39 വർഷത്തിന് ശേഷം അമ്മ തിരിച്ചെത്തി; കാണാതാകുമ്പോൾ ഒരു വയസ്സ്, ഇന്ന് മകനെ കെട്ടിപ്പിടിച്ച് പ്രമീള — കണ്ണീരോടെ അപൂർവ കൂടിച്ചേരൽ
ഭുവനേശ്വർ: 39 വർഷമായി കുടുംബത്തിന്റെ കാത്തിരിപ്പിന് ശുഭപര്യവസാനം, ഒഡീഷ സ്വദേശിനി ഒടുവിൽ വീട്ടിൽ തിരിച്ചെത്തി. കേന്ദ്രപാരയിലെ നന്ദലാൽപട്ടണ സ്വദേശിനി പ്രമീള മാലിക്കാണ് വർഷങ്ങൾക്ക് ശേഷം മകനെയും കുടുംബത്തെയും വീണ്ടും കണ്ടത്. 65കാരിയായ പ്രമീളയെ ഹിമാചൽ പ്രദേശിൽ നിന്നാണ് അധികൃതർ കണ്ടെത്തി നാട്ടിലെത്തിച്ചത്.
പ്രമീളയ്‌ക്ക് 26 വയസ്സുള്ളപ്പോഴാണ് കാണാതായത്. 1986ൽ നന്ദലാൽപട്ടണ സ്വദേശി ദീനബന്ധു മാലിക്കിനെ വിവാഹം കഴിച്ച പ്രമീളയ്‌ക്ക് 1987ൽ ഒരു ആൺകുഞ്ഞ് പിറന്നു. ധ്രുവചരണെന്നാണ് മകന് പേരിട്ടത്. മകന് ഒരു വയസ്സ് തികയും മുമ്പാണ് പ്രമീള ഭർതൃവീട്ടിൽ നിന്ന് സ്വന്തം വീട്ടിലേക്ക് പോയത്.
1987 സെപ്റ്റംബറിൽ മാതാപിതാക്കളുടെ വീട്ടിലെത്തിയ പ്രമീള, പിതാവിന്റെ മരണത്തിന് പിന്നാലെ കുടുംബത്തെ അറിയിക്കാതെ അവിടെനിന്ന് ഇറങ്ങി പോയി. പിന്നീട് പ്രമീളയെക്കുറിച്ച് കുടുംബത്തിന് യാതൊരു വിവരവും ലഭിച്ചില്ല. ഇതിനിടെ ഭർത്താവ് ദീനബന്ധു പ്രമീളയുടെ ഇളയ സഹോദരി ഉർമിളയെ വിവാഹം കഴിച്ചു.
ഒഡീഷയിലെ പേരാണ് വഴിത്തിരിവായത്
വർഷങ്ങളോളം പ്രമീള എവിടെയാണെന്നത് സംബന്ധിച്ച് കുടുംബത്തിന് യാതൊരു വിവരവുമുണ്ടായിരുന്നില്ല. 2011 മുതൽ 2018 വരെ ഷിംലയിലെ മെന്റൽ ഹെൽത്ത് ഇൻസ്റ്റിറ്റ്യൂട്ടിലായിരുന്നു പ്രമീള കഴിഞ്ഞിരുന്നതെന്നാണ് സ്ഥാപന രേഖകൾ വ്യക്തമാക്കുന്നത്.
2018 ജനുവരി 30ന് അവരെ ഷിംലയിലെ നാരി നികേതനിലേക്ക് മാറ്റി. പിന്നീട് 2023 ഫെബ്രുവരി 16ന് ഭംഗ്രോട്ടുവിലെ വൃദ്ധസദനത്തിലെത്തിച്ചു. അതിന് ശേഷം അവിടെയായിരുന്നു താമസം. ഡൽഹിയിൽ നിന്നാണ് പ്രമീള ഹിമാചൽ പ്രദേശിലെത്തിയതെന്നാണ് ലഭിച്ച വിവരം.
