‍ എയറോനോട്ടിക്‌സ് ലിമിറ്റഡിന്റെ (HAL) നേതൃത്വത്തിലായിരിക്കും പദ്ധതി മുന്നോട്ട് പോകുക.
അതേസമയം സ്വകാര്യ മേഖലയുടെയും MSME സ്ഥാപനങ്ങളുടെയും പങ്കാളിത്തം പദ്ധതിയില്‍ വര്‍ധിപ്പിക്കുമെന്നും അദ്ദേഹം പറഞ്ഞു. വിമാനത്തിന്റെ വലിയ ഘടകങ്ങളും ഫ്യൂസലേജും ഉള്‍പ്പെടെ നിര്‍മ്മിക്കുന്നതില്‍ സ്വകാര്യ കമ്പനികളുടെ പങ്കാളിത്തം ഇതിനകം വര്‍ധിച്ചുവരികയാണെന്നും അദ്ദേഹം ചൂണ്ടിക്കാട്ടി. ഇന്ത്യയുടെ അഞ്ചാം തലമുറ യുദ്ധവിമാന പദ്ധതിയായ AMCA (Advanced Medium Combat Aircraft) ആണ് നിലവില്‍ പ്രധാന ശ്രദ്ധാകേന്ദ്രമെന്നും പ്രതിരോധ സെക്രട്ടറി വ്യക്തമാക്കി.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
വിദേശത്തുനിന്ന് മറ്റൊരു അഞ്ചാം തലമുറ യുദ്ധവിമാന പദ്ധതി ഏറ്റെടുക്കാന്‍ ഇന്ത്യ ഇതുവരെ തീരുമാനിച്ചിട്ടില്ല. രാജ്യത്തിന്റെ സ്വന്തം AMCA പദ്ധതിയിലാണ് ഇപ്പോഴത്തെ പ്രധാന ശ്രദ്ധ. AMCAയ്‌ക്കായി തിരഞ്ഞെടുക്കപ്പെട്ട കമ്പനികളില്‍ നിന്ന് RFP ക്ഷണിച്ചുകഴിഞ്ഞു. പദ്ധതിയുടെ സങ്കീര്‍ണതയും ഈ മേഖലയിലേക്ക് ആദ്യമായി കടന്നുവരുന്ന കമ്പനികളുമാണ് കൂടുതല്‍ സമയം ആവശ്യപ്പെടാന്‍ കാരണമെന്ന് രാജേഷ് കുമാര്‍ സിംഗ് പറഞ്ഞു. അതിനാല്‍ ബിഡ് സമര്‍പ്പിക്കുന്നതിന് കൂടുതല്‍ സമയം അനുവദിക്കുമെന്നും അദ്ദേഹം വ്യക്തമാക്കി.
