ചെന്നൈ: സർക്കാർ സംഘടിപ്പിച്ച വളകാപ്പ് ചടങ്ങിൽ വിളക്ക് തെളിക്കുന്നതിനെച്ചൊല്ലി കോൺഗ്രസ് രാജ്യസഭാ എംപിയും തമിഴക വെട്രി കഴകം (ടിവികെ) എംഎൽഎയും തമ്മിൽ തർക്കം. തിരുച്ചിയിൽ നടന്ന ചടങ്ങിനിടെ കോൺഗ്രസ് എംപി ക്രിസ്റ്റഫർ തിലകിന്റെ കൈയിലുണ്ടായിരുന്ന മെഴുകുതിരി ടിവികെ എംഎൽഎ നാവൽപട്ട് എസ്. വിജി തട്ടിമാറ്റിയതോടെയാണ് സംഘർഷാവസ്ഥയുണ്ടായത്. സംഭവത്തിന്റെ ദൃശ്യങ്ങൾ പുറത്തുവന്നതോടെ വിവാദവും ശക്തമായി.
സാമൂഹ്യക്ഷേമ-വനിതാ അവകാശ വകുപ്പിന് കീഴിലുള്ള ഏകീകൃത ശിശുവികസന പദ്ധതിയുടെ ഭാഗമായി തിരുച്ചിയിൽ സംഘടിപ്പിച്ച സമൂഹ വളകാപ്പ് ചടങ്ങിലാണ് സംഭവം. ഗർഭിണികൾക്കായി സംഘടിപ്പിച്ച സർക്കാർ പരിപാടിയിൽ മന്ത്രി എസ്. രമേശ്, ജില്ലാ കലക്ടർ പ്രതീക് ദയാൽ, എംഎൽഎമാർ, രാജ്യസഭാ എംപി ക്രിസ്റ്റഫർ തിലക് തുടങ്ങിയവർ പങ്കെടുത്തു.
മെഴുകുതിരിയെച്ചൊല്ലി തർക്കം
ചടങ്ങിന്റെ തുടക്കത്തിൽ മന്ത്രി എസ്. രമേശ് കുത്തുവിളക്ക് തെളിച്ചു. തുടർന്ന് ജില്ലാ കലക്ടറും ടിവികെ എംഎൽഎമാരായ കതിരവനും വിഗ്നേഷും വിളക്ക് തെളിച്ചു. ഇതിന് പിന്നാലെ തിരുവെറുമ്പൂർ എംഎൽഎ നാവൽപട്ട് വിജി വിളക്ക് തെളിയിക്കാൻ മുന്നിലെത്തി.
എന്നാൽ ഇതിനിടെ മെഴുകുതിരി കോൺഗ്രസ് രാജ്യസഭാ എംപി ക്രിസ്റ്റഫർ തിലകിന് കൈമാറുകയായിരുന്നു. ഇതിൽ പ്രകോപിതനായ വിജി, തനിക്കാണ് അടുത്തതായി വിളക്ക് തെളിയിക്കേണ്ടതെന്ന് പറഞ്ഞ് തർക്കിച്ചു. ചടങ്ങിലെ പ്രോട്ടോക്കോൾ പാലിക്കാത്തത് എന്തുകൊണ്ടാണെന്നും അദ്ദേഹം ചോദിച്ചു. എംപി മെഴുകുതിരി വിജിക്ക് കൈമാറാൻ ശ്രമിച്ചെങ്കിലും അദ്ദേഹം അത് വാങ്ങി താഴെയിടുകയായിരുന്നു. .
സംഭവത്തിൽ കോൺഗ്രസ് എംപി ക്രിസ്റ്റഫർ തിലകുമായി വ്യക്തിപരമായ പ്രശ്നങ്ങളൊന്നുമില്ലെന്ന് വിജി പിന്നീട് വിശദീകരിച്ചു. എംപിയെ അന്നാണ് ആദ്യമായി കാണുന്നതെന്നും ചടങ്ങിൽ നിശ്ചയിച്ചിട്ടുള്ള നടപടിക്രമം പാലിക്കണമെന്നാണ് താൻ ആവശ്യപ്പെട്ടതെന്നും അദ്ദേഹം പറഞ്ഞു.
ചടങ്ങിനിടെ ഗർഭിണികളോടൊപ്പം ജനപ്രതിനിധികൾ ഫോട്ടോ എടുക്കുന്നതിനിടെയും തനിക്ക് വേണ്ടത്ര പ്രാധാന്യം നൽകിയില്ലെന്ന തരത്തിൽ വിജി മറ്റ് എംഎൽഎമാരോട് പരാതി പറഞ്ഞതായും റിപ്പോർട്ടുകളുണ്ട്.
സംഭവത്തിൽ കോൺഗ്രസ് നേതാക്കൾ പ്രതിഷേധവുമായി രംഗത്തെത്തി. ജനപ്രതിനിധികളോടുള്ള ബഹുമാനവും ഔദ്യോഗിക ചടങ്ങുകളിലെ പ്രോട്ടോക്കോളും പാലിക്കേണ്ടതുണ്ടെന്ന് മുൻ തമിഴ്നാട് കോൺഗ്രസ് ഐടി-സോഷ്യൽ മീഡിയ വിഭാഗം ചെയർമാൻ എസ്. നബീൽ അഹമ്മദ് പ്രതികരിച്ചു. എംപി ക്രിസ്റ്റഫർ തിലകിനോട് വിജി ഖേദം പ്രകടിപ്പിക്കണമെന്നും അദ്ദേഹം ആവശ്യപ്പെട്ടു. വിളക്ക് തെളിക്കുന്നതിനെച്ചൊല്ലിയുണ്ടായ തർക്കത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെയാണ് സംഭവം രാഷ്‌ട്രീയ ചർച്ചയായത്.