രണ്ടാഴ്ച മുമ്പ് മാണ്ഡി ജില്ലയിലെ ബാൽഹ് സബ് ഡിവിഷണൽ മജിസ്‌ട്രേറ്റിന്റെ നേതൃത്വത്തിലുള്ള സംഘം വൃദ്ധസദനത്തിലെത്തി പ്രമീളയുമായി സംസാരിച്ചു. തിരിച്ചറിയൽ രേഖകൾ പരിശോധിക്കുന്നതിനിടെയാണ് കൈയിലെ ഒഡിയ ലിപിയിൽ പച്ചകുത്തിയ പേര് നിർണായക സൂചനയായത്.
‘മിഷൻ അപ്നോ തക്’
തുടർന്ന് ഹിമാചൽ സർക്കാരിന്റെ മിഷൻ അപ്നോ തക് പദ്ധതിയുടെ ഭാഗമായി ഉദ്യോഗസ്ഥരും സാമൂഹിക പ്രവർത്തകരും പ്രമീളയുമായി നിരവധി തവണ കൗൺസിലിങ് നടത്തി. ഒഡീഷ പൊലീസിന്റെ സഹായത്തോടെ നടത്തിയ അന്വേഷണത്തിലാണ് കേന്ദ്രപാരയിലെ കുടുംബത്തെ കണ്ടെത്തിയത്.
തിരികെ ഒഡീഷയിലേക്ക് പോകാൻ പ്രമീളയും താൽപര്യം പ്രകടിപ്പിച്ചു. തുടർന്ന് കേന്ദ്രപാര പൊലീസ് സൂപ്രണ്ടിന്റെ നിർദേശപ്രകാരം സെപ്റ്റംബർ 26ന് പ്രത്യേക സംഘത്തെ രൂപീകരിച്ചു. സംഘം പ്രമീളയെ നന്ദലാൽപട്ടണത്തിലെ വീട്ടിലെത്തിച്ചു.
39 വർഷത്തിന് ശേഷം അമ്മയെ നേരിൽ കണ്ട ധ്രുവചരണിന് വികാരങ്ങൾ നിയന്ത്രിക്കാനായില്ല. പ്രമീള മകനെ കെട്ടിപ്പിടിച്ചപ്പോൾ വർഷങ്ങളായുള്ള കാത്തിരിപ്പിന് വിരാമമായി. കുടുംബത്തിലെ മറ്റ് അംഗങ്ങളെയും പ്രമീള കണ്ടുമുട്ടി.
“എന്റെ ജീവിതത്തിലെ ഏറ്റവും സന്തോഷകരമായ നിമിഷമായിരുന്നു അമ്മയെ കെട്ടിപ്പിടിച്ചപ്പോൾ. അമ്മ സുരക്ഷിതമായി തിരിച്ചെത്തണമെന്ന് ഞാൻ എപ്പോഴും പ്രാർഥിച്ചിരുന്നു. ആ പ്രാർഥന ഒടുവിൽ സഫലമായി,” ധ്രുവചരണം പറഞ്ഞു. ഇനി മകനും കുടുംബാംഗങ്ങൾക്കുമൊപ്പം ഗ്രാമത്തിൽ തന്നെ കഴിയാനാണ് പ്രമീളയുടെ തീരുമാനം.
എന്നാൽ സന്തോഷത്തിനിടയിലും പ്രമീളയെ കാത്തിരുന്നത് വേദനിപ്പിക്കുന്ന വാർത്തകളായിരുന്നു. ഭർത്താവ് ദീനബന്ധു ഉൾപ്പെടെ നിരവധി അടുത്ത ബന്ധുക്കൾ ഇതിനോടകം മരിച്ചുവെന്ന വിവരം വീട്ടിലെത്തിയ ശേഷമാണ് പ്രമീള അറിയുന്നത്.
