ശാസ്താംകോട്ട: പാര്‍ക്കിന്‍സണ്‍സ് രോഗബാധിതനായ ഭര്‍ത്താവിനെ കൊലപ്പെടുത്തിയ കേസില്‍ ഭാര്യയെ പൊലീസ് അറസ്റ്റ് ചെയ്തു. പോരുവഴി ചാത്താകുളം ജിജി ഭവനില്‍ ജോസ് ഡാനിയേല്‍ (അലക്സ്, 64) മരിച്ച സംഭവത്തില്‍ ഭാര്യ മറിയാമ്മ ജോസിനെയാണ് (59) ചെന്നൈയില്‍നിന്ന് ശാസ്താംകോട്ട പൊലീസ് പിടികൂടിയത്. കഴിഞ്ഞ 20ന് രാവിലെയാണ് ജോസിനെ മരിച്ച നിലയില്‍ മറിയാമ്മ ഭരണിക്കാവിലെ സ്വകാര്യ ആശുപത്രിയില്‍ എത്തിച്ചത്. ജോസ് ആത്മഹത്യ ചെയ്തതാണെന്നായിരുന്നു ആശുപത്രി അധികൃതരോടും ബന്ധുക്കളോടും പറഞ്ഞത്. എന്നാല്‍ കഴുത്തിലെ പാടുകളിലും ശരീരത്തിലെ ചെറിയ മുറിവുകളിലും സംശയം തോന്നിയ ഡോക്ടര്‍ പൊലീസിനെ വിവരമറിയിച്ചു.
തുടര്‍ന്ന് പാരിപ്പള്ളി മെഡിക്കല്‍ കോളജ് ആശുപത്രിയില്‍ മൃതദേഹ പരിശോധന നടത്തി. പിന്നീട് മൃതദേഹം ഇടവക പള്ളിയില്‍ സംസ്‌കരിച്ചു. പോസ്റ്റ്മോര്‍ട്ടം, ഫൊറന്‍സിക് പരിശോധനാ ഫലങ്ങള്‍ പുറത്തുവന്നതോടെയാണ് മരണം കൊലപാതകമാണെന്ന് സ്ഥിരീകരിച്ചതെന്ന് പൊലീസ് അറിയിച്ചു. സംഭവസമയത്ത് ജോസും മറിയാമ്മയും മാത്രമാണ് ചാത്താകുളത്തെ വീട്ടിലുണ്ടായിരുന്നതെന്നാണ് പൊലീസ് പറയുന്നത്. കഴുത്തില്‍ പ്ലാസ്റ്റിക് ചരട് മുറുക്കി ജോസിനെ കൊലപ്പെടുത്തിയശേഷം ആത്മഹത്യയാണെന്ന് വരുത്തിത്തീര്‍ക്കാന്‍ ശ്രമിച്ചെന്നാണ് കേസ്.
സംസ്‌കാരത്തിനുശേഷം പൊലീസ് നടപടി ഭയന്ന് മറിയാമ്മ ചെന്നൈയിലേക്ക് പോയെന്നാണ് അന്വേഷണത്തില്‍ കണ്ടെത്തിയത്. തിരുവള്ളൂര്‍ ജില്ലയിലെ ഗുമ്മിടിപൂണ്ടിയിലെ വ്യവസായ മേഖലയിലുള്ള മകന്റെ സുഹൃത്തിന്റെ സ്ഥാപനത്തിലായിരുന്നു ഇവര്‍ താമസിച്ചിരുന്നത്. ഫോണ്‍ രേഖകള്‍ പരിശോധിച്ച് സ്ഥലത്തെത്തിയ പൊലീസ് സംഘം മറിയാമ്മയെ അറസ്റ്റ് ചെയ്ത് നാട്ടിലെത്തിച്ചു. ജോസും കുടുംബവും നേരത്തേ ചെന്നൈയില്‍ താമസിച്ചിരുന്നു. അടൂര്‍ തുവയൂര്‍ ആനമുക്ക് സ്വദേശിയായ ജോസ് കഴിഞ്ഞ രണ്ടുവര്‍ഷമായി പാര്‍ക്കിന്‍സണ്‍സ് രോഗബാധിതനായിരുന്നു. മകന്‍ ജിജിയും മരുമകള്‍ പ്രീതിയും തിരുവനന്തപുരത്താണ് താമസം.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ഭര്‍ത്താവിനെ പരിചരിക്കുന്നതുമായി ബന്ധപ്പെട്ട ബുദ്ധിമുട്ടുകളും ഇരുവരും തമ്മിലുണ്ടായിരുന്ന പ്രശ്നങ്ങളുമാണ് കൊലപാതകത്തിലേക്ക് നയിച്ചതെന്നാണ് പ്രാഥമിക നിഗമനമെന്ന് ശാസ്താംകോട്ട സി.ഐ. എസ്. മഹേഷ്‌കുമാര്‍ പറഞ്ഞു. അറസ്റ്റിലായ മറിയാമ്മയെ കോടതിയില്‍ ഹാജരാക്കി റിമാന്‍ഡ് ചെയ്തു.